Luk 24
24
Enye Afiak Edi Nditọñọ Ntak Ndu Uwem
1Ke tughi tughi usen ubọk ke akpa usen ke urua emi edide usen ikọ Abasi, mme iban oro ema eda mme enem utebe ñkpọ emi mmọ ekenamde eka ke udi. 2Mmọ ema ekekut nte ke ema ewere itiat esio ke inua udi. 3Edi ke ini mmọ ekedukde, mmọ ikekwe okpo Ọbọñ Jisọs.
4Ke ini mmọ ekesuk edade do ke ñkpeñeyeñ, ndo ndo oro, owo iba emi ọfọñidem mmọ ekesemde nte emireñ mireñ ewọrọ eda mmọ ke ñkañ 5Ke ọkpọsọñ ndik mme iban emi ema enuhọ ese isọñ, edi mme owo iba oro ema ebup mmọ ete, “Nsidi ntak emi mbufo eyomde odu uwem ke otu mme akpa ñkpa? 6Enye iduhọ mi, Enye emeset! Eti se Enye eketiñde ọnọ mbufo ke ini emi Enye okodude ke Kalili.
7‘Eyeyak Eyen Owo enọ mmọ emi mibakke Abasi; eyekọñ Enye ke Krọs. Enye eyetọñọ ntak adaha ada onyuñ odu uwem ke ọyọhọ usen ita.’ ”
8Do ke mmọ eketi mme ikọ emi. 9Ke ini mmọ ema eketo udi edi, mmọ ema etiñ enọ mme mbet duopekiet ye mme mmọ eken kpukpru se iketibede. 10Mme iban emi ekekade udi ekedi Meri Makdalin, Joana, Meri eka Jisọs ye mme iban eken emi ekenọde mme mbet mbuk emi. 11Mme ọbọsuru ikenimke ke akpanikọ se mme iban oro eketiñde, koro ikọ mmọ eketie mmọ nte ikọ mbe ibuot.
12Edi Pita ama adaha ke enyọñ efehe aka udi, enye ama ọnuhọ okut ọfọñ okpo ikpọñ ikpọñ. Do ke enye akafiak ọnyọñ ufọk ke ñkpaidem ye ekikere kabaña se ikpetibede.
13Kpasuk ke usen oro, mbet iba ke otu mme mbet eken ekesaña eka ekpri obio iñwañ emi ekekotde Emaus, emi edide ñkpọ nte itiat itiaba tọñọ ke Jerusalem.
14Nte mmọ ekesañade ke usuñ, mmọ ke ekeneme ebaña kpukpru mme ñkpọ emi eketibede. 15Nte ekesuk ekade iso nditiñ ñnyuñ nneme mbaña mme ñkpọ emi ye kiet eken, Jisọs ke idem Esie ama edisaña ye mmọ. 16Edi ema ebiọñọ mmọ ndisọp ndiọñọ nte ke ekedi Jisọs.
17Enye ama obup mmọ ete, “Nso ke mbufo esuk eneneme ebaña ke usuñ isañ mbufo?” Mmọ ema etuak eda ye iso mfuhọ. 18Kiet ke otu mmọ emi ekekerede, Klopas, ama obup Enye ete, “Nte Afo ikpọñ edi emi edide ke Jerusalem, emi ananade ifiọk abaña mme ñkpọntibe emi esuk ekade iso ke mme usen emi?”
19Enye ama obup mmọ ete, “Mme nso ñkpọ itibe?” Mmọ ema ebọrọ Enye ete, “Se itukde Jisọs Eyen Nasaret. Enye ekedi Asiak Uduak Abasi kiet emi ọkọyọhọde ye odudu ke edikwọrọ ikọ ye ke edinam ke iso Abasi ye ke iso kpukpru owo.
20Mme ikpọ oku ye mme ikpọ ada ibuot ukpono ñnyin ema emum Enye enyuñ eyak Enye enọ ukara mbon Rom man mmọ ema ebiere ikpe ñkpa enọ Enye, enyuñ ekọñ Enye ke etoñkpa. 21Edi ñnyin ima ikere ite ke Enye ekedi Enye emi akanade nte anyaña Isrel. Ndien se itetim ifina ñnyin edi, mfin edi anam usen ita tọñọ mme ñkpọ emi eketibe.
22Ndusuk iban, emi etode otu ñnyin emi edide mme mbet Esie, ema enam idem akpa ñnyin. Mmọ ema ebak eti eti ke usen ubọk eka udi, 23edi ikekwe okpo Esie. Mmọ ema enyọñọ editiñ enọ ñnyin nte ke mmimọ ima ikut ñkukut, ikut mme enjel, emi ekedọhọde ete ke Enye odu uwem. 24Ke ntre ubak nsaña ñnyin ema eka udi, ema enyuñ ekekut kpa nte mme iban oro eketiñde, edi mmọ ikekwe Enye.”
25Ndien Jisọs ama ọdọhọ mmọ ete, “Mbufo esime didie! Esit mbufo onyuñ ebit didie! Nte mbufo mikemeke ndinim ke akpanikọ kpukpru se mme Asiak Uduak Abasi eketiñde? 26Nte ikanaha Andinyaña oro ọbọ ufen emi, ndien Enye oduk ke Ubọñ?”
27Ndien Enye ọtọñọ ke Moses tutu osim kpukpru mme Asiak Uduak Abasi eken, ayarade ọnọ mmọ kpukpru se ekewetde ebaña Enye ke mme ikpa Ñwed Abasi.
28Nte mmọ ekesañade ekpere obio iñwañ emi mmọ ekekade, Jisọs ama anam nte Imọ iyom ndibe mmọ iso. 29Edi mmọ ema enyik Enye ọkpọsọñ ete, “Dañ ye ñnyin, koro ekpere mbubreyo usen onyuñ ekpere ndikure.” Ke ntre Enye ama oduk onyuñ adañ ye mmọ. 30Kini emi Enye eketiede ke okpokoro ye mmọ, Enye ama emen uyo, ọnọ Abasi ekọm, obuñ, onyuñ ọtọñọ ndinọ mmọ. 31Do ke enyin mmọ akatara ndien mmọ ema ediọñọ ndien owo emi Enye ekedide. Ndien Enye ama osop mmọ ke enyin.
32Mmọ ema ebup kiet ye eken ete, “Nte esit ñnyin ikefiopke, ke ini emi Enye okosuk etiñde ikọ ye ñnyin ke usuñ onyuñ ayararede ikọ Abasi ọnọ ñnyin?” 33Mmọ ema edaha eda ini kiet efiak enyọñ Jerusalem, ebiet emi mmọ ekekutde mme mbet duopekiet nte ebohode ye mme mbon eken, 34ke eketiñ ete, “ọbọñ emeset ke akpanikọ! Enye ama ọwọrọ owut Pita idem.”
35Mme owo iba emi ema etiñ añwaña mmọ se iketibede ke usuñ isañ mmọ, ye nte mmọ ekeyararede ediọñọ ete ke ekedi Jisọs, ke ini emi enye okobuñde uyo. 36Ke ini mmọ esuk ekade iso nditiñ mme ñkpọ emi nnọ mmọ, sese, Jisọs ke idem Esie ama ọwọrọ ada ke ufọt mmọ, onyuñ ọdọhọ mmọ ete, “Emem odu ye mbufo.” 37Mmọ ekekere ete ke mmimọ ikekut ekpo oto ke ọkpọsọñ ndik.
38Edi Enye ama ọdọhọ mmọ ete, “Nsidi ntak emi esit mbufo etimerede? Nsidi ntak emi eyighe edukde ke esit mbufo? 39Ese ekaubọk Mi, ese ukot Mi. Enyuñ eyuhọ ete ke edi Ami ke idem Mi. Etuk Mi ndien mbufo eyediọñọ koro ekpo inyeneke obuk ye ọkpọ nte emi mbufo ekemede ndikut nte Ami ñnyenede.” 40Enye ama etiñ ntem onyuñ owut mmọ mme ubọk ye mme ukot Esie.
41Mmọ ikosuk inimke ke akpanikọ oto ke akwa inemesit ye ñkpaidem, do ke Enye okobup mmọ ete, “Nte mbufo emenyene se ediade mi?” 42Mmọ ema enọ Enye ibio iyak emi eketemde 43emi Enye ọkọbọde onyuñ ata ke iso mmọ.
44Ndien Enye ama ọdọhọ mmọ ete, “Emi edi mme ñkpọ emi ñkesitiñde nnọ mbufo ke ini emi Ami ñkosuk ndude ye mbufo. Kpukpru se ekewetde ebaña Mi ke ñwed Moses, ye eke mme Asiak Uduak Abasi ye ke mme ñwed Sam enyene ndiwọrọ nsu” 45Do ke Enye akatat ikike mmọ man ñwed Abasi añwaña mmọ. 46Enye ama ọdọhọ mmọ ete, “Emi edi se ekewetde. Andinyaña oro eyekut ukut, ndien eset oto ke ñkpa ke ọyọhọ usen ita. 47Ndien eyekwọrọ editua ñkpọfiọk ke idiọkñkpọ ye edidahado nnọ ke mme idiọkñkpọ ke enyiñ Esie enọ kpukpru mme idut, ọtọñọde ke Jerusalem. 48Mbufo edi mme ntiense ebaña mme ñkpọ emi.
49Ami ñyenọ se Ete Mi ọkọñwọñọde esọk mbufo, edi etie ke esit obio tutu eyọhọ mbufo ye odudu emi otode ke enyọñ.”
50Ke ini Jisọs ama akada mmọ ọwọrọ ke obio ekpere mben obio Betani, Enye ama emenede ubọk Esie onyuñ ọdiọñ mmọ. 51Ke ini Enye okosuk akade iso ndidiọñ mmọ, Enye ama ọkpọñ mmọ, ndien ema emen Enye edọk ke Enyọñ. 52Mmọ ema etuak ibuot enọ Enye ndien efiak enyọñ Jerusalem ye akwa idara. 53Ndien mmọ ema ebiat ini mmọ ke Edisana Ebiet, esuk eka iso nditoro Abasi.
Currently Selected:
Luk 24: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
