Umatiu 17
17
Ugie-ale he ashi
(Mak 9:2-13; Luk 9:28-36)
1Ati a gbe adyọng-ken Ujeso a kpe Ipita le Ujems le unwaa-nde Ujọn gye le be he lishi ukwel he befe-befe be le kwu ha. 2Be le wu ha, Ujeso a gie he ashi abel. Kushu kuma ku gie, u fel taa na libwee. Bigbọ bima bi fel bifung-bifung kpela-dadada na kinde. 3Bendi-utung Ujeso be nde Umosis befe le Elaija be fem ha, be kọng ha Ujeso.
4Ipita a ha kung de Ujeso le, “Ada, kiteng ashin ki ngbeb ashi li ngyọ kwu i. Gbe ki ngbeb-a, tyang li li kaa bebuu bekie, kugang ken, Umosis ken, Elaija ken.”
5Nya ana Ipita a maa so-i kọng ashina, kibu ashi ki taa ki ma be shi abe a kpem, be gyo lingbam le ha kibu ana le, “Angwun na u yi kiken Unwa-agi. Ki nyin mi le he kindee-kindee. Ma gyo he.”
6He kunyọng ahwu bendi-utung Ujeso be gyo lingbam limen ana, be ma fel le kushel kaang, be mbu le ashi abel shi fe he itang. 7Ukpọ Ujeso a ha be hwaa le be, u tyọ abe kubwo de be le, “Ma shel ye, ma bo kinaa.” 8Be bo kinaa bel ashi shun kel-kel, be tem nde undi ususo pwọm pel ha Ujeso ye.
9Nya ana be maa shul ukwel be he kutan, Ujeso a tye be uten le, “Ma de undi kiwọm ashi ma nde ye kpam Unwaa Undi-gye, a gbe hwo wum.”
10Bendi-utung bema be kung bii he le, “Kibang ki yi atan-lengi nyọng bitisha Iten be de le Elaija na ki yi kpe-kpe le u ba ba kushu?”
11Ujeso a fan abe le, “Ki ma yi kpe-kpe le Elaija u be kushu kigyang he u kam biwọm puu. 12Ukpọ mi de men le, Elaija a tọ be ma. Bendi be shi-e kitaa be kee likọye be shob he ye. Kitaa kimen i na bendi be be shi-m, mi Unwaa undi-gye mi kpe kingie he abwo abel.” 13Bendi-utung bema be ha nde shob le u kọng gba le Ujọn angwu u maa wu bendi umbwo a.
Ujeso a mbee unwa-ani ungikye angwu ikeb ibibi i ma yi he ahe
(Mak 9:14-29; Luk 9:37-43a)
14Ujeso le bendi-utung bema be ma tem be hwaa le liwu bendi. Ungikye ususo a be tim anung he kushu Ujeso, 15u de-e le, “Ada, beshi be sha-a le unwa-agi ungikye angwu u mbu kishin. He kunyọng ahwu ki kwu-e, kunyọng kususo ki sha he u mbwa fa he kinde, kunyọng kususo ki kung he fe he umbwo. 16Mi ma be le he hwaa le bendi-utung begang, be mbee he mbee ye.”
17Ujeso a kung fan le, “Men ugbe angwu ma faale abọng-ale ma shi liketye, mi ba kwa utung ha amen le kigbe na a, ma ha fe lityam ha ami? Ma kee le mi ngib lityam le men kigbe na a?” A ha de-e le, “Ma be le unwaa umen ana hwaa le mi.” 18Ujeso a kung gaa fe ikeb ibibi ana. I fem le ha unwaa umen ana, a mbee nya he abwo-abwo.
19Bendi-utung Ujeso be ha te le bii he he kundyel le, “Kibang a, bel li ndo ikeb ibibi ana mbee ye?”
20Ujeso a fan abe le, “Atan-lengi uma u yi le, abọng-ale amen a zen. Kigyang-kigyang mi de men le, ki nya yi le abọng-ale amen he ami a zen na utọng ukwan umọstad ọ, hang ma da ukwel le u kwuo, u kwuo, hang ma sha biwọm puu mbee. [ 21Kiwọm ashi ki kee-kee ke undi-gye ikeb le u ndo ikeb ibibi angi kitaa i ki yi akọng-ale ha Unim le itung ando-ale a.]”
Ujeso a mbee kọng gbe le lihwu lima
(Mak 9:30-32; Luk 9:43b-45)
22Nya ana Ujeso befe le bendi-utung bema be maa so-i tan he Ugalili, Ujeso a ma de be le, “Kunyọng ku ndu fel ha ahwu undi u be kwu-m, mi Unwaa undi-gye, fe bendi-gye he abwo. 23Be ba gwa-m, ukpọ mi ba tem wum le he lihwu he liti angi lekie.” Bendi-utung bema be ma fel le kimbwee kaang.
Ukpanda ushọm Unim
24Ujeso befe le bendi-utung bema be le wu he Ukapanum wuwu, bendi abe be maa tan kpe unde ushọm Unim angwu he Ujeruselem be le bii Ipita le, “Ukandi umen u tya ukpanda ushọm Unim a?”
25Ipita a bọng le u tya.
Ipita a ha te le hwaa le Ujeso he ushọm. Ujeso a kpi-kikwu bii Ipita le, “Kibang ashi wo gim gbe le ukpanda atyele? Besu be kpa ukpanda le ha ayang? Be kpa he le ha be-gyang kubọng a, ha begaa-ndi a?”
26Ipita a kung de-e le, begaa-ndi na ki yi le be tye ukpanda.
Ujeso a ha kọng le, “Ashin ki ze le be-gyang kubọng be tya ye. 27Le gbe bel ufe, li kee le li sha ashi ki shi abe be mbu linaa ha abel ye, wo gye he kidyeshọ le tyang ukwugya. Ukpi-kikwu ukwan angwu wo kwu, buu he ungwu, fem unde le ha angwu u kpe tye ukpanda he lishi ligi le angi limen.”
Currently Selected:
Umatiu 17: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
