Urom 13
13
Kuhwo ambwole ke bendi abe be teng bendi
1Undi uyang-yang u keb kuhwo-ma ke abe be teng bendi he kubọng, likọye Unim na a waa abe ndọ he libwo libel. Bendi puu abe be teng he kubọng, undi u yi le ikeb le kuhwo-ma faale afa-ale Unim na a ke-e angi ye. 2Ashin ki ze le undi angwu a swan abe, ha a swan ashi Unim a kọng a. Undi angwu a ke be ife ye, u kpa ushe Unim swa kuhwo-ma he lishi. 3Undi uyang-yang angwu u shi kinunung, u shel abe be teng bendi he kubọng ye, ukpọ undi angwu u shi kibibi na u shel abe. Undi angwu a kee le u shel atie-lishi kubọng ye, shi kinunung, ma be pee a, 4likọye undi angwu u teng bendi he kubọng u yi Unwaa-kisọm Unim he kinunung kimen a. Ukpọ gbe undi a shi kibibi, u shel abe, likọye Unim a ke be ikeb le be ke undi angwu a shi kibibi kingie. Nyọng be ke undi angwu a shi kibibi kingie, be sha aki Unim a. 5He ashin, undi uyang-yang u nde le a keb kuhwo-ma ke abe be teng bendi he kubọng, he kushel kingie ufe-ufe a ye, li keb ke be le gbe li ngye le ki yi kpa-kpa le li shi na a.
6Ashin na ki yi atan-lengi angwu ki yi le ma tye ukpanda ọ titi, likọye abe be kpe ukpanda ọ be sha aki Unim a. 7He ashin, ma tye ukpanda angwu u yi le ma tye. Ma tye bitaa ikpanda puu abi bi yi le ma tye. Bendi abe ki yi le be shel abe, be ke be ife, ma nde le ma shel abe, ma ke be ife.
Benyin be fa shwa uten
8Ma zi undi lihwọ ye. Lihwọ angi ma kee-kee zi na li yi le ki nyin amen le bende. Undi angwu ki nyin he le undema, ha a ndọ mbee Iten puu. 9Iten Unim i yi le, “Kee ungye ọ nyọng ukyeb undi ọ ye, gwu undi ye, zi kazi ye, ban lityam fe kiwọm undi ye.”#13:9 Ligye 20:13-15, 17; Iten lefee 5:17-19, 21 Iten Unim anyin le angi i teng puu i fe lishi le, “Ki nyin a le unde-gang na ki nyin a le kuhwo-gang.”#13:9 Iten ashangale 19:18 10Benyin be do undi ye, he ashina benyin na be yi afele sho uten.
Liti li fel kpee-kpee
11Ma ndu shi biwọm abin puu, likọye ma ngye le kunyọng ku fel ahwu ma wum le he kunde, likpan kunyọng lityan li fel kpee-kpee kanaa-anaa i hwo kunyọng ahwu li ma bọng. 12Kusu ku gye kigbe-kigbe, ashi a ndu taa. He ashin, li kung abwo le he bibibi abi bendi abe be tan he kifufeb be shi. Bel li yi bendi kikung-gboo a, ma li kung bigbọ kukye bityan kwu he abwo. 13Li shi likpe angi li kee le bendi kikung-gboo be shi, li gbe le abwo fe he awu abibi angi a yi awu ibwọm ana ye. Li mbee kung abwo le he akpla, le ashele kibibi faale abwo akwole. Li kung abwo le he kushwan le ashi abung-ale. 14Ma shi kuhwo amen le Ada Ujeso Kristi. Ma bọng shi bigyọ bibibi bimen abi bi be le he agwo a ye.
Currently Selected:
Urom 13: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.