Urom 6
6
Ahwole ke kiban, akwole uwum ha Ujeso Kristi
1Li ha kọng la ana a? Li ndu gye kushu shi biban le gbe Unim a tyung beshi he abel a? 2Dia! Bel abe li hwo ke kiban, ki sha naa li ngyọ kwu bewum he kiban? 3Ha ma ngye le bel puu abe be ma wu li umbwo ha Ujeso Kristi, ki tyung le be ma wu li he lihwu lima a ye a? He ashina li hwo ipel he ahe. 4Be ma ngi li utung ha he gbe he umbwo awole gye he lihwu, le nya ana Unim Atya-tyan a ma wum Ujeso Kristi le he lihwu gbe he ifem ima, na bel ọ li be kwu le likpan lifufe.
5Bel li gwaa ipel he ahe he lihwu lima angi itaa i, faale ifung li ba gwaa ipel he ahe he awum-ale uma le he lihwu. 6Li ngye le be ma maa gwu likpe lityam lityan bee he kikpakpa ipel he ahe, le he udaa kiban u hwo gbang, he li tem kwu ifee he abwo kiban ye, 7likọye undi angwu a hwo a fel pọ le ha kiban.
8Gbe li hwo ipel ha Ujeso Kristi, li bọng le li ba kwa utung he ahe. 9Li ngye le gbe Ujeso Kristi a ma wum le he lihwu, u tem hwa ye. Lihwu li tem yi le ikeb le li gwa he ye. 10Lihwu angi a hwo, a hwo ke kiban ku gbe ken ke bendi puu, ukpọ likpan angi u yi le ngi, li fel ke Unim a.
11Kitaa a ken ma nde kuhwo-men na ma hwo ke kiban, ukpọ ma yi bewum ke Unim ha Ujeso Kristi. 12He ashin ma tyang kiban ki teng agwo amen ye, he ma nde le ma fa shwa bigyọ angi ye. 13Ma kung ligwo limen ken ọ ke kiban na kigbọ aki kibibi ye. Ukpọ ma kung kuhwo-men ke Unim na bendi abe be wum le he lihwu fel bewum, ma kung kuhwo-men puu ke na kigbọ aki ashi ki yi kinunung. 14Ki yi le kiban ki kpe men ityuu ye, likọye ma tem yi ke uten a ye, ma fel ke beshi Unim a.
Li fel ifee ke kinunung a
15Ashin ki ha ze le ana? Ki nya ze le li ndu fel shi kiban le gbe li fel benunung gbe he inung Unim a, gbe he Iten a ye a? Dia! 16Ma ngye dang le gbe undi a keb kuhwo-ma fel ufee undi le u ke-e ife, ashin ki ze le a fel ufee undi umen angwu u ke-e ife ana a. U ha ndu kwa ufee kiban, u kwu ufee Unim kugbe ken ye. Gbe u yi ufee kiban a, lifem ashi li yi lihwu. Ukpọ gbe u yi ufee he akele Unim ife a, lifem ashi li yi le Unim u kpa he le u yi ununung. 17Ipee i kwu ke Unim, likọye le-iti ma ma yi ifee kiban, ukpọ kanaa-anaa i ma ke ife le lityam limen puu he biwọm abi li hwọ amen. 18Nyọng ma mbee le abwo le he kiban, ma fel ifee Unim he men ma shi kinunung.
19Mi kung biwọm igye anyin paa tyung amen le he ki nung amen ngwọng a, likọye na bendi-gye, biwọm bi shwee nung amen ye. Le-iti ma ma keb inyia-hwo imen puu ka kiban le kibibi le he men ma shi bibibi gye kushu. Kanaa-anaa i ufe, ma nde le ma keb kuhwo-men puu ke he kinunung ashele le he men ma kwu tata ke Unim a kigyang-kigyang. 20Le-iti nyọng ma ma yi ifee kiban, ma ma yi le abwo he kinunung ashele ye. 21Bibibi abi bi fel amen ishwia-ishwia kunyin i, kibang ki ma yi lifem limen nyọng ma maa shi abi? Lifem abi li yi lihwu a. 22Ukpọ kanaa-anaa i ma mbee le abwo le he kiban, ma fel ifee Unim a. Lifem ashina li yi le ma fel betaa-betaa faale kiban, kigyang-kigyang. He ashin, he umbee-likel ma be kwu le likpan angi li ngyọ igye kpam. 23Lifem kiban li yi lihwu, ukpọ kuke Unim ku yi likpan akwole ngyọ igye kpam gbe he agwa-ale ipel ha Ada Ujeso Kristi.
Currently Selected:
Urom 6: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.