Umatiu 26
26
Be tim itim ibibi fe Ujeso
(Mak 14:1-2; Luk 22:1-2; Jọn 11:45-53)
1He kunyọng ahwu Ujeso a ma kọng biwọm bimen i mbee puu, a ha kung kọng ha bendi-utung bema le, 2“Ma ngye le ki teng ati afee he be shi kipam ashi be ko le, kipam agbele-gyọng. Undi u ba kung Unwaa undi-gye ka bendi-linaa abe be maa he bee he kikpakpa.”
3Nya he kunyọng kumen ana na bekandi bishang Unim le bekandi kubọng be kpee he ushọm Ukaifas angwu a ma yi Usu bekandi bishang Unim. 4Be kpee ha kwu itim na be nyia kwu Ujeso gwu. 5Be tim le be kwu-e le gwu he kunyọng kipam a ye, teng bendi be pel he ahe ndo ha abe.
Be wu Ujeso behwu he Ubetani
(Mak 14:3-9; Jọn 12:1-8)
6Nya ana Ujeso a ma yi he Ubetani he ushọm Usaimọn angwu akpaa a tang he, 7ungingye ususo a ma be le udim behwu abe be kaa kate kaang, be mbee nung nyin, be mbo wu Ujeso he lishi nya ana a maa zi lizi.
8Bendi-utung Ujeso be nde ashina, ki ban abe he lityam. Be bii le, kibang a, u ban behwu abena kitaa ana? 9Hang be kung behwu abena ndyeb zi kaa kate kaang, kung unde abe hwọ ke bendi-likaa.
10Ujeso a ngye ashi be kọng ha bende gbe le shi. Ufe a ha kung de be le, “Kibang a, ma ben ungingye angwun kitaa ana? A shi kiwọm kinunung a ha ami. 11Bendi-likaa befe be yi ha amen i mbee kunyọng#26:11 Iten lefee 15:11, ukpọ mi ufe mi ba kwa utung ha amen i mbee kunyọng ye. 12He kunyọng ahwu a wum behwu aben, a shi ashi he u kam agwo agi ndọ kunyọng angyele ugi a. 13Kigyang-kigyang mi de men le, he kiteng kiyang-yang mbee igye puu be be bun kisọm kinunung, be ba kọng gba le kinunung ashi ungingye angwun a shi i, he bendi be wel gbe le he.”
Ujudas a bọng le u ndyeb Ujeso za
(Mak 14:10-11; Luk 22:3-6)
14Ujudas Iskariyọt angwu a ma yi he liwu bendi-utung Ujeso abe lihwo le be befee a le hwaa le bekandi bishang Unim, 15u bii abe le, “Ma nya kam kibang kiwọm a, mi kung Ujeso ke men?” Be ke-e ikwudi lisi le ngi lihwo. 16Kung le ha he kunyọng kumen ana Ujudas a maa fel kee kukwo ahwu u kwu Ujeso ke be.
Ujeso a zi umbee-likel lizi utung ha bendi-utung bema
(Mak 14:12-21; Luk 22:7-14, 21-23; Jọn 13:21-30)
17He ukpi-kikwu liti kipam agbele-gyọng bendi-utung Ujeso be ma bii he le, kiteng ashi kung a kee le be kwu zi kipam agbele-gyọng?
18A de be le, “Ma gye he lifung-ushu le hwaa le ungikye ususo, de-e le Itisha a de le kunyọng kuma ku fel kpee-kpee. A kee le ufe le bendi-utung bema be kwu zi kipam agbele-gyọng he ahe ushọm.” 19Bendi-utung bema be le shi nya ana Ujeso a de be. Be le shi lizi angi be zi he kipam kimen ana.
20Likwu-lukwu li gyeb, Ujeso befe le bendi-utung bema be kwu kiteng ken keb lizi azele. 21Nya ana be maa zi lizi, a kung de be le, “Kigyang-kigyang mi de men le, undi ken he liwu limen a kam le u ndu ndyeb mi za.”
22Be fel le kimbwee kaang. Undi-undi a maa fel bii he le, “Ada, ashi wo kọng ana, ki nya yi-m mi a?”
23Ujeso a fan abe le, “Undi angwu ha na u ndu gye le kubwo he kigbọ lizi utung-utung ha ami i.” 24A mbee de be le, “Mi Unwaa undi-gye ufe a, mi ba hwa nya ana be fee gbe le mi he kushia Unim. Ukpọ, ki ba kwa kibibi ka undi angwu a ndyeb mi zi. Be hwan undi umen ana ye, hang ki yi-e ding.”
25Ujudas angwu u be ndyeb he zi, a kung bii he le, “Itisha ukandi, ki nya yi-m mi a?”
Ujeso a de-e le, “Wo tọ kọng na.”
26Nya ana Ujeso le bendi-utung bema be maa zi lizi, Ujeso a kung ibred kwu he kubwo, u pee Unim. A bun angi kung ke bendi-utung bema, u de be le, “Ma kpe ibred anyin zi, i yi inyia-hwo igi a.”
27A mbee kung ugba-ala kutyo kwu he kubwo, mbee pee Unim. A ha kung ke be, de be le, “Men puu ma kpe ngwo. 28Ashin ki yi anung azu agi angi mi wu ke bendi gbam he Unim u tyang biban bibel ke be a. Anung amen i a tyung le Unim u ba sha ashi a kọng ndọ ha bendi abe be bọng ha ami. 29Mi kee le ma ngye le mi tem ngwa udung agbe ukwan Uvine angwun ye kpam la kwọm he liti angi mi be le ngwo ahwu kufufe utung ha amen he kiteng kusu atyagi a.”
30Be ha gyam kugyam pee Unim, be gbe gye he ukwel angwu be ko le Olif.
Ujeso a kọng ndọ le Ipita u ba swan he
(Mak 14:27-31; Luk 22:31-34; Jọn 13:36-38)
31Ujeso a de bendi-utung bema bemen ana le, “Kusu ahwu kunyin i, men puu nyin ma buu tyang mi ututeb. Be ma fee he kushia Unim le-iti le,
“ ‘Mi ba gwa ukang-itia,
ma itia i paa he abwo.’#26:31 Uzakariya 13:7
32Ukpọ kunyọng ahwu mi be wum le he lihwu, mi ba gya he Ugalili teng amen.”
33Ipita a kung de Ujeso le, “Ma abe be teng puu be buu tyang-a ọ, mi ba tyang-a ye.”
34Ujeso a ha kung de Ipita le, “Kigyang-kigyang mi da-a le, kusu ahwu kunyin i, nyin wo swan kugbe kakie le wo ngye-m ye ma ukpọng kigia ukwuo ki ha ko.”
35Ipita a tem le shi de-e le, “Mi ha ndu swan le mi ngya a ye ye. Ma ki yi le lihwu ọ, mi hwa utung ha awo.” Bendema puu be ma kọng kitaa ken.
Ugesemeni
(Mak 14:32-42; Luk 22:39-46)
36Ujeso a ma te le bendi-utung bema gye he kiteng ashi be ko le Ugesemeni. A de be le be kwu nyọng he, he u die gye he kushu le kọng ha Unim. 37A waa kung Ipita le bebwaa Uzebedi abe befee te le be utung ha kuhwo-ma. A fel le kutọ le kimbwee kaang. 38A kung de bendi-utung bema abe bekie ana le, “Kutọ ku yi-m he lityam ku dyam kpe ahwu le ku gwa-m. Ma kwu nyin he men ma kang le mi.”
39Ufe-gyang a mbee die te he kushu le tim anung he itang keb akọng-ale ha Unim le, “Atyagi, gbe ki yi-a pie-pie, kung kingie ashin le ha ami. Ki shi na mi kee a ye, ukpọ ki shi na wo kee a.”
40A tem le hwaa le bendi-utung bema bemen abe bekie. A nde be be mbwa kunde. A kung bii Ipita le, “Ki shi na a ma mbu kunde nyọng ma be kang le mi he kanwaa kunyọng zang ọ mbee ye? 41Ma kwu le kakang, ma kọng ha Unim teng ma mbwa he ugil-ale. Kunyọng ku yi le kigyọ, ukpọ agwo a yi dyung-dyung.”
42A mbee tem le kọng ha Unim he kugbe lefee le, “Atyagi, gbe ki yi pie-pie le wo kpe kung ugba-ala angwun le he ami ye, ki shi kpe-kpe le mi ngwee, shi na ki kee he ugim ugang.”
43Ujeso a ha mbee tem le nde bendi-utung bema ana be mbee tem fel he kunde. Atọng-shi abel a ma sho le kunde. 44A tyang abe, tem gye he kiteng ashi ha, mbee le kọng ha Unim kugbe ahwu lekie kitaa ken.
45A ha tem item le hwaa le bendi-utung bema, a bii abe le, “Ma so kunde ambwole a? Ma nde kunyọng ku fel ha ahwu be kung imi Unwaa undi-gye, fe bendi-biban he abwo. 46Ma bo li gye! Nde undi angwu a ndyeb mi zi u be i.”
Be kwu Ujeso
(Mak 14:43-50; Luk 22:47-53; Jọn 18:3-12)
47Nya ana Ujeso a ma so-i kọng ashin, Ujudas angwu a ma yi he liwu bendi-utung Ujeso lihwo le be befee, a be. Bendi gbam be be utung he ahe le lishwia le ikwan he abwo. Bekandi bishang Unim le abe he kubọng na be sọm abe. 48Undi angwu a ndyeb he zi ha abe a ke be kitaa le ha. A de be le, “Undi angwu nyin mi gaa he, ma kwu-e.” 49Ujudas a be gbe le hwaa le Ujeso de-e le, “Itisha ukandi, mi kọng le wo.” U gaa he.
50Ujeso a kung de-e le, “Udimgi, shi ashi ki be le wo.”
Bendi be ma be le hel be kwu kung Ujeso, be kwu-e kaang. 51Undi ken angwu a ma yi utung ha Ujeso, a waa usukwagya le he kubọ kpi shia Ubọyi ken kutyung. Ubọyi umen be kpi shia he kutyung ana a maa sha Usu bekandi bishang Unim aki.
52Ujeso a de-e le, “Kung usukwagya ugang kil he kubọ. Undi angwu a gwu undi le usukwagya, be ba gwa he le usukwagya. 53Wo ngye le gbe mi bii Atyagi ukpel, u sọm idengel ima asisi-lisi asisi-lisi nya kukwo-kukwo le i be kpe-m kutyọng ye a? 54Gbe mi shi na, ha ashi be fee he kushia Unim le ki shi, ki tem ba sha ye.”
55Ujeso a kung bii liwu bendi abena le, “Mi yi undi ukaa-ukaa a, ma be le ma kwa-m le lishwia le ikwan he abwo a? Mi maa kwa utung ha amen he Ushọm Unim hwọ bendi mbee ati, ukpọ ma kwu-m ye. 56Biwọm puu abi bi shi ki fe sho nya ana bitye-ugie kisọm Unim be fee ndọ he kushia Unim le-iti a.” Bendi-utung bema puu be paa he abwo tyang he.
Ujeso he kushu Isanhendrin
(Mak 14:53-65; Luk 22:54-55, 63-71; Jọn 18:13-14, 19-24)
57Bendi abena be kwu Ujeso gye le he he ushọm Ukaifas, Usu bekandi bishang Unim. Bitisha Iten le bekandi kubọng be ma yi sho ha. 58Ipita a fel tan pwọm Ujeso le he item kigbe-kigbe. A pwọm he le wu ha he usha-ale Usu bekandi bishang Unim ana. A le fel bel ndyeb ha bendi abe be kang usha-ale umen ana le he u nde umbee-likel likọng limen gbe le Ujeso i.
59Bekandi bishang Unim le bikem ukoto puu be kee kikwu kubwo ashi ki yi kigyang a ye fe Ujeso he be gwu-e. 60Ukpọ be ma nde ye, ma na ishada iman gbam be ma be naa kọng fe-e ọ.
He umbee-likel bendi befee be ha bo kinaa, 61de le, “Undi umen ana a de le ufe u yi le ikeb le u gyeb Ushọm Unim wa he itang, u tem le he tya puu he ati akie.”
62Usu bekandi bishang Unim a bo kinaa bii Ujeso le, “Biwọm abi bendi aben be kọng fa-a i, wo yi le ashi wo fan ye a?” 63Ukpọ Ujeso a kwu kpii.
Usu bekandi bishang Unim a de-e le, “Tam he lizen Unim angwu u yi uwum de li kigyang-kigyang le wo yi Ukristi, Unwaa Unim a”
64Ujeso a ha fan he le, “Ki yi na wo kọng. Mi ufe mi da amen puu le, kung le he kunyọng ahwun gye kushu ma ba nda Unwaa undi-gye, kwa he kubwo lizen Unim angwu u yi le ikeb puu. Ma mbee ba nda-m he kunyọng ahwu mi be tem le he bibu he lifung-atabe.”#26:64 Agyam 110:1; Udaniel 7:13
65Usu bekandi bishang Unim ana a fel he ingyo shwa gie bigbọ bima, a de le, “A kọng bia Unim, kibang li mbee kee ushada ususo? Ma nde, ma tọ gyo na a kọng bia Unim. 66Men ma gim le ana?”
Be fan he le, a zi libi be gwu-e.
67Be fel shwa akung wa he kushu, be tim he bishwia. Besuso be kpam he abwo he anaa 68be de-e le, “Bun de li wo undi-likpan, ayang a kpam-a?”
Ipita a swan Ujeso
(Mak 14:66-72; Luk 22:56-62; Jọn 18:15-18, 25-27)
69Ipita a ma so kwu ha he kudyan usha-ale. Unwaa-asul angwu u shi aki ha a nde Ipita, a de-e le, “Wo ọ titi, wo ma yi utung ha Ujeso angwu u be le he Ugalili.”
70He ashi bendi puu, Ipita a swan de le, “Mi ngye ashi wo kọng ana ye.”
71Ipita a gbe le ha gye he ungwu-likọng. Unwaa-asul ken angwu a maa shi ukandi umen ana aki a mbee nde Ipita, u de bendi abe be yi ha le, “Ungikye angwun a maa tan utung ha Ujeso angwu Unazaret.”
72Ipita a mbee swan tam behwu de-e le gbe ukọng-ukọng a be ngye ungikye umen ana ọ ye gbang.
73He kanwaa kunyọng zang bendi abe be ma yi naa ha he ungwu-likọng be de Ipita le, “Ki shi na ana, wo yi undi-utung ungikye angwun a. Igie igang ọ i tyung le wo yi undi-utung uma.”
74Ipita a kpam abwo he itang tam behwu le, “Unim a ngye le mi ngye angwu ma kọng ana ye.”
Nya kukwo-kukwo kigia ukwuo ki kung ko. 75Ipita a ma wel igie angi Ujeso a ma de-e le nyin u swan kugbe kakie le a ngye-e ye, ma ukpọng kigia ukwuo ki ha ko. A kung gbe le ha le kii kaang.
Currently Selected:
Umatiu 26: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
