Umatiu 6
6
Akung-ale ke bendi abe be yi le igben
1Ujeso a mbee de le, “Ma shi aki anunung amen he kugboo le bendi be nde men na ma shi angi a ye. Gbe ma shi na a, ha ma ba kpa lifem le ha Atyamen angwu he lifung-atabe ye.
2“Gbe ma ke undi-likaa kiwọm, ma bun ungwu na bendi bikpe-ashi be maa bun he ishọm Unim angi be kwu liwu, le he ishokwo ye. Befe be sha na he bendi be pee abe a. Kigyang-kigyang mi de men le be kpe lifem libel puu ma. 3Ukpọ gbe wo ke undi angwu u yi le igben kuke, shi kubwo limbel kugang ku ngye ashi kubwo lizen ku shi ye, 4he kuke kugang ku kwu he kundyel a. Ma Atyamen angwu u nde ashi ki shi he kundyel u ba ka-a lifem.”
Ushang akele
(Luk 11:2-4)
5“He kunyọng ahwu ma kọng ha Unim ma shi na bendi bikpe-ashi a ye. Ki nyin abe le be kọng ha Unim he kipi be kwu liwu, le he ishokwo he bendi be nde be. Kigyang-kigyang mi de men le be kpe lifem libel ma. 6Gbe ma ndu kọng ha Unim, ma gye he afee ushọm le shi lishi, ma ha kọng ha Atyamen Unim angwu be nde-e ye. Ma Atyamen angwu u nde ashi ma shi he kundyel u ba ka amen lifem. 7Gbe ma kọng ha Unim, ma shi kihwee ashi ki ze kiwọm ye na bendi abe be bọng ha Unim ye be kọng ye. Befe be kọng le gbe be kọng akpe gbam, Unim ubel u ha gyo abe. 8Ma kwu na befe be yi a ye. Atyamen Unim a ngye abi bi fọng amen le bi ma ukpọng ma ha bii he.
9“Ma kọng ha Unim kitaa ashin,
“ ‘Atya-tyan angwu u yi he lifung-atabe,
Mi tye ugboo ke lizen ligang.
10Kiteng kusu kigang ki be.
Biwọm puu he igye i bi shi na wo kee
nya ana abi he lifung-atabe bi shi.
11Ke li lizi angi li zi kunyin.
12Tyang biban bityan ke li
nya ana bel li tyang ke bendi
abe be shi ban li.
13Tyang li li mbu he ugil-ale ye.
Kpan li le he abwo usu bibibi.’
14Gbe ma tyang ke bendi abe be shi ban amen, Atyamen angwu he lifung-atabe u ha tyang biban bimen ka amen. 15Ukpọ gbe ma tyang ke bendi abe be shi ban amen ye, ha Atyamen angwu he lifung-atabe u ha ndu tyang biban bimen ka amen ye.”
Itung ando-ale
16“He kunyọng ahwu ma kọng ha Unim le itung ando-ale, ma ndọ kushu kimbwe-kimbwe na bendi bikpe-ashi be shi a ye. Befe be sha kuhwobel he bendi be ngye le be ndo itung ha. Kigyang-kigyang mi de men le be kpe lifem libel ma. 17Ukpọ he kunyọng ahwu ma kọng ha Unim le itung ando-ale, ma gbaa behwu he lishi, ma to kushu kumen, 18he undi u ngye le ma ndo itung ha ye. Atyamen angwu be nde-e ye ufe-ufe na u ngye. Atyamen umen angwu u nde ashi ma shi he kundyel i u ba ka amen lifem.”
Bingbeb abi he lifung-atabe
(Luk 12:33-34)
19“Ma kam bingbeb bimen ndọ hen he igye anyin a ye teng ikung le binde-bekpen bi za ban abi, bezi be ban ushọm le zi kung abi. 20Ma kam bingbeb bimen ndọ he lifung-atabe hwan, he ikung ọ, binde-bekpen ọ, bi zi ban abi ọ, ngwu bezi be zi kung ye. 21He kiteng ashi bingbeb bimen bi yi, ha na atyam amen a kwu titi.”
22“Atọng-shi a yi nya ana kimọ-kinde a ke inyia-hwo. Gbe atọng-shi amen a yi gelalala, inyia-hwo imen puu i kwa le kikung-gboo. 23Ukpọ gbe atọng-shi amen a yi anunung ye, inyia-hwo imen puu i kwa he kifufeb. Gbe kikung-gboo ashi ki yi ha amen ki bel kifufeb, ha kifufeb ashi ha ki gya gba gyọng.”
24“Undi ken u ha ndu fa betyam befee ye. Gbe na a ye, ha u tel angwu ken, ki nyin he le angwel. U ka angwu ken ife, u bia angwel. Wo ha ndu fa Unim ọ, bingbeb ọ, nya kunyọng ken ye.
Be ufung ye
25“Kife na mi de men le, ufung u be men gbe le lizi angi ma zi, le umbwo angwu ma ngwo kwu bewum, ngwu gbe le inditen angi ma fe ye. Likpan li dyam hwo lizi, inyia-hwo i dyam hwo inditen. 26Ma nde linyun angi li ndo he kusi, li nam itia ọ, nyọng li fem fe he abel ọ ye. Ma na ọ Atyamen angwu he lifung-atabe na u kwob angi. Men ma yi he kukpo hwo linyun ibwan-ibwan. 27Ayang he liwu limen u zi igye gbe-gyọng kunyọng ahwu hang a hwo le gbe u waa ufung?
28“Ki shi na a, ma be ufung gbe le inditen? Ma nde na abia a shi bibubọ. A sha aki ọ, nyọng a tye inditen fe kuhwo-ngi ọ ye. 29Mi kee le ma ngye le ma na Usu Usolomọn a ma sho le ifem ọ, a maa bwee idem ashia ha kubia ken ọ ye. 30Unim na u bwee abia idem. Abia angi a hwaa ashia kunyin, tete kuhwo a fel angi be ting angi shi kinde ọ, u bwee angi teng-teng le men a? Men abe inwaa abọng-ale! 31Ma shi waa ufung le he kung ma be le lizi le umbwo le inditen ye. 32(Kitaa i na bendi abe be ngye Unim ye be kee biwọm bimen i mbee kunyọng.) Atyamen angwu he lifung-atabe a ngye le ki fọng amen le biwọm bimen i puu. 33Ma shun kiteng kusu Unim angwu u yi Usu umen a kushu, ma mbee shi ashi a kọng, ma u kung biwọm bimen i puu ka amen. 34Ufung u shi be men gbe le kiwọm ashi kuhwo ki shi ye. Liti angi kuhwo li ba kwa le bingie angi. Liti liyang-yang li yi le bingie kee ha kuhwo-ngi. Ma kung bingie liti lisuso fe pel ha bingie liti angyel ye.”
Currently Selected:
Umatiu 6: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
