Genesis 35

Yakobo auya uko Beseli

1Mnungu niyo amgamba Yakobo, “Inuka wiite Beseli ukekale uuko niyo wadamanya kilingo cha kutambikila kwa Mnungu yudya ukulailaga umwo wandaga ukamnyilika nduguyo Esau.”

2Yakobo niyo aigamba imp'huga yakwe na wadya wose andile nawo, “Lekeni mahili ye kigeni idya mnanayo, kesunt'heni, naho mvale suke zi kukile. 3Mna chaita Beseli, uko nehadamanye kilingo cha kutambikila kwa Mnungu yudya anambizaga mwa makunt'ho yangu, naho yudya andaga na miye kila hadya naitile.” 4Ivo niyo wamwink'ha Yakobo mahili yawe mageni, ne ziheleni zawe. Yakobo azifulikilaga hasi yo mti wo mwaloni nuwo wandile uko Shekemu.

5Yakobo na wanawe we kilume weze wakonge kwiita, want'hu wadya wandile mwe mizi imgihi, nawengilwa ni wogofi mkulu, naho hawagezile kuwatimila. 6Yakobo aitaga na want'hu wakwe wose uko Luzi, mwe isi ya Kanani, uwo ukwitangwa Beseli uwo ukwitangwa Beseli umwe isi ya Kanaani. 7Adamanyaga kilingo cha kutambikila kwa Mnungu. Ahenk'ha zina hant'hu aho, Eli Beseli, ni kwaviya aho niho Mnungu amlailaga umwo andaga akamnyilika mkuluwe. 8Debola mlezi ywa Labekaniyo wammosela msanga hasi yo mti wo mwaloni nt'hendelo ya Kwa mwenye mzi ya Beseli. Ivo niyo mti uwo wenk'higwa zina, “mwaloni wa ndilo.”

9Umwo Yakobo eze auye kulawa Mesopotamia, Mnungu amlailaga kaidi no kumvikila. 10Mnungu niyo amgamba, “Zina dyako niwe Yakobo, mna kukongela ivi haluse nowitangwe Izilaeli.” Kwaivo Yakobo enk'hagwa zina ni Mnungu niye Izilaeli. 11Naho Mnungu niyo amgamba, “Miye niye Mnungu mto udahi wose (El Shaddai). Unde na wana wengi. Si, na mafyo ya si, nayalawe kwako, naho maseuta nawalawe mwe cheleko chako. 12Nohwink'he isi idya namwink'hile Ibulahimu na Isaka, naho neni ink'hize kwa welekwa wako wakuunga wakutimile.” 13Aho niyo Mnungu amleka Yakobo. 14Yakobo niyo akimalisa iwe dya nk'humbukila hadya Mnungu alongaga naye, naho kaditenda dinde dya Zumbe kwa kuditiila divai na mavuta ya zeituni. 15Hant'hu aho Yakobo alongaga na Mnungu, Yakobo ahetangaga Beseli.

Kubanika kwa Laheli

16Yakobo ne mp'huga yakwe wagendeelaga ne nt'hambo kulawa Beseli, mna umwo wandile wakei kwingila Efalasa, Laheli akongagwa ni usungu wa kweleka, naho alumisagwa ni usungu uwo. 17Usungu wize wongezekele, mnk'hunga ywakwe niyo amgamba, Laheli, “Usekogoha, kupata mwana mtuhu wa kilume.” 18Mna Laheli andaga akatoweela kwaviaandaga akabanika, amwink'haga mwanawe zina dya Benoni, nuko kugamba, “Mwana ywa makunt'ho changu.” Mna ise niyo amwitanga Benjanini, Kwa Kiibulania nuko kugamba, “Mwana ywo mkono wangu wa kulume.”

19Laheli eze abanike nakamoswa msanga hank'handa ye sila ikuita Efulasa, uko mwa mazuwa aya kukwitangwa Betelehemu. 20Yakobo asimikaga iwe dya nk'humbukila aho amosigwe msanga mkaziwe, naho ni kiwalo che kikuta cha Laheli hata ivi dielo. 21Yakobo uyo etangagwa Izilaeli agendeelaga ne nt'hambo niyo aika nk'hambi kulongole yo mnala wa Eda.

Wana wa Yakobo

22Umwo Yakobo akekala mwe isi idya, Lubeni agendaga kugona na Biliha, yumwenga mwa wavele hi wa ndoza wa ise, Yakobo aivaga niyo aihiwa vitendese.

Yakobo andaga na wana kilume mlongo na waidi. 23Wana wa Lea wandaga ni Lubeni, mwanawe ywa nk'hongo, Simioni na Lawi na Isakali na Yuda na Zabuloni. 24Wana wa Laheli wandaga ni Yusufu na Benjanini. 25Wana wo mtumwa wa Laheli uyo Biliha wandaga ni Dani na Nafutali. 26Wana wo mtumwa wa Lea uyo Zilipa wandaga ni Gadi na Asheli. Awa welekelwagwa uko Mesopotamia.

Kubanika kwa Isaka

27Yakobo aitaga kwa ise Isaka, uko Mamle, hagihi na Hebuloni, uko wandaga wakekala Ibulahimu na Isaka. 28Isaka ekalaga miaka gana na milongo mnane, 29niyo abanika akanda adalahalise, ivo wanawe we kilume Esau na Yakobo wammosela msanga.

Currently Selected:

Genesis 35: NguuBV

Highlight

Copy

Compare