Ọbọsuru 5
5
1Edi owo kiet ama odu emi ekekotde Ananayas; ekekot ñwan esie Safira. Enye ama anyam ñkpọ emi ekedide inyene mmọ, 2enye ama abahade okuk emi emen ubak edip ọnọ idem esie ke unyime añwan esie, ndien enye ama emen se ikọsuhọde ọkọnọ mme Ọbọsuru.
3Ndien Pita ama ọdọhọ enye ete, “Ananayas, ntaha afo ayakde Setan akara esit fo, emi anamde fi osu nsu ọnọ Edisana Spirit ke edidip ubak okuk emi afo ọkọbọde ke inyene oro? 4Inyene emi ekedi okuo mbemiso afo akanyanyam enye, ndien ke afo ama akanyam ama okuk oro ekedi okuo. Ntaha ndien afo ekebierede ke esit fo ndinam utọ ñkpọ emi-e? Afo usuhu nsu emi unọ owo, afo osu ọnọ Abasi.”
5Ke adaña emi Ananayas okokopde ikọ emi, enye ama ọduọ ke isọñ onyuñ akpa; ndien kpukpru mme mmọ emi ekekopde ebaña ñkpọ emi ema ekop ndik eti eti. 6Mme ñkparawa iren ema eduk edida ọfọñ ewañ okpo esie, enyuñ emen enye ewọrọ ekebuk.
7Ke ñkpọ nte awa ñkanika ita ama ekebe, ñwan esie ama oduk edi, edi enye ikọfiọkke se iketibede. 8Pita ama obup enye ete, “Tiñ nọ mi, nte emi edi kpukpru okuk emi afo ye ebe fo ekebọde ke inyene mbufo emi enye akanyamde?” Enye ama ọbọrọ ete, “Ih, oro edi ofuri okuk emi ekenyamde inyene ñnyin.”
9Do ke Pita ọkọdọhọ enye ete, “Ntaha afo ye ebe fo ebierede ndidomo Edisana Spirit Ọbọñ-ọ? Sese mme iren emi ekebukde ebe fo mmọ ke enyin usuñ eda idahaemi, ndien mmọ eyenyuñ emen fi ewọrọ ñko.”
10Ndo ndo oro, ñwan emi ama ọduọ ke ukot Pita onyuñ akpa. Mme ñkparawa iren ema eduk edi edikut okpo esie, mmọ ema emen enye ewọrọ ekebuk ediana ebe esie. 11Ndik ama omum ofuri ufọk Abasi ye mme mbon efen emi ekekopde ñkpọ emi.
12Mme Ọbọsuru ema enam mme ediwak mme utibe ñkpọ, ye mme idiọñọ ye mme ñkpọ ñkpaidem ke otu mme owo. Ndien kpukpru mme andinim ke akpanikọ esiwak ndisobo idem mmọ ọtọkiet ke etehe Sọlọmọn. 13Baba esen owo ndomokiet emi mikọduhọ ke otu mmọ, ikenyeneke ebuana ye mmọ, okposuk edi emi mme owo eketiñde nti ikọ ebaña mmọ. 14Kpa ye oro, Abasi ama akaiso ndidian mme iban ye iren emi ekenimde Abasi ke akpanikọ ke udim mmọ. 15Ke ntak mme ñkpọ emi mme Ọbọsuru ekesinamde, ema emen mme mbon udọñọ ke ñkpana ye mbri edibon ke mben usuñ man Pita ama asaña ebe mbukpọñ esie okpotuk ubak mmọ ke idem. 16Mme ediwak owo ema eto ke mme obio emi ekande Jerusalem ekuk, eda mme mbio udọñọ mmọ ye mme mmọ emi ekpo etuhọrede edi; ndien ema ekọk kpukpru mmọ.
Efiak Emum Mme Ọbọsuru
17Ndien Akwa Oku ye kpukpru mme nsaña esie ye mme mbon ñka mme Sadusi ema efibe mme Ọbọsuru akpan akpan; do mmọ ema ebiere ndinam ñkpọ mbaña ñkpọ emi. 18Mmọ ema emum mme Ọbọsuru enyuñ esin mmọ ke ufọk ñkpọkọbi. 19Edi ke okoneyo oro Enjel Ọbọñ ama eberede mme usuñ otop ufọk ñkpọkọbi onyuñ osioño mme Ọbọsuru, onyuñ ọdọhọ mmọ ete; 20“Eka ekeda ke ufọk Abasi enyuñ etiñ enọ kpukpru owo ebaña obufa uwem emi.”
21Mme Ọbọsuru ema enyime, ndien ke ñkpọusen mmọ ema eduk ke ufọk Abasi enyuñ etọñọ ndikpep ñkpọ. Ke ini emi Akwa Oku ye mme nsaña esie ekedide edisim mmọ ema ekot ọyọhọ mbono esop ukara mmọ, ndien edọñ ekeda mme Ọbọsuru ke ufọk ñkpọkọbi edi. 22Edi ke ini mme mbon utom mmọ ekesimde mmọ ikekwe mme Ọbọsuru ke ufọk ñkpọkọbi; ke ntre mmọ ema efiak eketiñ ntem enọ akwa esop ukara ete, 23“Ke ini ñnyin ikesimde ufọk ñkpọkọbi ima ikut nte ekọbide kpukpru usuñ nte ọfọnde ndien kpukpru mme andikpeme ufọk ñkpọkọbi mmọ do ke ukpeme; edi kadaña emi ñnyin ikọkpọhọrede mme usuñ, ñnyin ikekwe owo ndomokiet ke esit.”
24Ke ini ibuot emi akarade mme ekpeme ufọk Abasi ye mme Ikpọ Oku ekekopde ntem, mmọ ema eyik se ikpetibede ye mme Ọbọsuru. 25Ndien owo kiet ama oduk edi onyuñ ọdọhọ mmọ ete. “Ekpañ utọñ! Mme mmọ emi mbufo ekesinde ke ufọk ñkpọkọbi mmọ ko ke ufọk Abasi eda kekpep mme owo ñkpọ.”
26Ke edikop emi, etubom mme mbon ukpeme ama aka ye ikọt esie akada mme Ọbọsuru afiak edi. Mmọ ikanamke ke odudu koro mmọ eke bakde otu owo editọñọ mmọ ke itiat. 27Mmọ ema eda mme Ọbọsuru edi ediwuk ke iso akwa esop ukara, ndien akwa Oku ama obup mmọ mbume. 28“Nte ñnyin ikowukke mbufo ke ọkpọsọñ uyo ite yak mbufo ekukpep aba ñkpọ ke enyiñ owo emi, edi ese se mbufo enamde! Emenam ukpepñkpọ mbufo ofuri Jerusalem, ndien mbufo eyom ndinam ñkpa Esie ọkọbọ ñnyin!”
29Pita ye mme Ọbọsuru eken ema ebọrọ mmọ ete: “Ñnyin inyene ndisuk ibuot nnọ Abasi idighe owo. 30Abasi mme ete ñnyin ama emenede Jisọs osio ke ñkpa ke ini mbufo ema ekewot Enye ke edikọñ Enye ke eto. 31Abasi ama emenede Enye enim ke ubọk nnasia Esie nte Ibuot ye Andinyaña man oto do Enye ọnọ Isrel ifet edikabade esit ye edifen mme idiọkñkpọ, 32Ñnyin idi mme ntiense ibaña ñkpọ emi, ye Edisana Spirit emi Abasi ọnọde mme mmọ emi esukde ibuot enọ Enye.”
33Ke ini mme mbon esop ukara ekekopde mme ikọ emi esit ama ayat mmọ eti eti, tutu mmọ ema ebiere ndiwot mme Ọbọsuru. 34Edi owo mmọ kiet, owo Farisi emi ekerede Kamaliel, ekpep mbet emi kpukpru owo ekekponode eti eti, ama adaha ada ke esop onyuñ ọdọhọ ete yak eda mme Ọbọsuru ewọrọ ekpọñ esop esisit ini. 35Do ke enye eketiñ ikọ ye mmọ ete, “Mme iren Isrel, etim ekere se mbufo eyomde ndinam ye mme mmọ emi. 36Ke esisit ini emi ekebede owo emi ekekerede Tiudas ama ọwọrọ edi mi, añwana ndiwut nte ke imọ idi ata akpan owo; ndien ñkpọ nte owo ikie inañ ema etiene enye. Edi ema ewot enye, enyuñ esuan mme mmọ emi eketienede enye, ndien ñka esie ama akpa ọwọrọ.
37Ke emi ama ekebe, owo efen emi ekekotde Judas emi okotode Kalili ama onyuñ ọwọrọ ada ke ini emi ekebatde mme owo; enye ñko ama oduri ediwak owo adian ke idem esie, edi ema ewot enye ñko enyuñ esuan mme nsaña esie.
38Ndien ke ikọ enye emi anade ñnyin mi ke iso, ami ndọhọ mbufo nte yak ekunam baba ñkpọ kiet ye mme iren emi. Esana mmọ eyak, koro edieke uduak ye utom mmọ emi edide eke ubọk owo, eyesuana. 39Edi edieke otode Abasi, mbufo idikemeke nditre mmọ. Edi edikut nte mbufo eñwanade eñwan ye Abasi. Esop emi ema eda item Kamaliel.”
40Ema ekot mme Ọbọsuru eduk ufọk, enyuñ emia mmọ, ndien emana ewuk mmọ ete ekutiñ ikọ ke enyiñ Jisọs, ndien ema esana mmọ eyak. 41Mme Ọbọsuru ema ewọñọ ke esop ye akwa idara nte ke Abasi ama abat mmọ nte mme mmọ emi edotde ndibọ esuene ke ntak enyiñ Jisọs. 42Ndien kpukpru usen, ke añwa ufọk Abasi ye ke ufọk mme owo, mmọ ema eka iso ndikpep ñkpọ ñnyuñ ñkwọrọ Eti Mbuk emi abañade Jisọs, nte ke Enye edi Kraist.
Currently Selected:
Ọbọsuru 5: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
