Urom 7
7
Uten a tem kwu li tyuu ye, li fel gwaa ha Ukristi a
1Bebuye, mi kọng ha amen na bendi abe be ngye gbe le uten a. Faale atyang-ale men ma ngye le uten u kee-kee bwọ undi nyọng u yi uwum a. 2Nya ana uten libee u yi, uten a bwọ ungingye le u tyang ukye-ma ye, le kigbe na ukye-ma u yi uwum. Ukpọ gbe ukye-ma a hwo, u ha fel pọ le he uten angwu a de le u tyang ukye-ma ye ana. 3Ashin ki ze le, gbe a tyang ukye-ma gye le bee le ungikye ususo nyọng ukye-ma u so uwum, ha u tan akpla a. Ukpọ gbe ukye-ma a hwo, u ha fel pọ le he uten angwu a bwọ he ana. Gbe a fel gye libee, ha a tem tan akpla a ye.
4Bebuye, ki yi kitaa ken ke men ọ titi. Iten Umosis i tem bwọ amen ye, likọye ma ma hwo ipel ha Ujeso Kristi. Kanaa-anaa i ma fel ke Ujeso Kristi angwu Unim a wum le he lihwu, le bel puu li shi aki anunung ke Unim. 5Le-iti ma ukpọng li ha ngye Unim, Iten Umosis i ma wum bigyọ bibibi abi bi yi ha abel, bi shi li li shi bibibi abi bi be le lihwu gwu li. 6Ukpọ kanaa-anaa i, li fel pọ le he iten Umosis angi le-iti i ma bwọ li fe he lifee, li tem kaa le li pwọm Unim gbe he andọ-ale iten angi be fee fe he kushia ana a ye, ukpọ li fel pwọm he he kukwo kufufe gbe ha Ukatia Kunyọng hwan.
Uten le kiban
7Li ha kọng le ana? Ki nya ze le iten Umosis i yi ibibi a? Dia! Ukpọ, ki be kwu le Iten ana i be ye, ha mi ngye kiban ye. Uten a de le, “Bel kiwọm undi ye.”#7:7 Ligye 20:17; Iten lefee 5:21 Ki be kwu le uten u kọng na ye, hang mi ngye ubel ye. 8Ukpọ he kuhwo uten umen ana, kiban ki nde libwo shi-m mi fel bel mbee bitetaa biwọm puu. Ki be kwu le uten a ye, hang kiban ki yi le ikeb ye. 9Ki ma yi le kunyọng kususo ahwu mi ma ngye uten ye. Ukpọ nyọng mi be ngye uten Unim, kigyọ kiban ashele ki wum, mi hwo. 10Unim a ma ke Iten le he bendi be kpan a, ukpọ i fel be le lihwu a gwu-m mi. 11Gbe he uten umen ana, kiban ki nde libwo lam mi fe abwo he kibibi ashele, ki tan le lihwu gwu-m. 12He ashin, ki nung ngwọng le iten Umosis i be le ha Unim a, uten uyang-yang u yi gelalala, u shi kpa-kpa, u shi le ukpel ke bendi.
13Fe ashin ki ze le kiwọm kimen ashi ki ngbeb i na ki be le lihwu gwu-m a? Dia! Iten na i be le lihwu ye, kiban a. Gbe he Iten inunung angina na kiban ki be le lihwu gwu-m he ki tyung gboo ashi ki ze le kiban. He ashin, gbe he uten Unim ki nung ngwọng le kiban ki ban na afọng-afọng.
14Li ngye le Iten ana i be le ha Unim a, ukpọ mi ufe mi yi he agwo a, mi shi ufee kiban. 15Biwọm abi migyang mi shi ọ bi tem nung mi ye, likọye mi sha binunung abi mi kee le mi sha a ye, mi bel sha bibibi abi mi kee ye a. 16Gbe mi kee le mi sha bibibi abi mi shi i a ye, ashin ki tyung le mi bọng le iten ana i ngbeb a. 17Ashin ki ze le migyang na mi fe ukaa shi bibibi bimen ana ye, kiban ashi ki yi ha ami lityam na ki shi-m mi shi abi. 18Mi ufe na undi-gye, mi ngye le ki yi le kinunung ha ami lityam ye. Mi sha ugim ufe le mi shi ashi ki yi kinunung, ukpọ mi yi le ikeb angi mi shi ashi ye. 19Mi sha kinunung ashi mi kee a ye, mi tem bel sha kibibi ashi mi kee ye a. 20Gbe mi shi kibibi ashi mi kee ye a, ashin ki tyung le migyang na mi shi ye, kiban na ki shi.
21He ashin, mi nde shi ki fel ana uten a le kunyọng kuyang-ayang mi kee le mi sha kinunung, kiban ki bọng mi ye. 22Le ha ami lityam, Iten Unim i nyin mi kaang. 23Ukpọ mi nde ha ami inyia-hwo, uten u ndo kukye ha a shi ugim ugi a ngye le ki ngbeb. Kiban ashi ki yi ha ami lityam a, kife na ki shi-m mi yi ufee kiban. 24Kibang kitaa undi lizaa angwu mi yi, ayang u be kpe-m tyang le ha agwo angi a hwo nyin? 25Ipee i kwu ke Unim angwu a kpan li gbe ha Ada Ujeso Kristi!
He ashin, he ugim ugi mi yi ufee ke uten Unim a, ukpọ he abwo kiban agi, mi yi ufee ke kiban.
Currently Selected:
Urom 7: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.