Aki 7
7
Igie angi Ustiven a ma kọng ha Isanhendrin
1Usu bekandi bishang Unim a bii he le, “Biwọm abi be kọng fa i nyin, bi yi kigyang a?”
2Ustiven a kung fan le, “Betyagi le bebuye, ma dang kutyung gyo mi. He kunyọng ahwu atya-tyan Ebraham a ma so nde he Umesopotamia ma ukpọng u ha le nde he kubọng ahwu be ko le Uharan, Unim ifem angwu lifee a be hwaa le he. 3A de-e le ‘u bo tyang kikwu-lihwan kima le kubọng kuma gye he kubọng ahwu u le tyung he.’#7:3 Ukpi-kikwu 12:1
4“Ebraham a kung bo le he Ukaldia le nde he Uharan. A kwu ha kpam atyam a gbe hwo. Unim a ha de-e le u be nde he kipi men ma fel nde kunyin i. 5Unim a ma wa gem ashi zang ọ ke-e le ki kwu kima kigyang ye. Unim a ma ke-e ukyeb le u ba kung ashi ka he. A ma mbee de-e le, kipi kimen i ki ba kwa kima le igia ima a. He kunyọng ahwu Unim a ma ke-e ukyeb umen i a ma wa yi le unwaa ye. 6Unim a ma de-e le ‘Igia igang i ba la nda he kubọng bendi. Be ba fel ifee a ha. Be ba kpa kingie aze asi lisi. 7Unim a de le mi ba kung kingie ka bendi abe be be shi igia igang lifee, saa be ha be le ha kubọng kumen ana be fem he kiteng ashin.’#7:7 Ukpi-kikwu 15:14; Ligye 3:12 8Unim a ha de Ebraham le, u ten bebwaa-ma abe bengikye he ki tyung kitaa azu angi u yi le ngi ha abe. Ebraham a hwan Azik. A ten he he liti angi ledyọng-ikie na be hwan he. Azik a ten unwaama, Ujekọb. Ujekọb a ten bebwaa-ma lihwo le be befee abe be yi betie-tyan.
9“Bebwaa-nam Ujosef be maa bung he ashi. Be kwu-e ndyeb zi na ufee gye he Igypt. Ukpọ Unim a ma yi utung he ahe, 10a kpe-e tyang le he bingie puu. Unim a shi Ujosef a shi nyin Ufero, Usu Igypt, a mbee ke Ujosef lishi-abyele. Ufero a kung kubọng Igypt puu le kikwu-lihwan kima ke Ujosef le u kwu ukandi.
11“Ubwaa a ma be kwu kaang. Bendi abe he kubọng Igypt le abe he Ukenan be ma kpe kingie kaang. Betie-tyan be ma nda lizi za ye. 12He kunyọng ahwu Ujekọb a gyo le lizi li yi he Igypt, a sọm bebwaa-ma abe be yi betie-tyan le be le ndyeb be le ngi. 13Be te kugbe ahwu lefee, Ujosef a de be le, u yi unwaa-ndabel a. U mbee shi Ufero u ngye kikwu-lihwan ki ma. 14Ujosef a sọm ko atyam Ujekọb, le bendi bema puu le be be he Igypt. Puu ubel be ma yi bendi asi akie le bendi lihwo le be be-dyọng. 15Ujekọb a gye he Igypt. Ha na befe le bebwaa-ma be nde kpam betie-tyan be gbe hwo. 16Be tem le akwọm abel gye he Ushekem le ngi he kipi Ebraham a ma ndyeb le ha bebwaa Uhamọ le unde.
17“He kunyọng ahwu ki ma fel kpee-kpee le Unim u ndu fa shwa ukyeb uma angwu a ma ke Ebraham, betie-tyan abe be ma yi he Igypt be ma fel go kugii kaang. 18Ki ma yi le kunyọng ahwu usu ufufe a ma fel usu Igypt angwu ki ma gbee he gbe le Ujosef ye.#7:18 Ligye 1:8 19A maa fel sha betie-tyan bitete, u mbee ban lityam ha abe. A maa kwa abe he ikeb le be tyang bebwaa-bel le hel he be hwo.
20“Ha he kunyọng kumen ana na be ma hwan Umosis. A ma yi unwaa tata a. Bendi bema be kwob he a fel akie. 21Be ha te le he le ndọ he ungwu lishọ. Unwaa Ufero ungingye a ma le nde-e, kung he gye le he le kwob le a fel unwaama. 22Be hwọ he biwọm puu abi bendi Igypt abe be bilishi be ngye. A fel undi ukandi he lishi likọng ọ, aki ashele ọ.
23“He kunyọng ahwu Umosis a ma fel aze asi afee, a ma shi ugim le u la kọng le bebwaa-nde Izwel. 24A le nde undi Igypt ken u ndo ha undi Izwel. A le kpel he, kwu angwu Igypt gwu. 25A maa kọng le bebwaa-nde be nda shob le Unim na a sọm he le u le kpan abe, ukpọ be ma nde shob ye. 26Fem taa ashi, a nde bendi Izwel befee be ndo ha bende, a le kwu abe abwo. A de be le, ‘Ma yi bebwaa-nam bende a. Ki shi na a, ma kam le ma do bende?’
27“Ukpọ angwu a ma shi kibibi ha undema, a nyii he gye he ufaa, bii he le, ‘Ayang a kwa-a usu le wo tang ushe utyan? 28Ki yi a le wo gwu-m na uhwu-hwo wo ma gwu angwu Igypt a?’#7:28 Ligye 2:14 29Nyọng Umosis a gyo ashin, a ma buu gye he kubọng Umidian he kipi a ma le kwu na ugaa-ndi. A hwan bebwaa ha befee.
30“Aze asi afee a gbe, He liti ken Umosis a ma yi he Udezat, itang kukwọm gwaa le ukwel angwu be ko le Usanai. Udengel Unim a fem tyung Umosis le ha umọ-kinde he ukwan angwu u yi le bidang angwu u ma shi he ugbaa-libeb. 31Umosis a nde shi, ki kwu-e he kuhwo kaang. A die te he u le nde shi kinunung. A gyo lingbam Ada Unim le ha le, 32‘Mi yi Unim betiegang a. Mi yi Unim Ebraham, Azik le Ujekọb.’#7:32 Ligye 3:6 Umosis a fel he kushel, u fel tung akpakpa. A tem kaa ọ le u bel ashi nda ye.
33“Ada Unim a kung de-e le, ‘Waa ikwob le he abee agang likọye he kipi wo na ana, ki yi kiteng katia a. 34Kigyang-kigyang mi nde kingie ashi bendi begi be kpe he Igypt. Mi gyo kukye kubel. Mi be le mi kpan abe. Be kanaa-anaa i, mi tem le wo sọm gye he Igypt.’#7:34 Ligye 3:5, 7, 8, 10
35“Umosis umen i na bendi Izwel be ma mọ he, be bi he le, ‘Ayang a kwa-a usu le utang-ushe utyan?’ Ufe na Unim a ma sọm udengel angwu a ma kọng he ahe le he libeb angi li ma mọ kinde, hwaa le he le u kwu usu ubel le undi-likpan ubel. 36A ma shi bikwole-kuhwo abi bi tyung ikeb Unim he Igypt le he umbwo ukandi angwu be ko le Umbwo Ubwaa le he ugbaa-libeb aze asi afee, he kunyọng ahwu a ma be le bendi le he Igypt.
37“Umosis umen i na a ma de bendi Izwel le, ‘Unim u ba kung utye-ugie kisọm kima na mi le he liwu limen gya he kusi.’#7:37 Iten lefee 18:15, 18-19 38Ufe na a ma yi utung ha bendi Izwel he kipi be ma gbọng liwu he ugbaa-libeb. A ma yi utung ha udengel angwu a ma kọng he ahe he ukwel Usanai, u mbee shi utung ha betie-tyan. A ma kpe kisọm le ha Unim ke li, ashi ki tyung li na li kpe likpan.
39“Betie-tyan be ma ke-e ife ye. Be bel le he ahe fel kee le tyang be tem gye he Igypt a. 40He kunyọng ahwu Umosis a ma yi he ukwel kusi be de Erọn le, ‘Shi li litelakpa angi li teng li. Li ngye ashi ki shi Umosis angwu abe le bel le he Igypt ye.’#7:40 Ligye 32:1, 23 41He kunyọng kumen ana be shi katelakpa bi unwaa kigundu, be fel shang ake. Be shi kipam, be gọ igọ he kiwọm ashi befe-gyang be shi. 42Unim a gbe le ha abe, u tyang abe le be ndu fe libwee, kufel le ikpen. Ashin ki shi kee ha a shi be ma fee he kushia bitye-ugie kisọm Unim le,
“ ‘Men bendi Izwel,
ma ma gwa bitwole shang imi a he ugbaa-libeb aze asi afee a?
43Ma fel kung kubuu Umolek
le ikpen Unim umen Urefan,
inim angi ma shi le ma fe a.
He atan-lengi angwun mi ba ndo amen gba gyọng Ubabilọn.’ ”#7:43 Emọs 5:25-27
44“Betie-tyan be ma yi le kubuu ahwu be ma ndọ kakpa Iten Unim, ahwu ku tyung le Unim a ma yi utung ha abe ha he ugbaa-libeb. Be ma shi ahwu nya ana Unim a ma tyung Umosis le u shi. 45Aze a gbe gbam, betie-tyan be kung kubuu kumen i ke igia ibel. Igia ibel i kung ahwu gye le wu he kunyọng ahwu Ujoshwa a ma teng abe le be be kpe itang angi Unim a ndeb le abọng angi a ma yi ha, kung itang imen ana ke be. Kubuu kumen ana ku ma ngyọ kwu ha kpam le kwọm he kunyọng ahwu Udebid a ma fel usu. 46Udebid a ma shi nyin Unim. A ma de Unim angwu u yi Unim Ujekọb le u ke-e ikeb he u tye-e ushọm. 47Ukpọ unwaama Usolomọn na a ma tye-e.
48“Unim angwu a dyam u kwa he ushọm angwu undi-gye a tye a ye. Ada Unim a kọng gbe ha utye-ugie kisọm kima le,
49“ ‘Lifung-atabe li yi kidem kusu kigi,
igye anyin i yi kidem ashi mi pwọm abee a.
Kibang kitaa ushọm ashi wo nya tye-m?
Mi ba shan kunyọng he kung a?
50Migyang na mi shi biwọm bimen i puu ye a?’ ”#7:50 Azaya 66:1, 2
51Ustiven a gye kushu kọng le, “Ma kpo lishi, ma teb atyam, ma shi le kutyung kigyo igie Unim ye. Ma yi nya ana betie-men a. Ma swan fa Ukatia Kunyọng mbee kunyọng. 52Ki nya yi le utye-ugie kisọm Unim ken ọ angwu betie-men be ma mọ atebale le he ye a? Be gwu gwu fe le bebwaa-kisọm Unim abe be ma kọng le-iti le Unwaama ununung u ba ba. A be, ma ndyeb he zi, ma gwu-e. 53Men na ma kpe Iten angi Unim a ma ke gbe ha idengel ima, ukpọ ma ndọ angi ye.”
Be maa Ustiven akọ
54Bekandi Ijuus be gyo ashin, ki nyung abe lityam, be zi he ungwu bul-bul fe-e. 55Ustiven angwu a ma sho le ikeb Ukatia Kunyọng kaang, a kung ashi gye he lifung-atabe, a nde ifem Unim, u nde Ujeso u yi naa he kubwo lizen Unim. 56A de le, ma nde, “Mi nde lifung-atabe li buu. Unwaa undi-gye u yi naa he kubwo lizen Unim.”
57He ashin be shi abwo abel he atyung, be gie he ungwu kaang le akye linaa-linaa hwaa le he, 58suu gbe le he le he afee kubọng, be tyuu he akọ ama-ale. Ishada i waa aliga abel ndọ he abee ushọmate ken angwu be maa ko le Usọl.
59Nya ana be maa maa Ustiven akọ, a ma kọng le, “Ada Ujeso, kung kunyọng kugi.” 60A mbu le anung tim he itang, kii kung lingbam kusi le, “Ada, shi bo kiban ashin fe be ye.” Nyọng a kọng ashin kọng-kọng, a hwo.
Currently Selected:
Aki 7: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
