Mattuw 6

Áwútàtà Yesu ishina Sɔ̀wàsáàsá

1<<Ni pà dini mazyi ni káwa sásɔ̀ yii pyɛ̀ panku wá wya wú waa ni sá lá yɔ̀. nyunuwaa ni ma sá mamá yii pyɛ̀ panku ní, ni hwoi dò bētòkolo'ni zukponu yi yiibe Ada'ni wàyii dɔ lá yɔ̀.

2Yimamala nyunuwaa o ma yi sá ándówànyànì lá sɔ̀ ní, ká lò'u dádɔ̀ wa kito sáyìna yiiyi waa áwándódúgyɛ́ hwoi sá yii táwàwáshidɔ wa nyàshɔ lá yɔ̀. Wa hwoi sá mamá mazyi apanku wá ngyā'wa. Ḿ zɛ̀ yí'ni zyíbyɛ̀, wa kàpyɛ̀ lò bētòkolo'wa hwā'watɔ̄bwā mánì. 3Dedee nyunuwaa o ma yi sá ándówànyànì lá sɔ̀ ní, sá'u mazyi àbugɛ'o wàbàzɔ̄ wa'o pyápyá lá ú ká yìnɔ̀ yɔ̀. 4Yiibeli àsɔ̀wàsáàsá'o ú lò kà wú wàyùyò. Mazyi Ada'o wàyi wya wú wàyùyò lá, ú hwā'otɔ̄.

Áwútàtà Yesu ishina Andɛ̀wàjāàjā

5<< Dédēwaa ni ma hwoi jāndɛ̀ ní, ni ká lò kà sáyìna áwándódúgyɛ́ yɔ̀! Wa shó ndɛ̀wàjāàjā wàsādɔ yii táwàwáshidɔ wa nyàshɔ mazyi ápanku wá wya'wa. Ḿ zɛ̀ yí'ni zyíbyɛ̀, wa kàpyɛ̀ lò bētòkolo'wa hwā'watɔ̄bwā mánì. 6Dedee o ma yi jāndɛ̀ ní, ya kà fu tá'o, mazyi ó lò nūkyɔ́ chù, mazyi ó jāndɛ̀ yí Ada'o, waa wa hwoi wya'u yɔ̀ lá. Mazyi Ada'o wàyi wya wú wà yùyò lá, ú hwā'otɔ̄.

7Dédēwaa ni ma hwoi jāndɛ̀, ni káwa jāsā wa zyí wànùchɔ̀ wàzɛ̀ kà zɛ̀ sáyìna yiiyi waa áwándó wá wúhwɔ̀ hwoi sá lá yɔ̀, áwándó wàhwoi gàzyíhwɛ̀ la, áwúhwɔ̀'wa hwoi fá'wa ishina ndɛ̀wàjāàjā'wa gwɔ̄ɔ̀gwɔ̄ lá. 8Ni kálò kà sáyìna wa yɔ̀, dizyi Ada'ni kàpyɛ̀ yì wú waa ni hwoi fú lá pùnū waa ni pi vá ní. 9Yiiyi waa o yi jāndɛ̀ lá gbaa yi nì,

<<Ada'i wàyii dɔ lá,

àzyì'u ó lòkà zyì wànyɛnyɛ,

10Achɔ̀'o ú bē,

áwú waa o yi fú lá, wá sá yii bēèmyɛ̄ sáyìna yiiyi waa u yii dɔ lá.

11Yí'i wúzyī waa i hwoi fú lá.

12Gbā'izyɔ̀ wú wàbɛbɛ waa i sá lá,

sáyìna yiiyi waa i gbāzyɔ̀ wúwàbɛbɛ waa wándó wànàti sá'i lá.

13Káwa chá'i ya fu pɛ́wàmbàmbà yɔ̀,

dedee tɛ̄'i yiibe wúwàbɛbɛ.>

14<<Nyunuwaa ni ma gbāzyɔ̀ wúwàbɛbɛ waa panku sá'ni lá ní, Ada'ni wàyii dɔ lá yi gbā'nizyɔ̀ dúdú. 15Dedee nyunuwaa ni ma gbā panku zyɔ̀ yɔ̀ ní, mamá waa Ada'ni yi gbā'nizyɔ̀ wúwàbɛbɛ waa ni sá lá yɔ̀ ní.

Áwútàtà Yesu ishina Nūwàsèsè

16<<Dédēwaa ni ma hwoi sènū ní, ni kálò zú gbē sáyìna yiiyi waa áwándógyɛ́ hwoi sá lá yɔ̀. Wa lò zú'wa gbē mazyi ápanku wáwya la, wa hwoi sènū. Ḿ zɛ̀ yí'ni zyíbyɛ̀, wa kàpyɛ̀ lò bētòkolo'wa hwā'watɔ̄bwā mánì. 17Dédēwaa o ma yi sènū ní, lò byù pwò ishina'o mazyi ó lò zú'u tō, 18mazyi ápanku káwa yìnɔ̀ la, o yi sènū yɔ̀, mazyi ákèké Ada'o waa ápanku hwoi wya'u kà yɔ̀ lá, ú yìnɔ̀. Ada'o wàyi wya wú waa o sá yùyò lá, ú hwā'otɔ̄.

Áwútàtà Yesu ishina Wàhwo Wúchɔ́ Ya Kóshī Yii Dɔ

19<<Ni kálò wúchɔ́'ni hwo kóshī yii bēèmyɛ̄ yɔ̀, yii bē waa àgɛ̀ wa dɛ́pàpà lò'wa hwoi sábɛ̄ lá yɔ̀, wa bē waa ávyú hwoi téká nūkyɔ́ kàfu ma hwoi vyí lá yɔ̀. 20Dedee ni hwo wúchɔ́'ni ya kóshī yii dɔ, yii bē waa àgɛ̀ wa dɛ́pàpà hwoi sábɛ̄ kà yɔ̀ lá, kàwa bē waa ávyú hwoi téká kàfu ma hwoi vyí kà yɔ̀ lá. 21Dizyi ánwú'u gbɛ̀n yi sā bé waa wúchɔ́'o wè hwoi ní lá.

Áwútàtà Yesu Ishina Kyàngyà Dì

22<<Áyīzú hwoi sáyìna kyàngyà àwu dì. Nyunuwaa áyīzú'u ma sàsà, àdì'u sásá lò yi mwɛ̀ wa bēyá, 23dedee nyunuwaa áyīzú'u ma sàsà yɔ̀, àdì'u lò yi sèfē. Yimamala nyunuwaa bēyá wàyii dì'u lá ma lò sèfē, u yi sèfē bɛbɛ mamáni ní!

Ni hwoi Wá Shidɔ Kwɛɛ Wúchɔ́

24<<Apazukponu lò yi kà nyàchɛ̄ awasendo ipyɛ kà yɔ̀, dizyi ú yi zé wàsèndo zū mazyi shó wàsèndo zū, ú yi sá wàsèndo zū sàsà ma yi sìnì wàsèndo zū. O yi wá Shidɔ wa banji sásá wú ipyɛ kà yɔ̀.

Ni Zɛ̀ndɛ̀ wa Shidɔ Mazyi Ni káwa Zánwú Yɔ̀

25<<Ishinali lá m zɛ̀ la, ni káwa zánwú ishina wúzyī wa zyàwā wàyí'ni hwoi shí hwoi zyoo lá yɔ̀, kwɛɛ pi ishina wúchɛ́ wàwèdì yɔ̀. Nyemgba, ánwú sàsà buu kā wúzyī yɔ̀? Àdì sàsà buu kā wúchɛ́ wàwèwè yɔ̀? 26Ni wya ányī wàhwoi pēèpē yii dɔ, wa hwoi tà chɛ̄wú yɔ̀, kwɛɛ wá pi be wúzyī mazyi wáhwoi wè vā yɔ̀, dedee Ada'ni wàyii dɔ lá yí'wa wúzyī, hwoi zyàwā. Áwuni kā ányī wa hwɛ̀ buu ní yɔ̀? 27Ánɔ̄ yiifu'ni waa ánwúzáàzá'a yi kwā nyunu zukponu yii bé nyunu ki'a kà ní?

28<<Lá áyɛ̄ sá waa ni hwoi zánwú ishina wúchɛ́ wàwèdì ní? Ni wya yiiyi waa àdòdó byɛ́ hwoi ngā yii fubyɛ́ lá. Wa hwoi sá kolo yɔ̀, kwɛɛ wá pi zù túkpá yí di'wa yɔ̀. 29Dedee m ngyi zɛ̀ yí'ni la, kwā aku Solomon wa wúchɔ́'a sásá waa u bā lá, u gbā mbyādì sàsà sáyìna dòdó byɛ́ zukpo yiifu dòdó byɛ́ wàhwoi lá yɔ̀. 30Shidɔ gbaa yi mbyā ábyɛ́ wàyii fubyɛ́ dì ní, ábyɛ́ wàyii maa zyìna waa ákyɛ̀ wa lò'u yi sōpyù lá, nyemgba pi hwoi wuni? Awuni wándó waa àbyɛ̀'ni hwo zō lá! 31Yimamala ni káwa zánwú ishina wú wàhwoila yɔ̀: <Áyɛ̄ waa i hwoi zyī ní?> Kwɛɛ <Áyɛ̄ waa i hwoi wā ní?> Kwɛɛ <Áyɛ̄ waa i hwoi wèdì ní?> 32Áwú hwoila waa áwándó wá wúhwɔ̀ lò nwú'wa jā hwoi ni ní. Adā'ni wàyii dɔ lá, yìnɔ̀ la, ni hwoi fú wú wàhwoila sásá. 33Dedee ni kàpyɛ̀ mashɔ́ áwúwàsàsà wàhwoi fu Chɔ̀ Shidɔ lá, mazyi ni sá wúwàsàsà waa u yi fú lá, mazyi ú lò wúsásá wànàti waa ni hwoi fú lá yí'ni. 34Yimamala ni káwa zánwú ishina ákyɛ̀ yɔ̀, dizyi ákyɛ̀ yi zánwú ishina dia. Sásá nyunu bā nwúzáàzá'a wua kē'u.

Currently Selected:

Mattuw 6: WBTP

Highlight

Copy