Aki 20
20
Gye he Umasedonia le Igrik
1Linaa anyin li mbee puu, Upọl a ha ko bendi abọng-ale be he kiteng ken. A fe be ingie, u de be le, “Ishu i so.” A gbe ndo he Umasedonia. 2A le tan mbee bipi ha he kigie kimen ana bun biwọm ingie de bendi, a ha le wu he Igris. 3A gye he Akaya le kwu ha afel akie. He kunyọng ahwu a ma kam le u gya he kubọng Usiria, a gyo le Ijuus i kam le i gwa he; a shi ugim le u fel la gba he Umasedonia a, gya he Ufilipai. 4Usopata, unwaa Upailus angwu a maa be le he Uberia, a te utung he ahe. Aristakus befe le Usekundus abe be be le he Utesalonika, le Ugayus angwu u be le he Udebe le Utaikikus befe le Utrofimus abe be be le he Eshia be te utung he ahe le Utimoti. 5Be le wu he Ufilipai he kipi, mi Uluk, mi ma yi. Puu ubel be ma gbe kushu le kwu he Utrowas nyọng li. 6Nyọng be mbee le kipam ibred angi i mbwee ye, li ha ngwee kinọng lishọ le he Ufilipai pwọm abe gye ha he Utrowas. Li wu ha he liti ledyọng. Li ngyọ kwu ha ati adyọng-ifee.
Upọl a wum Uyutikus le he lihwu
7He ukpi-kikwu liti utyọng le likwu-lukwu, li le kpee he kiteng ken he li bun ibred zi, li wel gbe le lihwu Atya-tyan Ujeso nyọng li zi lizi abwo he ukem. Upọl a kọng ha bendi kpam le wu he kididyan kusu le ugim le ashi a taa u gba le ha. 8Bimọ-kinde bi ma yi ha he ushọm kusi he kipi li ma yi kwu. 9Ushọmate ususo a ma yi ha, be ko le Uyitikus. A ma yi kwu he uwindul. Le gbe Upọl a kọng ha bendi gbe kigbe, Uyutikus a mbu kunde. Kunde ku shi-e a mbu le ha he ushọm kusi angwu lekie be he itang. Be le kung he, a fel likwọm a. 10Upọl a shul gye ha le mbu kpo he, u mam kwu-e. A de abe be sho ha le, “Ufung u be men ye. A tem wum.” 11A tem mbo gye he ushọm kusi le bun ibred zi. A kọng ha abe kpam ashi a gbe taa. A ha gbe le ha. 12Bendi be gbe le ushọmate angwu a ma mbu le he uwindul ana uwum gye le he he ushu. Be ma yi le igọ kaang.
Upọl a de bekandi Efesọs le ki fel mbee ati
13Li ma gbe le ngwee kinọng lishọ gye he Asos le li la kung Upọl. A de li le li le kwu ha nyọng he likọye ufe u tan ha abee a gya ha. 14A be tel li he Asos. Li kpe-e gye le he he Umitylene. 15He liti angi lefee li ngwee kinọng lishọ gbe le ha gye he Ukios. Ki zi liti ken, li kung be he Usamọs. Ashi a mbee taa, li wu he Umiletus. 16Upọl a shi ugim le u la ngwee kinọng lishọ ọ gba he Efesọs teng u la ban kunyọng ha he Eshia. A maa buu he u nde le u wa he Ujeruselem he liti kipam Upentikọs a.
17Upọl a sọm kisọm le he Umiletus gye he Efesọs le bekandi bendi abọng-ale be be hwaa le he. 18Nyọng be be, A de be le, “Ma ngye na mi shi aki le kunyọng kugi kung le ha he ukpi-kikwu liti angi mi ma be he Eshia. 19Mi shi aki Ada le kuhwo ambwole le akye he ashi le bingie abi mi ma kpe le gbe bendi Ijuus be kam le be gwa-m. 20Ma ngye le mi ma mọ amen adele kiwọm kiyang-yang ashi mi ngye le ki kwa le lifem ka amen ye. Mi bun igie Unim de men, mi hwọ amen he udyeshi ọ, he ishaale imen ọ. 21Mi bun de Ijuus ọ, Igrik ọ, le be bel le he biban hwaa le Unim, be bọng ha Ada Ujeso.
22“Kanaa-anaa i mi ndu ka Ukatia Kunyọng ife gya he Ujeruselem. Mi ha ngye kiwọm ashi ki be shi-m ha ọ ye. 23Ashi mi kee-kee ngye ki yi le kubọng kuyang-ayang ahwu mi gye, Ukatia Kunyọng u da-m le mi ba gya igaadye, mi kpe bingie ha. 24Mi kung likpan ligi he kukpo ye gbang, mi kee-kee kee le mi mbee aki angi Ada Ujeso a kung ke-m le mi shi. Aki angi ha a yi le mi bun kisọm kinunung gbe le inung angi Unim a tyung li gbe ha Ujeso.
25“Mi ma tan mbee kubọng kumen bun gba le kiteng kusu Unim. Kanaa-anaa i mi ngye le ma tem ba nda-m ye. 26He atan-lengi angwun mi da amen kunyin i le gbe undi ken ọ a waa nim le he liwu limen, ha uben anung ama u tem yi ugi a ye. 27Mi mọ le mi da men gba le ugim Unim puu ye. 28Ma kwu le kakang le bendi puu abe Ukatia Kunyọng a ke men. Ma kwu bikang-itia liwu bendi abọng-ale angi a ndyeb le anung ama. 29Mi ngye le nyọng mi be gbe le nyin, bendi-ilam be ba ba he liwu limen, he be be lam amen ma tyang abọng-ale. Be yi nya ana betang abe be gwu itia a. 30Kunyọng ku mbee ba le ha ahwu bendi besuso le ha amen liwu be be be iman he be shi bendi abọng-ale be bel fel pwọm abe befe a. 31Ma kwu le kakang. Ma wel le mi hwọ amen le akye he ashi mbee kunyọng kpam le wu aze akie.
32“Kanaa-anaa i mi kung amen fe Unim le igie inung ima he kubwo. U yi le ikeb le u sha ma naa gen, u ke men kukwun ahwu a ndọ ke bendi puu abe be yi tata 33Mi bel isiliba le igold undi ọ, ngwu mi bel inditen undi ọ ye. 34Men-agyang ma ngye le aki angi migyang mi shi le abwo agi na a fọ igben ityan, mi le bendi-utung begi. 35Mi tyung amen gbe he biwọm puu abi mi shi le gbe he ashele aki kitaa i li kpel bendi abe be yi le ukpel ke kuhwobel ye. Li wel igie angi Ada Ujeso ugyang a kọng le, ‘Igọ i ba le he kiwọm akele hwa akpele.’ ”
36Upọl a kọng puu, a ha tim anung he itang kọng ha Unim utung ha abe puu. 37Puu ubel be ma kya nya ana be ma gaa he le uko le uko le u ndu gya. 38Igie angi a ma de be le be tem ba nda he ye na i ma ban abe kaang. Be teng he le wu he kipi u ngwee kinọng lishọ.
Currently Selected:
Aki 20: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
