Urom 2
2
Ushe Unim angwu u yi kpa-kpa
1Wo angwu wo tang ushe le bendi abe be teng be sha ki ngbeb ye, nde le wo ngye le wogyang ọ wo yi le ashi wo kwu kubwo hwaa ingyo Unim ye? Nyọng wo de le undi ususo a shi ki ngbeb ye, ha wo de le wogyang na wo shi ki ngbeb ye, likọye wogyang wo sha bimen abi befe be shi ana. 2Li ngye le nyọng Unim u maa ushe tang libi ke bendi abe be shi bitaa biwọm bimen ana, ushe uma u yi kigyang. 3Nyọng wo angwu wo yi undi-gye wo tang ushe le, bendi abe be shi biwọm abi kitaa ana be shi ki ngbeb ye, ukpọ wo sha biwọm bimen ana. Wo gim le wo ba hwaa ushe Unim bee? 4Pisoye wo gim le, le gbe Unim a ngbeb inung kaang, u shi le lityam angib-ale, u tem ba maa a ushe ye. Nde le wo ngye le atan-lengi angwu Unim u yi le inung le beshi ha awo u yi le u ka-a kukwo he wo gie le he akwo agang a?
5Ukpọ wo kaa lishi, wo swan le wo gie lityam ligang ye, wo shi kingie kigang ki fel ba dyam kaang. Wo ba kpa kingie kigang ana nya liti angi Unim u be tyung ingyo ima gboo, u maa bendi puu ushe del-del. 6Unim u ba hwee undi uyang-yang kee ha a shi angwu a a shi.#2:6 Agyam 62:12; Ityang 24:12 7Bendi abe be gye kushu shi kinunung, be kung ashi abel ndọ he ifem le ife le likpan angi li ngyọ igye, Unim u ba ka abe likpan angi li ngyọ igye kpam. 8Ukpọ bendi besuso be gim kuhwobel ufe-ufe a, be kpe kigyang ye, be shi bibibi he akwo ayang-ayang. Befe na Unim he ingyo ima, u be ke abe kingie ki gbe itie. 9Bendi puu abe be shi kiban, be ba kpa kingie ki dyam kaang, ma be kwu Ijuus ọ, ma be kwu Ijuus a ye ọ. 10Ukpọ Unim u ba dyam bendi puu abe be shi kinunung, u fem abe, u shi abe be kwu he ikwun, ma be yi Ijuus ọ, ma be yi Ijuus a ye ọ. 11Bendi puu be yi Unim kitaa ken a likọye Unim u gie bikwu ye.
12Bendi puu abe be bia uten Umosis faale angyele uten umen ana, be nim gba he uten umen ana. Bendi Ijuus abe be ngye Iten imen ana be bia angi, Unim u maa abe ushe le uten umen ana. 13Unim u kpa undi le u yi ununung le gbe a gyo Iten imen ana a ye, u fel ununung he ashi Unim le gbe a ndọ angi a. 14Nyọng bendi abe be yi Ijuus a ye abe be ngye Iten imen ana ye, be shi nya ana Iten imen ana i kọng, be tyung le be ngye he atyam abel ashi ki yi kpa-kpa le be shi, ma na be ngye Iten imen ana ye ọ. 15Abi be shi bi tyung le Iten imen ana i yi he atyam abel. Igim ibel i tyung abe ashi ki ngbeb le ashi ki ban. I da abe nyọng be shi ashi ki ngbeb le nyọng be shi ashi ki ban. 16Kitaa ana na Unim u be maa bendi ushe gbe ha Ujeso Kristi nya liti limen angi u be maa bendi ushe he biwọm kundyel abi be shi. U ba sha ashin nya ana mi bun de men he kisọm kinunung ashi mi bun.
Ijuus le uten
17Gbe wo ko kuhwo-gang le undi Ijuus, wo mbu gie ha Uten, wo pwọm ungwu ha Unim, 18wo ngye ashi Unim a kee le wo shi, gbe be hwọ-a Iten imen ana, wo fel le lingye ashi ki ngbeb le ashi ki ban. 19Wo gim ha awo lityam le wo kpe angwu wo tyung uhwọ-ashi kukwo, wo kwu kikung-gboo ke abe be yi he kifufeb, 20wo gim le wo kpe angwu wo teb abe be yi kpelye, wo hwọ abe be wa ngye kiwọm ye. Wo gim le Iten imen ana i ka-a lingye, i fem kigyang tyung a. 21Gbe wo na wo hwọ abe be teng, kibang a, wo hwọ kuhwo-gang ufe ye? Wo bun da bendi le, be zi kazi ye, ha wo ufe, wo za a? 22Wo da bendi le be kee ungye undi ye, ha wo ufe, Wo kee ungye undi a? Wo da bendi le be shi ikem ye, wo zi kung biwọm le he ishọm ikem a? 23Wo pwọm ungwu le wo ngye Iten imen ana, kibang a, wo be le ibia ke lizen Unim gbe he aban-ale Iten imen ana? 24Ki yi nya ana be fee he kushia Unim a le, “Bendi abe be yi Ijuus a ye be kọng bia lizen Unim gba he likpe limen Ijuus.”#2:24 Azaya 52:5
25Liten li yi le lifem gbe ma ndọ uten a. Ukpọ gbe ma ban angi, ha liten limen li yi kididing. Ma ndu tyang aten-ale kugbe ken. 26Gbe undi a ten ye, ukpọ u ndọ Iten imen ana, Unim u nya kpa he le u yi ununung nya ana undi angwu a ten ye a? 27Kitaa ana na bendi abe be ndọ Iten imen ana, ma na be ten ye ọ, be tyung gboo le men abe ma ngye Iten ma zi libi. Men ma ngye Iten imen angi be fee fe he kushia, ma mbee ten, ukpọ ma ndọ Iten imen ana ye.
28Ma undi u ten ọ, ashina ki shi-e a fel undi Ijuus ugyang angwel a ye. Liten ligyang angyel li yi kiwọm ashi be nde le atọng-shi a ye. 29Undi Ijuus ugyang angwel u yi undi angwu Unim a gie he lityam gbe ha Ukatia Kunyọng uma a, gbe he Iten a ye. Undi angwu kitaa ana, Unim na u pee he, undi-gye a ye.
Currently Selected:
Urom 2: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.