Mak 2
2
1Ke ñkpọ nte usen ifañ ema ekebe, Jisọs ama afiak aka ke Kapanọm ndien etop edifiak ndi Esie ama asuana usọp usọp akanade ofuri obio. 2Ikebighike-bighi ufọk emi Enye okodude ama ọyọhọ ye isenowo tutu itie ikọduhọ aba inọ idem owo kiet efen, kpa ye ke idem inua otop itie ikọduhọ. Ndien enye ama ọkwọrọ ikọ ọnọ mmọ. 3Owo inañ emi ekebiomde ọdọñọ akpaubeñ ke ñkpana ema edisim. 4Mmọ ikekemeke ndisim Jisọs oto ke ntak otu owo, ke ntak oro mmọ ema ekubọde itie ke enyọñ ọkọm ufọk oro ke ukem ukem itie emi ibuot Jisọs akadade, ndien ema esuhọrede owo udọñọ oro ye ñkpana esie enim ke iso Jisọs.
5Ke ini Jisọs okokutde nte mmọ ekenimde ke akpanikọ nte ke Imọ imekeme ndinyaña, Enye ama ọdọhọ ọdọñọ akpaubeñ ete, “Eyen, emefen mme idiọkñkpọ fo!”
6Edi ndusuk mme andikpep ibet mme Ju, ema etie do enyuñ ebup idem mmọ ete; 7“Nso idi emi? Emi edi ndisabade Abasi! Mme enye ekere ete ke imọ idi Abasi? Koro edi Abasi ikpọñ ikpọñ ekeme ndifen mme idiọkñkpọ.”
8Jisọs ama ọdiọñọ ekikere esit mmọ ndien ama obup mmọ inikiet ete, “Nso idi ntak emi ñkpọ emi afinade mbufo?” 9Efe emem akan ndidọhọ akpaubeñ, “Emefen mme idiọkñkpọ fo” mme ndidọhọ nte, “Dahada ke enyọñ, men ñkpana fo ñnyuñ saña? 10Edi man mbufo efiọk ete ke Eyen owo enyene odudu ke isọñ ndifen mme idiọkñkpọ,” 11Enye ama ọdọhọ owo akpaubeñ emi ete, “Ami mmowuk fi, daha ke enyọñ, men ñkpana fo, nyuñ nyọñ ufọk fo, koro emenam udọñọ fo okure.”
12Owo emi ama adaha ke enyọñ inikiet, emen ñkpana esie onyuñ asaña ọwọrọ ke iso kpukpru owo. Idem ama akpa kpukpru owo ndien mmọ ema etoro Abasi enyuñ edọhọ ete, “Akananam ñnyin ikwe utọ ñkpọ emi.”
13Jisọs ama ọtọñọ ntak aka ke mben akpa. Ata akwa otu owo ema ebine Enye ndien Enye ama ọtọñọ ndikpep mmọ ñkpọ. 14Nte Enye akasañade ke mben inyañ, Enye ama okut Lefai, eyen Alfiọs nte etiede ke efe ubọ ataksi. Jisọs ama ọdọhọ enye ete “Tiene Mi”, ndien Lefai ama adaha ada onyuñ etiene Enye.
15Ke ini emi Jisọs akadiade udia mbubreyo ke ufọk Lefai, ediwak mme ọbọ ataksi ye mme anam idiọkñkpọ ema ebuana udia ye Enye ye mme mbet esie koro mme mmọ emi eketienede Enye ekewakde. 16Edi ke ini mme ekpep ibet emi ekedide mme Farisi ekekutde nte Enye adiade udia ye mme anam idiọkñkpọ ye mme ọbọ ataksi, mmọ ema ebup mme mbet Jisọs ete, “Nso idi ntak emi Enye adiade udia ye mme ọbọ ataksi ye mme anam idiọkñkpọ?”
17Ke ini Jisọs okokopde se mmọ eketiñde, Enye ama ọdọhọ mmọ ete, “Edi mbon udọñọ eyom abia ibọk, idighe mbon emi idem ọsọñde. Ami ñkedighe ndidọhọ mme nti owo ekabade esit, edi, ndi man mme anam idiọk ekabade esit.”
Owo Emi Otode Obio Abasi
18Mme mbet Jọn ye mme Farisi ema etre udia inikiet, do ke mme owo ekedibup Jisọs ete, “Nso idi ntak emi mme mbet Jọn ye eke mme Farisi esitrede udia edi mbet fo itreke?” 19Jisọs ama ọbọrọ mmọ ete, “Nte mme ufan ebe ndọ ekeme nditre ndidia udia ke ini ebe ndo anamde usọrọ ndo? Nte mmọ ekpefefuhọ ke ini emi enye osuk odude ye mmọ? 20Edi ini eyedi emi edimende ebe ndọ ikpọñ mmọ, ndien ke usen oro, mmọ eyetre udia. 21Ke ebede oro, utreudia edi akani ido usuñ unam ñkpọ kiet. Etie nte owo ndida obufa nsọñurua ọfọñ ñkim nsiri nde ntaha akani ọfọñ. Nso iditibe? Obufa ọfọñ eyefiak oduri akani ọfọñ awak ndien anam ọfọñ oro ọdiọk akan nte enye ekedide. 22Owo baba kiet isinke obufa mmin ke akani ekpat ikpa unam usin mmin; edieke enye anamde ntre, mmin oro eyebom ekpat ikpa oro, ndien mmin ye ekpat ikpa unam eyetak. Baba! Obufa mmin oyom obufa ekpat ikpa unam.”
23Ini efen, ke usen Sabat kiet, nte Jisọs akasañade ye mme mbet Esie ebe ke iñwañ ibokpot, mme mbet Esie ema etọñọ ndibuñ ibokpot ñnyuñ mbek ñkpasip esie nta.
24Mme Farisi ema ebup Jisọs ete, “Nso idi ntak emi mmọ enamde se ebetdebet ke usen Sabat?”
25Edi Jisọs ama ọbọrọ mmọ ete, “nte akananam mbufo ikopke ibaña se Edidem Defid akanamde ke ini emi biọñ ọkọdọñde enye ye ikọt esie, mmọ ekenyuñ edude ke unana? 26Nte enye okodukde ke esit ufọk Abasi ke ini emi Abiata ekedide akwa oku, ndien ata mme ebok uyo uwa emi mme oku ikpọñ ekenyenede ndita, ye nte enye ọkọnọde mmọ emi ekedude ye enye mme ubak uyo emi?” 27Do ke enye ọkọdọhọ mmọ ete, “Ekenam Sabat enọ owo, ikanamke owo inọ Sabat 28Ke ntre, Eyen Owo edi Ọbọñ emi akarade Sabat.”
Currently Selected:
Mak 2: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
