Aki 12
12
Kikwole-kuhwo ahwa-ale Ipita le he igaadye
1Nyin he kunyọng kumen i Usu Uherọd a ma kwu bendi besuso abe be ma yi he liwu bendi abọng-ale, le ugim le u ke be kingie. 2A kọng, be gwu Ujems unwaa-nam Ujọn le usukwagya. 3A ma nde le ki nyin Ijuus, a mbee kọng, be kwu Ipita ọ. Ashin ki shi he kunyọng ahwu be maa shi kipam ashi be zi ibred angi i mbwee ye a. 4Be kwu Ipita le fe he igaadye. Be ma sọm ishogya lihwo le ngi idyọng-iken le i le kang he, he bende-bende. Uherọd a gim le gbe kipam Agbele-gyọng ki mbee, u ba le he ka Ijuus.
5Ha he kunyọng ahwu Ipita a ma yi he igaadye, bendi abọng-ale be maa kọng ha Unim kaang ka he.
6He kusu ahwu ki ma yi le ashi a taa Uherọd u ba le he be maa he ushe, Ipita a ma mbu kunde nde he kudyan ishogya ifee. Be ma fee ashishi-likaa afee, ishogya i shi he ungwu-likọng i kang. 7Nya imbul-imbul Udengel Ada Unim a fem he afee igaadye, kikung-gboo ki taa. A kem Ipita kubwo he ufaa, wum he le he kunde. A kung de-e le, “Bo kinaa akikye!” Ashishi-likaa a wung he le he bityung abwo.
8Udengel a de-e le, “Kung bigbọ bigang shi, kung ikwob igang fe he abee, pwọm mi.” 9Ipita a gbe le ha igaadye utung ha udengel, ukpọ a ma ngye le ashi ki ma shi ana ki ma yi kigyang a ye, a maa kọng le itam na i maa shi-e. 10Be gbe ukpi-kikwu likwu ishogya angi i kang igaadye, be gbe angi lefee. He umbee-likel be be fel he ungwu-likọng angwu be shi le binde angwu be gbe gye he lifung-ushu. Lishi limen ana li buu le kuhwo-ngi, be gbe tang he igye. Be le fel he kukwo fel-fel, udengel ana a nyọng gbe tyang Ipita.
11Ki kung buu Ipita, a ha ngye kiwọm ashi ki shi. A kung kọng le, “Kanaa-anaa i, mi ngye dang le Ada Unim na a sọm udengel uma le u be kpan mi le he abwo Uherọd, u kpan mi le he biwọm abi Ijuus i ma gim le bi ba sha-m.”
12He kunyọng ahwu ki nung he, a gbe gye he ushọm Umeri angwu u yi anam Ujọn angwu be mbee ko le Umak, bendi abọng-ale gbam be ma yi sho ha, be kọng ha Unim. 13Ipita a be kem abwo he lishi angi le he igye, unwaa-ushọm angwu be maa ko le Uroda a be fan he. 14Nyọng a ma shob igie Ipita, a fel le igọ, a tem buu lishi ọ ye, a buu tem le de abe be teng le Ipita u yi naa he ungwu-lishi.
15Be de-e le, “Ki sha he lishi.” A de be le u kọng kigyang a. Gyo abe le, “Ufe a ye, udengel Unim angwu u nde gbe le he a.”
16Ipita u yi kem abwo he lishi. Be ha buu lishi nde-e, ki kwu abe he kuhwo kaang. 17A yọ abwo de be le be kwun atyung, u de be na Ada Unim a fem he le he igaadye. A de be le, “Ma de Ujems le bendi abọng-ale abe be teng ọ gbe le ashin,” A ha gbe le ha gye he kiteng kisuso.
18Ashi a taa le-iti, kuteteb ku ma teb kaang he liwu ishogya gbe le ashi ki shi Ipita. 19Uherọd a de ishogya le be le shun he. Be le shun he, ukpọ be nde-e ye. Uherọd a de le be bii ishogya angi i kang igaadye bibibi. A ha de be le be gwu ishogya imen ana.
Lihwu Uherọd
Uherọd a gbe le he Ujudia le kwu he Usesaria. 20Uherọd a maa ngyua fa bendi Utaya le abe Usaidọn. Be be kpee he kiteng ken le be la nda usu. Be kpi-kikwu kpe kung Ublastus angwu a maa nde gbe le ushọm usu hwaa le kuhwobel, bendi abena be ha le hwaa le Usu Uherọd le be shi ikwun likọye kubọng kubel ku kpa lizi le he kubọng kuma a.
21He liti angi be ma ndọ, Uherọd a kung bigbọ kusu bima shi le kwu he kidem usu keb akọng-ale ha bendi. 22Be fel gaa kọng le, “undi-gye na u kọng i ye, Unim a.” 23Nya kukwo-kukwo, le gbe Uherọd a ma ke Ada Unim ipee ye, udengel Unim a ma tye-e lingbam, inyia i ma zi gwu-e.
24Ukpọ igie Unim i ma gye kushu kaa gyam abwo.
Be sọm Ubanabas befe le Usọl gye he igye
25Nyọng Ubanabas befe le Usọl be mbee aki abel, be tem le he Ujeruselem, be kpe Ujọn angwu be mbee ko le Umak fe utung ha abe gye he Antiyọk.
Currently Selected:
Aki 12: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
