San Mateo 19

Jesuska yachachin mana sakinakunamanta

(Mr 10.1-12; Lc 16.18)

1Jesuska tukuchishpan rimanata, anchurirka Galileamanta, chasna rirka Judea allpama, chay Jordán yaku chinpama. 2Achka runakuna payta katirkakuna, chaypi Jesuska paykunata anpirka.

3Chaymanta fariseokunaka Jesusta kayllayashpankuna, pantachichinayashpa tapurkakuna: “¿Alichu kama shuk kari warminta sakinanpa shuk uchilla imastumantalla?”

4Jesuska aynirka: —¿Manachu Yaya Diospa killkachishkanpi leyishkankichi runata rurashpan Yaya Dios karita warmita rurashkanta?

5Chaymantapas nirka: “Chayrayku karika sakinan tiyan yayanta mamanta warminwaña kawsananpa, chasna tukunkakuna shuk aychashinalla.” 6Manaña kanahunñachu ishkay, ashwan shuk aychashinallami kiparinahun. Chayrayku, maykantami Yaya Dios tantachiska, nima pi atipanchu anchuchinata.

7Chaypi tapurkakuna kasna nishpa: “Chasna kashpanka ¿Imaraykutaya Moiseska kamachishka shuk kari warminta kunanpa shuk sakina killkata chaywa sakinanpa?”

8Chaypiña Jesuska aynirka: “Moiseska sakishka chasna ruranaykichipa kankunapa shunkuykichika yapa sinchi kashkanrayku, kallarishkanmanta pacha manami chasnachu karka. 9Ñuka kankunata rimani, atipankichi warmikichita sakinata shuk karita musayashkanraykulla, maykanpas yanka warminta sakishpanka shuktaña warmiyashpanka, uchatami ruran. Chaymanta maykanchari warmiyan chay warmi kusan sakirishkata, uchatami ruran”.

10Disipulunkunaka rimarkakuna: “Chasna kari warminwa kawsashpanka, mana alichu kama warmiyananpa.”

11Chaypi Jesuska aynirka: “Manami tukuy atipankichichu asirtanata kayta, ashwan maykankunallatami Yaya Dioska asirtachin, chaykunallami yachankakuna. 12Tiyan achka runakuna chasna mana warmiyu kawsanankunapa. Shuk karikunaka chasna tukunahun, paykunata kapashkankunarayku. Shukkunaka mana warmiyanahunchu Yaya Diospa munaskata rurakkuna kanankunapa. Maykankunami kay rimashkaynita asirtanahun, asirtachu”.

Jesuska Yayan Diosta mañan wawakunarayku

(Mr 10.13-16; Lc 18.15-17)

13Chaypiña shuk wawastukunata Jesusma pusharkakuna, makinta paykunarayku churashpa Yaya Diosta mañananpa. Chayta rikushpankuna disipulunkunaka piñarkakuna. 14Chaypiña Jesuska rimarka: “Sakiychi wawastukunaka shamunankunapa ñukama. Ama arkaychichu, maykankunami kanahun kay wawastukunashina, paykunapami kan Yaya Diospa ali kamachinanka.”

15Chay wawastukunapi makinta churashkan washa, chaymanta rirkaña.

Shuk musu kullkiyu Jesuswa kwintarka

(Mr 10.17-31; Lc 18.18-30)

16Chaymanta shuk runa Jesusta kayllayashpan tapurka: “Yachachik, ¿ima ali ruranatata ruraynima wiñaypa kawsayta tarinaynipa?”

17Jesuska rimarka: —¿Imaraykuta tapuwanki “ali kanamanta”? Shukllami ali kan. Wiñaypa kawsanama yaykunata munashpaykika kasuy Yaya Diospa kamachishkankunata.

18Chay runaka tapurka: “¿Maykan kamachinakunatata paktachinayni tiyan?” Jesuska aynirka: —Ama runa masikita wañuchiychu. Warmiki tiyashpan ama shuk warmiwa musayaychu. Ama shuwaychu. Ama llullashpa testimuniuta rimaychu. 19Yuyay Yayaykita mamaykitapas. Yuyay runa masikita kankikintashina.

20Chay musuka rimarka: “Tukuy chayta paktachishkani [musumanta pacha] ¿Imata ashwan ruranaynipa pishiwan?”

21Chaypiña Jesuska rimarka: “Alita rikurinayashpaykika, rishpayki, rantichikri tukuy imayki tiyashkanta, chayta kuy mana imayu runakunata, chasna rurashpaykimi silupi achka imayu tukunki. Chay washa shamuy katiway”.

22Chay musuka rimashkanta uyashpan, rirka llakirishka, yapa achka imankunaka tiyashkanrayku.

23Chaypi Jesuska disipulunkunata rimarka: “Shutipata rimaykichi, yapa sinchimi kanka shuk kullkiyu Yaya Diospa ali kamachinanpi yaykunanpa.

24Kutikashka rimaykichi, shuk atun kamilluka atipamami pasanata shuk aguha uchkunstuta. Ashwan shuk kullkiyu runaka mana atipankachu yaykunata Yaya Diospa ali kamachinanpi”.

25Chayta uyashkankuna disipulunkunaka, yapa mancharishpa kiparishpankuna tapurkakuna: “Chasna kashpanka, ¿Pitaya atipama kishpinata?”

26Jesuska rikushpan paykunata rimarka: “Runakunaraykuka, kanmi mana atipaypa; ashwan Yaya Diosraykuka tukuy kan atipaypa.”

27Chaypiña Pedroka rimarka: “Ñukanchika sakishkanchimi tukuy imanchikunata, chasna kantaña katinanchipa. ¿Imatata Yaya Dios ñukanchita kunka?”

28Jesuska paykunata rimarka: —Shutipata rimaykichi tukuy mushu tukushpan, Karipa Wawanka tiyarinka atun kamachinanpi, chasna kankunapas, maykankunami katiwashkankichi tiyarinkichimi chay chunka ishkay tiyarinapi, chaymanta kamachinanchipa chay chunka ishkay Israel runakunata. 29Maykanpas ñukata katinanranti, sakishpanka wasinta, wawkinkunata, paninkunata, yayanta, mamanta, warminta, wawankunata, chakrankunata, paytaka shuk pachak kutimi kunka. Chaymantapas wiñaypa kawsaytami kunka.

30Achka runakuna maykankunami kay allpapi kanahun puntiru, kankakuna kiparishka washama; maykankunami kashkakuna washama paykunami kankakuna puntapi.

Currently Selected:

San Mateo 19: QUP_B

Highlight

Copy