Urom 14
14
Bendi abe dyung-dyung le abe kang-kang
1Undi angwu a bọng ha Ujeso Kristi, ma kpe-e he liwu limen, ma na a waa kaa kpe he kukwo Unim ye ọ. Ma kwel kee-kee fe-e kitaa ashi ki yi le bendi Unim be shi ma ye. 2Bendi besuso be bọng le be tel kiwọm ye, be za kiyang-yang; ukpọ besuso abe be wa kaa kpe he kukwo Unim ye, be tel inyia puu. 3Undi angwu u zi kiwọm kiyang-yang, u ben angwu u tel ashi ana ye. Kitaa a ken, angwu u tel kiwọm u ben angwu u zi ashi ana ye, likọye Unim a kpe be a puu. 4Ayang u yi a wo angwu wo maa unwaa-ushọm undi ushe? Atyam ugyang na ki yi le u pee he ọ, u ben he ọ, he ashi a shi. U mbeb kukwo ye, likọye Ada Ujeso u yi le ikeb le u kpel he.
5Undi ususo u gim le liti lisuso li dyam hwo angi a teng, ususo u gim le ati puu a yi kitaa ken. Undi uyang-yang u naa gen he ashi a ngye le ki yi kpa-kpa. 6Undi angwu liti lisuso li dyam he hwo angi a teng, u sha na he u ke Ada ife a. Angwu kiwọm ki tel he ye, u zi kiyang-yang, u shi na he u ke Unim ife a, likọye u pee Unim. Angwu kiwọm ki tel he, u sha na he u ke Unim ife a. Ufe ọ titi u pee Unim. 7Bel puu, ki yi le undi angwu u kwu uwum ke kuhwo-ma ututeb ye, ki shi le angwu u hwo lihwu ke kuhwo-ma ututeb ye. 8Gbe li yi bewum, li kwa bewum le li fe Ada a, gbe li hwo, li hwaa le li fe Ada a. He ashin, ma li kwu bewum ọ, ma li hwo ọ, li yi ke Ada a. 9Atan-lengi angwu Ujeso Kristi a hwo, u tem wum, u yi le he u kwu Usu bendi bewum le a be be hwo a.
10Gbe abin bi yi kitel i, ki shi na a, men besuso ma kọng bia undemen? Ki shi na a, ma ben he? Ma ngye le bel puu li ba naa he kushu kidem ashi Unim u kwu maa ushe, he u tang li ushe. 11Be ma fee he kushia Unim le,
“Ada Unim a de le, ‘Mi Unim na mi kọng le,
undi uyang-yang u ba keb anung he itang ka-m,
kabel kayang-yang ka ba kọng gboo le
mi na mi yi Unim.’ ”#14:11 Azaya 45:23, 24
12Nya he liti limen ana, bel puu, undi uyang-yang u ba naa he kushu Unim da he ashi a shi he igye i.
Ma shi unwaa-ndamen u gbaa limbu ye
13He atan-lengi angwun, ma li tem gye kushu ben bende ye. Ashi ki ngbeb le li shi ki yi le li zam le li sha kiwọm ashi ki be le limbu ke unwaa-ndatyan ye. 14Na undi angwu u yi ke Ada Ujeso Kristi, mi ngye dang le ki yi le kitaa lizi angi li ban le kuhwo-ngi ye, ukpọ undi angwu a nde gia le u tel kitaa lizi lisuso, u tyang angi azele. 15Gbe wo zi ashi wo ngye le ki ban ugim unde-gang, ha wo yi le benyin he ahe ye. Kiwọm kiyang-yang ashi wo ngye le ki sha undi angwu Ujeso Kristi a hwo ke-e u tyang kukwo Unim, nde le wo zi ashi ye. 16Gbe wo ngye le kiwọm ki ngbeb ka-a le wo shi, gbe wo ngye le kiwọm ashi ha ki ba sha bendi be kọng kibibi gba le shi, nde le wo shi ashi ye. 17Kiteng kusu Unim ki yi he bizizi azele a ọ, nyọng bingwu-ngwo angwole a ọ ye. Ki yi he kinunung ashele, le ikwun le igọ a. Abin puu bi ba le ha Ukatia Kunyọng a. 18Undi uyang-yang angwu u fe Ujeso Kristi he kukwo ahwun a, u sha nyin Unim, bendi-gye ọ be pee he le a shi del-del.
19Mbee kunyọng puu, li kaa he li shi ashi ki shi bendi be kwu ikwun, be naa gen fe Unim. 20Shi zi lizi angi li ban aki angi Unim a shi he lityam unde-gang ye. Azi puu a yi ataa-ataa, ukpọ wo shi liketye gbe wo zi lizi angi li shi bendi besuso be tyang kukwo Unim. 21Kiwọm kiyang-yang ashi ki yi le ki sha unde-gang u tyang kukwo Unim, ki ngbeb le wo shi ashi ye, ma ki yi bizizi ọ, ma bingwu-ngwo ọ, ma ki yi kiwọm kiyang-yang ọ.
22Gbe wo bọng le Unim a tel bendi bema biwọm abina, tyang ashina ki kwu ke men ha Unim ashi afee. Kukwun ku yi ke undi angwu a ngye ashi ki yi kpa-kpa ke-e le u shi, u ha shi ashi faale uben he ugim uma. 23Ukpọ undi uyang-yang angwu u tyang ityang he ahe lityam, gbe a gye kushu zi ashi, ha a shi kiban he ashi Unim, likọye azele ashi u yi he abọng-ale a ye, kiwọm kiyang-yang ashi li shi, gbe li shi ashi he abọng-ale a ye, ha ki yi kiban a.
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.