Luk 23
23
Jisọs Ada Ke Ikpe Ndien Etip Enye Ikpe
1Do ke ofuri mbon esop ekedaha eda, ndien eda Jisọs eka iso Pailet. 2Ke ebiet emi mmọ eketọñọde ndidori Enye ikọ ete, “Ñnyin ikomum owo emi nte adade ikọt ñnyin idiọk usuñ, ke ndidọhọ mmọ ete yak mmọ ekukpe okuk ukara enọ Sisa, onyuñ ọdọhọ ete ke imọ ke idem imọ idi Kraist (Andinyaña), inyuñ idi Ọbọñ.”
3Pailet ama obup Jisọs ete, “Nte Afo edi edidem mme Ju?” Jisọs ama ọbọrọ ete, “Ih, edi nte afo etiñde.”
4Do Pailet ama ọdọhọ mme ikpọ oku ye mme otu owo ete, “Ami ñkwe isọñ ikpe ndomokiet emi ekpedade ekpe ikpe ye owo emi.”
5Edi mmọ esuk eyire: “Enye etimede mme owo ke ofuri isọñ Judia ke ukpepñkpọ Esie. Enye ọkọtọñọ ke Kalili ndien Enye onyuñ oto do edisim mi.”
6Ke ini Pailet okokopde mme ikọ abaña Kalili enye ama obup mme Jisọs edi eyen Kalili?
7Ke ini enye ama ọkọdiọñọ ete ke Jisọs okoto ñkañ emi Erọd akakarade, enye ama ọnọ Jisọs esọk Erọd, emi ekedude ko ke Jerusalem ke ini oro. 8Erọd ama adara eti eti ke ini enye okokutde Jisọs, koro enye ama esikop ñkpọ abaña Enye, ndien enye ama onyuñ oyom ndidiọñọ Enye ke ata anyan ini. Enye okodori enyin ndikut nte Jisọs anamde mme utibe ñkpọ, oto ke se enye ekesikopde abaña Jisọs.
9Erọd ama obup Jisọs ata ediwak mbume, edi Jisọs ikebọrọke baba ikọ kiet.
10Mme ikpọ oku ye mme ekpep mbet ekesuk ededa do, enyuñ eka iso ndidori Enye ikọ ke ndodobi usuñ.
11Do ke Erọd ye mbon ekọñ esie etọñọ ndida Jisọs ndọñ ndọk ke mmọ ema ekesine Enye ọfọñ nditọ mbọñ, ema efiak enọ Enye esọk Pailet. 12Usen oro ke Pailet ye Erọd eketọñọ ntak edi ufan, koro mbemiso osim usen oro mmọ ekedi mbon usua.
13Pailet ama okot kpukpru mme ikpọ oku ye ikpọ owo mme Ju ye mbon obio ñko obon ọtọ kiet, 14ndien ọdọhọ mmọ ete, “Mbufo ekeda owo emi nte kiet emi akanamde mme owo etọñọ ntime ye ukara. Ami mme duñọde Enye ke iso mbufo, ndien ñkwe isọñ emi edade edori Enye ikọ emi.
15Erọd ñko ikonyuñ ikwe, oro anam enye ama ọtọñọ ntak ọnọ Enye esọk ñnyin; nte mbufo nde ekemede ndikut, Enye inamke baba ñkpọ ndomokiet emi Enye odotde ndikpa. 16Ke ntre, ami ñyemia Enye ufen ndien nsana Enye ñyak ọnyọñ.”
17Ke kpukpru ini usọrọ ube inyañ Pailet esiyayak owo ñkpọkọbi kiet ọnọ mmọ. 18Ofuri otu owo ema efiori ete, “Wot Enye! Yak Barabas nnọ ñnyin.” 19(Barabas okodu ke ufọk ñkpọkọbi ke ntak ndutime emi enye ọkọtọñọde ke Jerusalem ye ukara, ye ntak uwot owo). 20Pailet ama ekere ndisana Jisọs ñyak, do enye ama ọtọñọ ntak ekpe ye mmọ. 21Edi mmọ ema eka iso ndifiori, “Kọñ Enye ke Krọs! Kọñ Enye ke Krọs!” 22Pailet ama obup mmọ ọyọhọ ikata, ete, “Nso idiọkñkpọ ke enye anam? Ami ñkemeke ndikut ñkpọ ndomokiet emi Enye anamde emi anamde Enye odot ñkpa! Ñyenam emia Enye ndien nsana Enye ñyak.” 23Edi mmọ ema eka iso ndifiori ke ọkpọsọñ uyo ete yak ekọñ Jisọs ke Krọs, ndien ke akpatre mmọ ema ekan. 24Do Pailet ama ebiere ikpe ñkpa ọnọ Jisọs kpa nte mmọ ekeyomde. 25Enye ama asana Barabas ayak ọnọ mmọ; owo emi okodude ke ufọk ñkpọkọbi ke ntak uwot owo ye ntime emi enye ekesinde, owo emi mmọ ekeyomde eyak enọ mmọ, ndien enye ayak Jisọs ọnọ mmọ enam ye Enye nte mmọ emade.
26Mmọ ema eda Jisọs ewọrọ. Nte mmọ ekade ke usuñ, mmọ ema ekesobo eyen eren emi ekekotde Saimọn, emi okotode obio emi ekotde Sirin, emi okotode idut efen edi ndiduk esit obio Jerusalem. Mmọ ema emum enye enyuñ enam enye obiom krọs etiene Jisọs ke edem. 27Akamba otu owo ema etiene Enye ke edem ye ediwak iban emi eketuañade kabaña Enye.
28Jisọs ama ọwọñọde enyin ke edem ese mmọ onyuñ ọdọhọ mmọ ete, “Ndito Iban Jerusalem, ekutua Mi, edi ekam etua idem mbufo ye nditọ mbufo. 29Koro ini ke ededi emi mbufo edidọhọde ete, ‘Ọfọfọn ọnọ mme ada iban emi akananam mikamake eyen, minyuñ ibọkke eyen!’ 30Oro edidi ini emi ‘mme owo edidọhọde mme ikpọ obot ete, “Duọ tọ ñnyin,” enyuñ edọhọ mme ñkpri obot ete, “Edip ñnyin!” ’
31Koro edieke mme owo enamde mme ñkpọ emi ke ini eto esehede ikọñ, nso ndien iditibe ke ini mme eto edisatde ikọñ?”
Ekọñ Jisọs Ke Krọs
32Mmọ ema eda mme oburobut owo iba edian ndikowot ke ebiet kiet ye Jisọs.
33Ke ini emi mmọ ekesimde ebiet emi mmọ esikotde “Ñkpọkpọrọ,” do ke mmọ ekekọñ Jisọs ke krọs ye mme oburobut owo iba oro, kiet ke ubọk nnasia Esie, eken ke ubọk ufien Esie.
34Jisọs ama ọdọhọ ete, “Ete, fen nọ mmọ koro mmọ mifiọkke se mmọ enamde.” Ndien mmọ ema edeme mme ọfọñ Esie ke edisin afia. 35Mme owo ema eda do ke ekpeme, ndien mme akara ukara eda Enye etọ ndọk. Mmọ ema edọhọ ete, “Enye akanyaña mme mmọ efen; yak Enye anyaña idem Esie edieke Enye edide Andinyaña eke Abasi, Enye emi Abasi ekemekde.”
36Mbon ekọñ ema esak Enye ñko, enyuñ enọ Enye mmin emi ekotde Finika ete ọñwọñ. 37Ndien mmọ edọhọ Enye ete, “Edieke Afo edide Edidem mme Ju, nyaña idem Fo naña?”
38Ke ekekpọñde ibuot Esie esisit ema ewet mme ikọ emi:
“Emi edi Edidem mme Ju.”
39Owo kiet ke otu mme oburobut owo iba emi ekekọñde ke eto ediana Enye ama ọtọñọ ndisuñi Jisọs ete, “Nte Afo udighe Kraist Andinyaña? Nyaña idem Fo nyuñ nyaña ñnyin nde-e.”
40Edi oburobut owo eken ama asua ọnọ Enye, ete, “Nte afo ubakke Abasi? Ñnyin kpukpru idu ke idak ubiomikpe kiet? 41Eke ñnyin nte ededi enen, koro ñnyin ibọde ufen emi ñnyin idotde ndibọ ke se ñnyin ikanamde. Edi Enye iduehe ñkpọ ndomokiet.” 42Ndien enye ọdọhọ Jisọs ete, “Ọbọñ, ti mi ke ini Afo edidide ke ubọñ Fo.”
43Jisọs ama ọbọrọ enye ete, “Ami ntiñ akpanikọ nnọ fi nte, mfin emi afo eyedu ye Ami ke Paradais.”
44Ke ñkpọ nte ufọt uwemeyo, ñkanika duopeba, ekim ama ofuk ofuri iso isọñ tutu osim ñkanika ita uwemeyo. 45Uñwana utin ama enime ofuri ofuri. Ndien ọfọñ ikpehe Edisana Ebiet ama asiaha ke ufọt iba ọtọñọde ke enyọñ tutu osim isọñ.
46Ndien Jisọs ofiori ke ọkpọsọñ uyo ete, “Mmayak spirit Mi nsin Fi ke ubọk.” Ke ini Enye ama eketiñ mme ikọ emi, Enye ama ọduọk akpatre ibifik.
47Ke ini etubom mbon ekọñ Rom emi ekesede ñkpọ abaña ñkpa Esie okokutde se iketibede, idem ama akpa enye eti eti, ndien enye ama etiñ ete, “Ke akpanikọ, owo emi ekedi edinen owo.”
48Ndien ke ini ofuri otu owo emi ekedide ndise nte ekọñde Enye ekekutde ete ke Jisọs ama akpa, mmọ ema efiak enyọñọ ufọk mmọ ye akwa mfuhọ. 49Edi kpukpru mme mmọ emi ekemehede ye Jisọs, tutu esim mme iban oro emi eketienede Enye tọñọ ke Kalili, ema eda nsan nsan, esuk eka iso ndise mme ñkpọ ntibe emi.
50Owo kiet ama odu emi ekekerede Josef emi okotode obio mme Ju emi ekekerede Arimatia; Enye ekedi eti owo ye ata nnen nnen owo. Enye ñko ekedi owo kiet ke otu mbon Akwa Esop mme Ju. 51Okposuk edi emi enye ekedide kiet ke otu mbon Akwa Esop mme Ju, enye ikenyimeke ye mmọ ke ubiereikpe ye edinam mmọ. Enye ñko ekedi kiet emi eketiede ebet edidi Obio Ubọñ Abasi. 52Enye ama aka ebine Pailet ekebeñe okpo Jisọs 53Enye ama ọkọkọñọde okpo Jisọs onyuñ ada ñkisi awañ Enye, onyuñ ebri Enye ke udi emi eketuñde ke itiat, emi akananam misinke owo ke esit. 54Ekenam emi ke uwemeyo Fraide, usen mbeñeidem mbeñe usenibet.
55Mme iban emi ekesañade ye Jisọs eto Kalili ema etiene Josef ekekut udi ye nte ekebride okpo Esie. 56Ndien mmọ ema efiak enyọñọ eketim mme enem utebe ñkpọ man ekpeda ekeyet ke okpo Esie. Edi mbemiso mmọ ekekure, mmọ ema eduk ke usen Ederi (Sabat). Do mmọ ema eduọk odudu ke usen ibet, kpa nte ewuhọ ido ukpono Abasi mmọ ekedide.
Currently Selected:
Luk 23: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
