San Mateo 8

Jesuska anpirka shuk lepreyu runata

(Mr 1.40-45; Lc 5.12-16)

1Jesuska chay urkumanta uraykumuhushpan, achka runakuna payta katirkakuna.

2Chasnallapi shuk leprayu runaka kayllayarka, Jesuspa puntanpi kunkurishpan rimarka: “Yayayni, munashpaykika, atipanki pichawanata”.

3Chaypiña Jesuska makinta chutachishpan, llankashpan rimarka: “Munanimi. Ñami kiparishkanki picharishka”. Chay ratulla lepranka illayarka.

4Chaymanta Jesuska payta rimarka: “¡Alita uyay kayta! Nima pita kwintankichu kay pasashkanmanta. Riy maypimi kahun saserdoteka, apay ofrendata Moises kamachishkanta. Paykunata sirvinanpa testimuniushina.”

Jesuska kapitanpa runanta anpirka

(Lc 7.1-10)

5Jesuska Kapernaunpi yaykushpan, payta kayllayarka shuk Romamanta kapitan; chaypi payta sinchita rimashpan tapurka yanapananpa:

6“Yayani, shuk ñukata sirvik runaynimi wasinipi yapa unkushkalla kawsan, mana kuyurinata atipanchu yapa nanaywa parisishpa kawsan”.

7Chaypi Jesuska rimarka: “Rishami anpikrinaynipa”.

8Chaypiña chay kapitanka aynirka: “Yayayni, ñukaka mana nima imachu kani wasinipi yaykunaykipa. Kaymantalla rimashpayki atipankimi runaynita anpinata. 9Ñukapapas tiyanmi apuynikuna kamachiwanankunapa; chasnallatata ñukapa tiyan suntaluynikuna maykankunatami kamachini. Rinanpa shukta rimashpaynika, payka rin, shamunanpa shukta rimashpaynika, payka shamun, runaynita rimashpaynika: ‘Ruray kayta’, payka ruran”.

10Chayta uyashpan Jesuska, yapa kushikushpa rimarka payta katihukkunata: “Shutipami kankunata rimani, nima Israelpi tarishkanichu chasna sinchi kirinata.

11Ñuka kankunata rimani achka shamunkakuna inti llukshinamanta inti yaykunamantapas, tiyarinkakuna Abrahanwa, Isaakwa Jakobwapas Yaya Diospa ali kamachinan silupi.

12Ashwan puntiru akllarishka kashkakunaka mana kirishkankunarayku amsama wichurishka kankakuna. Chaypi wakankakuna nanaywa, kirunkunata manchaywa kanirinkakuna.”

13Chay washa Jesuska rimarka chay kapitanta: “Kutiy wasikima, tukuy chasna kachu imashnami kirishkanki”. Chay ratulla, paypa runanka anpirishka kiparirka.

Pedropa swegranta Jesuska anpirka

(Mr 1.29-31; Lc 4.38-39)

14Jesuska rirka Pedropa wasinma. Chaypi tarikrirka paypa swegranta sirihukta puñunanpi, sinchi kalinturawa.

15Jesuska Pedropa swegranpa makinta llankashpan, kalinturanka pasarirka. Chaypiña payka atarishpan kurka Jesusta mikunanpa.

16Ña amsayahushkanpi achka supay yaykushka runakunata pushamurkakuna Jesusma. Jesuska shuk rimashkanllawa chay supaykunataka llukshichirka; chasnallatata anpirka tukuy unkushkakunatapas.

17Kayka karka profeta Isaias kasna rimashkan paktarinanpa: “Pay kikin aparka unkuyninchikunata nanayninchikunatapas.”

Jesusta katinata munakkunamanta

(Lc 9.57-62)

18Achka runa katihukkunata rikushpan Jesuska disipulunkunata rimarka: “Akuychi kuchata chinpashunchi”.

19Chaypi kayllayarka shuk Moisespa killkashkanta yachachik, payka rimarka: “Yachachik, mayta rihushpaykipas kanta katishkayki”.

20Jesuska payta aynirka: “Zurukunapa tiyan uchkunkunaka, pishkukunapas tiyanahun wasinkuna, ashwan Karipa Wawanka mana tiyanchu nima maypi puñunanpa”.

21Chaypiña shuk disipulun payta rimarka: “Yayayni, sakiway puntiru rishpayni Yayaynitara panpakrishara”.

22Chaypi Jesuska rimarka: “Katiway, saki wañushkakunaka wañushkankunata panpanankunapa”.

Sinchi wayrata, ulastapas Jesús kasillayachirka

(Mr 4.35-41; Lc 8.22-25)

23Chay washa Jesuska botipi uraykushpan disipulunkunawa rirka.

24Rihushkankunapi yakupi shamurka shuk sinchi wayra ulaswa pakta botita wicharka. Chaypi Jesuska puñurayahurka.

25Chaypiña paypa disipulunkunaka likchachishpankuna rimarkakuna: “¡Yaya Jesús, kishpichiy ñukanchita, ñami tikrahunchi!”

26Jesuska aynirka: “¿Imaraykutaya manchankichi sanpa kirik karikuna?” Chaymanta Jesuska atarishpan, chay wayrata, yakutapas sinchi shimiwa rimarka. Chay washa wayraka pasarirka, ulaspas manaña ulasyarkachu.

27Chaypi disipulunkunaka yapa mancharishpa tapunakurkakuna paykunapura: “¿Pishi kan kay runaka, rimashkanllawa wayra ulaspas kasunahun?”

Gadarapi supayyashka runakunata Jesús anpirka

(Mr 5.1-20; Lc 8.26-39)

28Chay shuk chinpa Gadarenukunapa allpanpi paktashpan, chaypi ishkay supayyashka runakuna uchkumanta llukshimushpankuna kayllayarkakuna Jesusta. Yapa sinchi kashkankunarayku nima pi atiparkachu chay ñanpita pasanata.

29Chay ishkay runakunaka sinchita kaparishpa Jesusta rimarkakuna: “Yaya Diospa Wawan Jesús, ¿Imatata munanki ñukanchiwa? ¿Shamushkankichu ñukanchita kastiganapa nimara chay punchaka paktarihushpanra?”

30Paykunamanta karupi achka kuchikuna kahurkakuna mikuhlla.

31Chaypiña chay supaykunaka tapurkakuna: “Ñukanchita llukshichihushpaykika kachay chay kuchikunama”.

32Jesuska rimarka: “Riychi”. Chay supaykunaka llukshishpankuna yaykukrirkakuna kuchikunapiña, chasnallapi tukuy chay kuchikunaka waykuma kallpashpa urmarkakuna yakuma, chaypi chinkarirkakuna.

33Chay kuchikunata kuyrakkunaka kallpashpa mitikurkakuna llaktama, chaypiña tukuy chaykunata kwintarkakuna, chaymantapas kwintarkakuna imami pasarka chay supayyashka runakunawa.

34Tukuy chay llaktapi kawsak runakunaka rirkakuna Jesusta rikunapa, tarishpankuna, sinchi shimiwa rimarkakuna paykunapa kuchunkunamanta anchurinanpa.

Currently Selected:

San Mateo 8: QUP_B

Highlight

Copy