Matiu 26
26
Etap Jisọs
1Ke ini Jisọs ama ekekure nditiñ mme ikọ emi, ye mme mbet Esie, Enye ama ọdọhọ mmọ, ete,
2“Nte mbufo ediọñọde ebaña, usọrọ ube inyañ eyetọñọ ke ñkpọ nte usen iba ke iso, ndien eyetap Eyen Owo eyak enọ ekọñ ke eto.”
3Kpasuk ke ukem ini oro mme ikpọ oku ye mme etubom mme Ju eken ema ekesobo ke ufọk Kaifas emi edide Akwa Oku. 4Ndien mmọ ediomi nte edisañade imum Jisọs ke ñkari usuñ inyuñ iwot Enye 5Edi mmọ ema edọhọ ete, yak okudi ke ini usọrọ, midighe ntre, ntime eyekpon ke otu mme owo eti eti.
6Ke ini Jisọs okodude ke Betani ke ufọk owo emi ediọñọde nte Saimọn ọdọñode akpamfia, 7ñwan kiet ama asaña ye ekpeme alabasta (enem utebe aran) emi ọsọñde urua eti eti, oduk etiene Enye, onyuñ ọtọhọ ọduọk Enye ke ibuot, ke itie udia.
8Ke ini mme mbet Esie ekekutde emi, ikenemke mmọ esit. Do mmọ ema ebup ete, “Nso uto edibiat ñkpọ idi emi?” 9“Ekeme ndikpanyam enem utebe aran emi ke ata ediwak okuk, enyuñ emen okuk oro enọ mme ubuene.”
10Jisọs ama ọfiọk se mmọ ekekerede, ndien Enye ama ọdọhọ mmọ ete, “Nsidi ntak emi mbufo efinade ñwan emi? Enye amanam ediye ñkpọ ye Ami. 11Mbufo eyesuk enyene mme ubuene kpukpru ini ke otu mbufo, edi mbufo idinyeneke Mi kpukpru ini. 12Se enye akanamde ekedi ndiñwaña enem utebe aran oro nduọk Mi ke idem man enye ebeñe Mi abaña ini emi edibukde Mi. 13Akpanikọ ke ndọhọ mbufo nte, ebiet ekededi emi ekwọrọde Eti Mbuk emi ke ofuri ererimbot, ana etiñ ebaña se enye akanamde, nte ñkpọ editi esie.”
14Ndien kiet ke otu mbet duopeba, enye emi ekekotde Judas eyen Iskariọt, ama ebine ikpọ oku, 15ndien okobup mmọ ete, “Okuk ifañ ke mbufo edikpe mi edieke ndade Jisọs nsin mbufo ke ubọk?” Do ke mmọ ekesio okuk silfa edip ye duop enọ enye. 16Ọtọñọde ke ini oro Judas ama ọtọñọ ndikpeme eti ifet man atap Jisọs ọnọ.
17Ke akpa usen edinam usọrọ uyo emi ibọk ndom uyo miduhọ ke esit, mme mbet ema edi ebine Jisọs enyuñ ebup Enye, ete, “Mmọñ ke ñnyin idinam mbeñe idem ndidia usọrọ uyo emi ibọk ndom uyo miduhọ ke esit?”
18Enye ama ọbọrọ mmọ ete, “Eka ekeduk esit obio ndien mbufo eyekut ufọk ete kiet, ndien edọhọ enye ete, Andikpep ọdọhọ ete, lni emi ekenimde enọ Mi ekpere, Ami ñyom ndidia usọrọ Uwọrọufin ke ufọk fo ye mme mbet Mi.” 19Ntre ke mbet Esie ekenyuñ ekenam kpa nte Enye eketemede mmọ, enyuñ etim mme ñkpọ ebeñe usọrọ uwọrọ ufin.
20Ke mbubreyo oro, nte Enye eketiede ndidia ñkpọ ye mme mbet duopeba, 21kadaña emi mmọ ekekade iso ndidia udia, Enye ama ọdọhọ ete, “Ke akpanikọ ke Ami ndọhọ mbufo, owo mbufo kiet eyetap Mi.”
22Mmọ ema efuhọ eti eti, ndien etọñọ ndibup owo kiet kiet, ete, “Nte etiñ ye ami Ọbọñ?”
23Jisọs ama ọbọrọ ete, “Edi enye emi edebide ubọk esie ke usan kiet ye Ami editap Mi. 24Eyen Owo eyekpa, kpa nte ekewetde ebaña Enye. Edi, ọdọdiọk ọnọ owo oro atapde Eyen Owo; akpakam ọfọn ye owo oro nte enye mikpemanakemana.”
25Judas ñko ama obup Enye ete, “Andikpep, nte edi Ami?” Jisọs ama ọbọrọ enye ete “Edi afo.”
26Nte mmọ ekesuk ediade ñkpọ, Jisọs ama emen uyo, ndien ọnọ ekọm, onyuñ obuñ, ndien ọnọ mme mbet Esie, ọdọhọ ete, “Ebọ enyuñ eta, emi edi idem Mi.”
27Ndien Enye ama emen kọb, onyuñ ọnọ Abasi ekọm, ndien ọnọ mmọ, ọdọhọ ete, “Eñwọñ kpukpru mbufo. 28Koro emi edi Iyip Mi emi ọbọpde obufa Ediomi, emi eduọkde ebaña edifen mme idiọkñkpọ ediwak owo. 29Ami ndiñwọñke nto mfri eto Vain aba ọtọñọde ke emi tutu osim usen emi ndiñwọñde ke obufa usuñ ye mbufo ke Obio Ubọñ Ete Mi.”
30Ndien ke ini mmọ ema ekekwọ ikwọ, mmọ ema ewọñọ eka obot Ọlif.
31Ke ini oro, Jisọs ama ọdọhọ mmọ ete, “Ke okoneyo emi, kpukpru mbufo eyeduọñọ ekpọñ usuñ ke ntak Mi, koro ema ewet ete, Ami ñyewot ekpeme erọñ, ndien mme otu erọñ eyesuana.” 32Edi ke mma nset, Ami ñyebem mbufo iso ñka ñkoduk Kalili.
33Pita ama ọbọrọ ete, “Edieke kpukpru owo ediañarede ekpọñ Fi, ami ndidiañakede ñkpọñ Fi.”
34Jisọs ama ọdọhọ enye ete, “Akpanikọ ke ntiñ nnọ fi nte kpa ke okoneyo emi, mbemiso ekikọ ọkpọk, afo eyekañ Mi utim ikata.”
35Edi Pita eyire etiñ, ete, “Ekpededi ana nte ami ñkpa ye Afo, ami ndikañke Fi.” Ndien kpukpru mme mbet ema etiñ kpa ntre.
Jisọs Ọbọñ Akam
36Do, ke Jisọs akada mme mbet Esie aka ke ebiet emi ekotde Ketsemeni, onyuñ ọdọhọ mmọ ete, “Esuhọde etetie ebet Mi ke adañaemi Ami ñkade ndibọñ akam.” 37Enye ama ada Pita ye nditọ Sebidi iba, Jọn ye Jems, ndien Enye ama ọtọñọ ndiyọhọ ye mfuhọ ye mfina ke esit Esie.
38Do ke Enye ọkọdọhọ mmọ ete, “Mfuhọ ofuk ukpọñ Mi tutu ekpere idaha ñkpa. Etie mi enyuñ ekpeme ye Ami.”
39Enye ama asaña aka iso esisit, ndien ama ọduọ ofuk iso Esie ke isọñ, onyuñ ọbọñ akam ete, “Ete Mi, edieke edide mmemmem, yak ebọ Mi kọb enyemi. Edi idighe nte Ami nduakde, edi yak edi nte Afo aduakde.”
40Do ke Enye akafiak ebine mme mbet Esie ndien okokut mmọ nte edede idap. Enye ama obup Pita ete, “Nte mbufo ikemeke nditie ñkpeme eyo ye Ami ke ñkpọ nte awa ñkanika kiet? 41Etaba idap enyuñ ebọñ akam, man mbufo ediduọ eduk idomo. Spirit onyime, edi obukidem emem.”
42Enye ama afiak ọyọhọ ikaba aka ọkọbọñ akam ete, “Ete Mi, edieke midighe mmem mmem ndibọ Mi kọb emi tutu Ami ññwọñ, yak enam uduak Fo.”
43Ke ini Enye afiakde edem edi Enye ama ọtọñọ ntak okut mmọ nte edede idap koro enyin mmọ ama odobi. 44Ntre ke Enye ọkọkpọñ mmọ afiak aka ọkọbọñ akam ọyọhọ ikata osuk etiñ kpa nte Enye eketiñde ke akpa ifet.
45Do ke Enye akafiak ebine mme mbet onyuñ ọdọhọ mmọ ete, “Nte mbufo ke edede idap enyuñ eduọk odudu? Sese, ini oro ekpere, ndien etap Eyen Owo esin ke ubọk mme anam idiọkñkpọ. 46Edaha eda, eyak ñnyin ika. Sese anditap Mi mi, kedi.”
47Kpa ke ini oro Enye okosuk etiñde ikọ, Judas, kiet ke otu mme mbet Esie duopeba, ama edisim. Enye akasaña ye ediwak mme owo emi ekekamade akañkañ, ye eto eñwan, emi Akwa Oku ye mme ikpọ owo mme Ju ekedọñde. 48Mbemiso mmọ edisim anditap Enye ama ọnọnọ mmọ idiọñọ ete, “Enyemi ami nditimde inua edi owo oro, emum Enye.” 49Ke ntre, Judas ama asaña nnen nnen ebine Jisọs ndien ọdọhọ Enye ete, “Ekọm do, Andikpep,” onyuñ otim Enye inua.
50Jisọs ama ọdọhọ enye ete, “Ufan Mi, ka iso nam se afo ekedide ndinam.” Do ndien ke mme irenowo oro ekewọñọ emum Jisọs enyuñ eda Enye edaha; 51Kiet ke otu mmọ emi ekesañade ye Jisọs ama oduri akañkañ esie osio ke efọk onyuñ esibe eyen ufọk Akwa oku utọñ.
52Jisọs ama ọdọhọ enye ete, “Sin akañkañ fo ke efọk esie, koro kpukpru mmọ emi emende akañkañ, eyekpa ke akañkañ. 53Nte mbufo ekere ete, ke Ami ñkemeke ndikot Ete Mi, ndien Enye eyenọ se ikande mme enjel tọsin kiet ebine Mi ini kiet. 54Didie ndien ke ikọ Abasi emi ọdọhọde ete ke editibe ke usuñ emi, ediwọrọ isu?” 55Ke ini oro Jisọs ama ọdọhọ otu owo ete, “Nte Ami ndi Enye emi ndade mbon nsọñibuot usuñ, esin mbufo ekama akañkañ ye eto eñwan edi ndimum Mi? Kpukpru usen Ami ñketie ke edisana ebiet mbufo ñkpep ñkpọ, ndien mbufo ikemumke Mi. 56Edi emi eketibe man se mme Asiak Uduak Abasi ekewetde enim okposu.” Do ke kpukpru mme mbet ekesin Enye enyuñ efeñe ekpọñ Enye.
57Mmọ emi ekemumde Jisọs ema eda Enye eka edem Kaifas, Akwa Oku, ke ebiet emi mme ekpep ibet ye mme mbuot ema ekebono ebet. 58Edi Pita ama asaña nsan nsan etiene Enye, tutu ekesim añwa ufọk Akwa Oku. Enye ama oduk onyuñ ọsuhọde etetie ye mme ekpeme ukpeme, man enye okut se iditibede.
59Mme ikpọ oku, ye kpukpru mme mbon akwa esop mme Ju ema etọñọ ndiyom mme ntiense nsu ebaña Jisọs man oto do mmọ ekeme ndiwot Enye. 60Edi mmọ ikekwe ndomo kiet okposuk edi oro ediwak ntiense nsu ekewọñọde edi ndisu nsu edori Enye; ke akpatre owo iba ema ewọrọ edi, 61enyuñ edọhọ ete owo emi ọkọdọhọ ete, “Ami mmekeme ndiwuri ufọk ukpono Abasi emi, ndien mfiak mbọp enye ke usen ita.”
62Do ke Akwa Oku akadaha ke enyọñ onyuñ obup Jisọs ete, “Nte Afo udubọrọke? Omokop mme ikọ ntiense emi etiñde edian Fi?”
63Edi Jisọs ikesioroke uyo. Ndien Akwa Oku ama ọdọhọ Enye ete, “Ami mowuk Fi ke uñwọñọ ke Enyiñ Odu Uwem Abasi: Tiñ nọ ñnyin mme Afo edi Kraist oro, emi edide Eyen Abasi?”
64Jisọs ama ọbọrọ ete, “Edi ntre kpa nte mbufo etiñde. Edi Ami ndọhọ mbufo nte, ke ini iso mbufo eyekut Eyen Owo nte etiede ke ubọk nnasia Andikpon ñkan ndien onyuñ edide ke obubit ikpa enyọñ.” 65Ke ntak emi Akwa Oku ama awai ọfọñidem esie, onyuñ ofiori ete, “Osuñi Abasi! Ntaha ñnyin ndien ikpoyomde mme ntiense efen-e?” Mbufo emekop nte Enye esuenede Abasi. 66Nso idi ekikere mbufo? Mmọ ema efiori ete, “Enye odot ñkpa.”
67Do mmọ ema etọ Enye etap ke iso enyuñ etọ Enye ita. Ubak owo ema esiak Enye ufia, 68ndien ema edọhọ ete, “Kut ñkukut nọ ñnyin, Afo Kraist, Anie emia Fi?”
Pita Akañ Jisọs
69Ofuri ini oro Pita eketie ke esit okure, ndien ekpri eyen añwan ama asaña ebine enye onyuñ ọkọdọhọ enye ete, “Afo ñko okodu ye Jisọs, koro mbufo mbiba eto Kalili edi.”
70Edi Pita ama akañ Enye ke ọkpọsọñ uyo ke iso mmọ kpukpru ete, “Ami ndiọñọke se afo etiñde abaña.”
71Do ke enye ọkọwọrọ aka ke inua otop ke ebiet emi ekpri eyen añwan efen ekekutde enye ndien ama ọdọhọ mme owo emi ekedude do, ete, “Se owo emi okodu ye Jisọs emi otode Nasaret.”
72Pita amafiak akañ, ndien ama ọbọrọ ete, “Ami ntiñ ke idak uñwọñọ nte ke ami ndiọñọke owo oro!”
73Ke esisit ini ama ekebe, mme owo emi ekedade do ema esaña ekpere Pita enyuñ edọhọ enye ete, “Ñnyin imọfiọk ite ke afo edi kiet ke otu mbet Esie, koro ñnyin imekeme nditiñ añwa añwa ite ke afo oto Kalili oto usuñ nte etiñde ikọ nte mbon Kalili.”
74Pita ama ọtọñọ ndisuñi idem esie, onyuñ ada uñwọñọ ete, “Ami ndiọñọke owo oro.” Ndo ndo oro, ekikọ ama ọkpọk.
75Ntem ke Pita eketi se Jisọs eketiñde: “Mbemiso ekikọ ọkpọk, afo eyekañ Mi ikata.” Ndien enye ama adaha ọwọrọ añwa akatua eyet ata eti eti.
Currently Selected:
Matiu 26: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
