Urom 12
12
Ashang-ale angwu u yi uwum
1Bebuye, gbe Unim a tyung beshi ha abel kaang, mi tim amen anung le ma kung kuhwo-men bewum shang gbang ke Unim na kitwoale ashi be gwu shang he na. Ma kung kuhwo-men ndọ tata ke-e ufe-ufe, ma shi ngbeb he. Kitaa i na ki yi kukwo kugyang ahwu ki yi le be fa he. 2Ma hwọ kpe kung likpe bendi abe be yi ke igye i ye, ma tyang Unim u gie igim imen he men ma fel bendi befufe, ma ha ngya ashi Unim a kee amen le ma shi. Ma ha ngye ashi ki ngbeb Unim, ma ngye ashi ki nyin he, le ashi ki yi kpa-kpa he ugim uma.
Ambwole kuhwo he aki ashele he liwu abọng-ale
3Le gbe Unim a ke-m libwo likandi he inung ima, mi da amen puu le, undi u dyam kuhwo-ma gbe-gyọng libwo angi Unim a ndọ he ye, u shun kuhwo-ma ngbeb-ngbeb hwan le he u ngye kuke ahwu Unim a ke-e gbe he abọng-ale ama. 4Ma ngye le undi-gye u yi le agwo gbam, ligwo liyang-yang li yi le ama aki atyetye. 5Ashin ki yi kitaa ken ha abel ọ titi, ma na bel a be li gwaa kuhwotyan ipel ha Ujeso Kristi li yi gbam ọ, li fel na inyia-hwo undi ken a, bel puu li fel ke bende. 6Unim, gbe he inung ima, a ke li beke atyetye-atyetye, angwu kuke kuma ku yi le u tye ugie kisọm a, u tye kwọm na abọng-ale ama a yi. 7Angwu kuma ku yi le u kpel bendi abe be bọng ha Unim a, u kwu kiken kpel. Angwu kuma ku yi le u hwọ bendi kiwọm a, u kwu kiken hwọ abe. 8Angwu kuma ku yi le u fe bendi ingie a, u fe be ingie, angwu kuma ku yi le u ke kuke a, u ke faale kakwukwel. Angwu kuma ku yi le u teng bendi a, u teng le kuhwo ambwole, angwu kuma ku yi le u kwu le beshi le inung, u shi ashi igọ-igọ.
Atyung-ale benyin
9Ki nyin amen le bende lityam ken, ma tel kibibi, ki nyin amen le kinunung. 10Ki nyin amen le bende kaang na bebwaa-nam bende. Undi uyang-yang u gim undema hwan kushu. 11Ma shi aki kang-kang, ma hwun lihwun ye. Ma fe Ada lityam ken, ma kwu kiken kaang shi-e aki. 12Lishi andọ-ale limen he ukyeb Unim li shi amen ma yal gọ. Ma ngyọ naa gen nyọng bingie bi be hwaa le men, ma kọng ha Unim mbee kunyọng. 13Ma kpel bebwaa-ndamen bendi Unim, he kunyọng kuyang-ayang ki gben abe. Ma kpe begaa-ndi be he ishu imen igọ-igọ.
14Ma bii Unim le u ke bendi abe be shi kibibi ha amen kukwun, ma bii he le u ke be kukwun hwan, ma ke ushang ubibi a fe be ye. 15Ma yal gọ utung ha bendi abe be yal gọ, ma mbwee utung ha bendi abe be mbwee. 16Ma zi kihwan ha bendi puu kitaa ken, ma dim idim ye, ma ngwee utyang bendi abe be yi mbiloo, ma kung bigbọng he kusi ye.
17Gbe undi a shi amen kibibi, ma tem he utyang ye, ma shi ashi undi uyang-yang a bọng le ki ngbeb hwan. 18Ma kaa kaang kwu ikwun ha bendi puu. 19Bedimgi lityam, gbe undi a shi amen kibibi, ma tem he utyang ye, ma tyang he he Unim hwan u ke-e kingie. Be fee he kushia Unim le Ada a de le, “Utyang atemale u yi ugi a, mi ba tem utyang.”#12:19 Iten lefee 32:35 20Ma shi ashi be fee he kushia Unim hwan. Be fee le,
“Gbe itung i ndo undi-linaa umen, ma ke-e lizi,
gbe umbwo u gyo he, ma ke-e umbwo.
Gbe ma shi kitaa ana, ha ma kwuo akee-kinde a
wu-e he lishi, he ishwia i shi-e.”#12:20 Ityang 25:21, 22
21Ma bọng kibibi ki kpe men ityuu ye, ukpọ ma shi kinunung he men ma hwo ashi.
Currently Selected:
Urom 12: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.