San Mateo 23

Jesuska fariseokunata piñarka

(Mr 12.38-40; Lc 11.37-54; 20.45-47)

1Chay washa, Jesuska rimarka runakunata chaymanta disipulonkunatapas: 2—Moisespa killkashkanta yachachikkuna chaymanta fariseokunapas tiyarinahu Moisespa kamachishkanta yachachinankunapa. 3Chayrayku, kankunaka kasunaykichi tiyan, chaymanta ruranaykichi tiyan tukuy paykunapa rimashkankunata. Chasna kashpanpas ama katiychichu paykunapa ruranankunata, paykunaka rimanahun shukta, chay washa ruranahu shuk imataña. 4Churanahu runakunapi sinchi llashakunata mana atipaypa apanata, chasna kashpan paykunaka nima chuk shillu puntastuta kuyuchinahunchu yanapanankunapa. 5Chasna kashpan, tukuy paykunapa ruranankunaka kanmi runakuna rikunankunallapa. Chasna wallkata churarishkankunawa urintinkunapi chaymanta makinkunapi Yaya Diosta alita kasuk kani nishpa yanka rikuchinayashpa purinahun. 6Chaymantapas munanahu tiyarinata yapa suma tiyarinakunapi mikuna uras, tiyarinahu puntiru tiyarinakunapi tantarina wasikunapipas. 7Ñanpikunapi plasakunapi purihushpankuna yapa munanahun tukuy runakuna saludanankunapa, chaymanta “¡Yachachik, Yachachik!” Nishpa kayanankunapa.

8Kankunaka ama maskaychichu kayanankunapa “Yachachik”. Shukllallami kan kankunapa Yachachiknikichika, chayka kanmi Kristu; chaymanta tukuy kankuna kankichi wawkikuna.

9Nima kayaychichu “Yayayni” nima pita kay allpapi, shukllami kan kankunapa Yayaykichika, payka kahu silupi. 10Nima munaychichu kankunata rimanankunapa “Yachachik” Shukllami kan Yachachiknikichika, paymi kan Kristu. 11Maykanmi kankunamanta kamachik kanayan, payka tukuyta yanapak kanan tiyan. 12Maykanchari atunyachirin chayka kankami uchillayashka, maykanchari uchillayan chaymi kanka atunyachirishka.

13¡Alaw fariseokuna, Moisespa killkashkanta yachachikkunapas, llullaysikikuna kankichi! Kankunaka arkankichi runakunata yaykunankunapa Yaya Diospa ali kamachinanpi, nima kankuna atipankichichu yaykunata, nima sakinkichichu yaykunankunapa maykankunami munanahun yaykunata.

14[¡Alaw Moisespa killkashkanta yachachikkuna, fariseokunapas, llullaysikikuna kankichi! Kankunaka shuwankichi mashintukunapa imankunata, shutipashina unayta mañankichi. Chayrayku yapa atun kanka kastikuykichika!] 15¡Alaw Moisespa killkashkanta yachachikkuna, fariseokunapas llullaysikikuna kankichi! Kankunaka purinkichi marta allpatapas maskashpa katikkunata, shuk kuti tarishpaykichi, rurankichi ishkay kuti ashwanta infiernupa wawanta ashwanta kankunamanta.

16¡Alaw, wiskukuna purichik kankichi shukkunata! Rimankichi: “Maykanpas shutipatashina rimashpanka Yaya Diospa wasinmanta, nima imachu kan nishpa; chaymanta maykanpas shutipatashina rimashpanka chay oromanta Yaya Diospa wasinpi kahukrayku, paktachinan tiyan rimashkanta”. 17¡Mana yachak wiskukuna! ¿Maykanta ashwan valik kan? ¿Chay orochu, Yaya Diospa wasinchu maykanmi santuta ruran chay orota?

18Chaymanta kankunaka rimankichi: “Maykanpas shutipatashina rimashpanka chay altar ranti, mana paktachinan tiyanchu rimashkanta; ashwan maykanmi shutipatashina rimashpanka chay altarpi ofrenda kahuskarayku, paktachinan tiyan chay rimashkanta”. 19¡Mana alita yuyarik wiskukuna! ¿Maykanta ashwan valik kan? ¿Chay ofrendachu, mana kashpaka chay altarchu maykanmi santuta ruran chay ofrendata? 20Maykanmi shutipatashina riman chay altar ranti, riman chay altar ranti chaymanta tukuy chay altarpi tiyashkanrayku. 21Chaymanta maykanmi shutipatashina riman Yaya Diospa wasinta, chayka riman Yaya Diospa wasinrayku chaymanta tukuy chaypi kawsakunarayku. 22Maykanmi shutipatashina kirichinayashpa siluta churashpa riman, chayka riman Yaya Diospa wasinta chaymanta chaypi tiyahushkantapas.

23¡Alaw, Moisespa killkashkanta yachachikkuna, fariseokunapas, llullaysikikuna kankichi! Kankunaka kunkichi chunkamanta shukta chay tarpuykichimanta, ashwan kankunaka sakinkichi yapa valik kamachinakunata: Chaykunaka kanahun alita rurana, llakichina, chaymanta kirina. Alimi kama kayta ruranaykichipa, mana sakishpa shuk kamachinakunatapas. 24¡Kankunaka kankichi wiskukuna shukkunata purichik, shushunkichi siputuchistukunata, ashwan millpunkichi kamilluta!

25¡Kankunawa shuti, Moisespa killkashkanta yachachikkuna, fariseokunapas, llullaysikikuna kankichi! Imaraykutaya mayllankichi pusilluta awanllata chaymanta kallanatapas, ashwan ukumaka kahu untakta shuwanakunawa chaymanta mana ali ruranakunawa. 26¡Fariseo Wisku! Mayllay puntiru pusilluta chaymanta kallanapa ukuntapas, kiparinanpa mayllarishka awanpas.

27Alaw Moisespa killkashkanta yachachikkuna, fariseokunapas, ¡imashna kastigushi kankunarayku kanka! Llullachiysikikunami kankichi. Shuk yurawa pintarishka rumiwa taparishka wañushkakunata churana uchkushinami kankichi. Kanchamantaka sumakta rikurishpanpas ukupika wañushkapa tullunkunawa millanayaypa ismukunawa untakta kan. 28Chasnashinami kankunapas, awaykichilla rikurinkichi ali runashina, uku partika kahunkichi untakta llullakunawa chaymantapas millaypa ruranakunawa.

29¡Alaw, Moisespa killkashkanta yachachikkuna, fariseokunapas, llullaysikikuna kankichi! Rurankichi panparina wasinkunata profetakunapata, chaymanta sumayachinkichi almankunata ali rurak runakunapata. 30Chaymanta rimankichi: “Ñukanchipas chay puncha kawsanchima karka ñawpa yaya rukunchikuna kawsashkan uras, manami paykunata yanapanchimachu karka chay profetakunata wañuchinankunapa”. 31Chasna rimashpaykichimi testimuniuta kankuna kikin rimankichi chay wañuchik runakunapa miraykuna kanaykichita, kankunami kankichi chay miraykuna maykankunami wañuchirkakuna chay profetakunata. 32¡Tukuchiychi ñawpa yayarukuykichikunapa kallarishkanta!

33¡Machakuyakunapa mirayninkuna! ¿Imashnata kishpinkichi chay infiernumantaka?

34Chayrayku ñuka kankunama kachasha profetakunata, alita yachakushka runakunata Moisespa killkashkanta yachachikkunapas. Paykunata kankunaka wañuchinkichi, shukkunataka klavankichi kruspi, shukkunataka asutinkichi tantarina wasinkunapi chasna kallpachishpa katinkichi llaktakunapi llaktakunapi. 35Kankunapi urmananpa tukuy yanka nishpa wañuchishkaykichikunapa yawarninkunaka talirishka kay allpapi Abelpa yawarninmanta pacha, Zakariaspa yawarninkama, pay karka Berekiyaspa wawan; maykantami wañuchirkankichi tantarina wasipi chaymanta altarpipas. 36Shutipata rimaykichi, tukuy kaykunami shamunka kay runakunarayku.

Jesuska Jerusalenpi kawsak runakunarayku llakirishpan wakarka

(Lc 13.34-35)

37¡Jerusalén, Jerusalén, wañuchik profetakunata, chaymantapas rumiwa tuksinki kanma kachashka runakunata! ¡Achkakuti munarkani wawaykikunata tantachinata, imashnami atallpaka tantachin wawanstukunata rikran ukuma, chasna kashpanpas kanka mana munashkankichu!

38¡Rikuychi, kunanka kankunata sakishpayni llaktaykichika chunllami kiparinka! 39Kunanka kankunata rimani, kunanmanta pacha manañami rikuwankichiñachu, rimanaykichikama: “Kushichirishka kachun Yaya Diospa kachaskan.”

Currently Selected:

San Mateo 23: QUP_B

Highlight

Copy