Mattuw 25

Azyezuwa Ídē Waa Yesu Zɛ̀zyí Yiishina wa lá.

1Yiifu nyunuli, achɔ̀ wà yii dɔ yi sáyìna Azyezuwa ídē, wa lò kyàngyà ma ya myɛ̄ mazyi wa dò nù'wa. 2Azyezuwa ichɔ̄ yiifu'wa byɛ̄byɛ̄ yɔ̀, ichɔ̄ yiifu'wa byɛ̄byɛ̄. 3Áwándó wàbā kyɔ̀ lá hwo kyàngyà'wa dedee ma kōlò byù bà ní yɔ̀. 4Wándó wà byɛ̄byɛ̄ hwoila, gɛ̀, chá byù'wa yiifu kwɛ̀ wa kyàngyà'wa. 5Anù'wa gɛ̀ bē mɔ̄mɔ̄ yɔ̀, áná fyè'wa wa hwo náná.

6Asunɔ chōgégé wa fá kitó, < Anù yiinì! Zumyɛ̄ be dò'u!>

7<< Yiibeli, sásá zyēzuwà ide hwo zɛ̀ná ma lò kyàngyà'wa hwāpyù. 8Yiibeli áwándó wàbā kyɔ̀ lá zɛ̀ yí wándó wàbyɛ̄zú lá la, <Ni yí'i byù'ni tímá la, àkyàngyà'i lò yi dɛ.>

9Wa zɛ̀ yi wa lā, << Aayi, àbyù la ba yí kē yi wa ni yɔ̀. Yimamala, ni ya be wándó wa hwoi kpátí byù la mazyi ni mbà.

10<<Dédēwaa wa hwoi nyashɔ̄ hwoi ya wa mbà byù lá, ànù lò kà ndō. Azyezuwa wa mbya di wa la ya wa bé wàsèbā dùdù wa'u.Wa lò nūkyɔ́ chù.

11Gbámá wándó wànati kàsɛ̄ bē. Wa zɛ̀ la, Wàsèndo! Wàsèndo! < Lò nūkyɔ́ pò yi!>

12Dedee u zɛ̀ yi wa la, <M ngyi zɛ̀ yí'ni zyíbyɛ̀, M bā yi ni yɔ̀.>

13Yimamala, ni hwo zú hwāli, dizyi ni ba yì nyunu kwɛɛ àshɔ́ yi puna waa Ngo Panku yi be lá yɔ̀.

Atɛ́káàká Áwányà Pà Isa

14Yesu kà mbya zɛ̀ la << achɔ̀ wà yii dɔ lá yi sáyìna ápazu wa yi ya kyū, ma bá áwányà'a ndɛ̀ ma lò wúchɛ́'a kwà wa vo. 15U yí ndó zu shɔ́wànyànyà idipaichɔ ichɔ̄, u kà yí ndózu shɔ́wànyànyà idipaichɔ ipyɛ̀, ma kà yí ndózu shɔ́wànyànyà idipaichɔ zukponu, nɔ́nɔ̄ pà gyēgyē wa gbá'a. Yiibeli lá, ma ya'a kyū. 16Andó wà pà shɔ́wànyànyà idipaichɔ ichɔ̄ lá zumyɛ ma ya vekà vo wa'u ma dò shɔ́wànyànyà idipaichɔ kwani. 17Andó wà pà shɔ́wànyànyà idipaichɔ ipyɛ̀ lá zumyɛ ma ya vekà vo wa'u ma dò shɔ́wànyànyà idipaichɔ ipyɛ̀ kwani. 18Yimamala ándó wà pà shɔ́wànyànyà idipaichɔ zukponu lá, ya kā shī ma lò banji wàsendo'a yù ní.

19<< Dédēwaa wàsendo nwúnyà hwoila ya nashɔ gbógbó ma kàsɛ̄ lá,u lò'wa bá ndɛ gbayi mazyi u yì wú waa wā sá wa banji li lá. 20Andó wà pà shɔ́wànyànyà idipaichɔ ichɔ̄ lá, kà chá shɔ́wànyànyà idipaichɔ ichɔ bē. Ma zɛ̀ la, <Wàsendo, o yí'm shɔ́wànyànyà idipaichɔ ichɔ̄, wyà ami dedee kà dò kwa vo ni. Wya, m kà dò ichɔ̄ kwā ni.>

21Wàsendo'wa zɛ̀ la,<< Mgbagyē, ànyà wa sàsà wàbā byɛ̀! O tà byɛ̀ wa wu wa tí; M lò'o yi kà dóshī wu wa buu. Bē mbonwu wa Wàsendo! >

22Apa wa pà kobo ipyɛ̀ la, chá ipyɛ̀ kà bē. U zɛ̀ la, <Wàsendo, o lò kobo ipyɛ̀ kwà'm vo ni. Wya, m kà dò ipyɛ̀ kwā ni.>

23Wàsendo'a zɛ̀ la,<< Mgbagye, nyà wà sàsà ma bā byɛ̀! O tà byɛ̀ yiibe wú wà mambani; M lò'o yi kà dóshī yiibe wú buu. Bē mbonwú wa'm dùdù!>

24<<Yiibeli andó wà pà shɔ́wànyànyà zukponu lá, zɛ̀ la, zɛ̀ la, <Wàsendo,><M yìnɔ̀ la, wúsáàsá'o tòtò, o yi bē wúzyī yii be waa o nànɛ̀ yiiní yɔ̀, ma kà yi hwo wúzyī kwazɔ̄ yi be waa o nyá chɛ̄wú yiiní yɔ̀. 25Yimamala, m lò kàzī ma lò shɔ́wànyànyà'o yùyò yii fu shī. Wyà, áwúchɛ́'o yiinì.>

26<<Wàsendo zɛ̀ yí'u la, < O yi nwúnyà wà bɛ̄bɛ̄, o zɛ̀dìhwɛ yɔ̀! O yìnɔ̀ la, m ngyi bē wúzyī yiibe waa m nànɛ̀ yiiní yɔ̀ ma kà yi hwo wúzyī kwazɔ̄ yiibe waa m nyá chɛ̄wú yiiní yɔ̀? 27Ó ngaa lò'm banji lá kwà wándó wà hwoi vekà vo lá vo ni, nyunu waa m ma kàsɛ̄ m ngyi dò kwani.

28<< <Yimamala, ni lò banji li pà yi vo'a mazyi ni lò yi ándó wà ba shɔ́wànyànyà idipaichɔndoide lá. 29Dizyi ándó wà bā wú buu lá waa wa hwoi kwa'uni gbógbó u yi bā buu ni. Andó wà bā yɔ̀ lá, wa wú wàtitinti waa u bā yii vo'a lá, wa lò yi fyé. 30Wa lò nwúnyà lá wàtánchɔ̀ lá yi tá hwā myɛ̄ be wàsèfē, bē waa wa hwoi shèki ma hwoi dó vo yi nyí lá>

Adɛ̀ wa byí

31<< Nyunu waa, Ngo Panku ma bē yiifu gwá'a wa sásá zyēchɔ̀ wa'u dùdù, u yi shí bé dù àwu gwá chɔ̀'a wà yii dɔ lá. 32Sásá panku denmyɛ hwoi gbàyi pyɛ̀'a. Yiibeli u lò'wa ndō ipyɛ̀, sáyìna yiiyi waa ndópyōwú yi gàfā dɛ̀ wa byí lá. 33U lò dɛ̀ hwoi wè zyɛ̄ vonzyī ma lò byí hwoi wè zyɛ̄ vonsɔ́.

34<< Yibeli Àku yi zɛ̀ yi wándó wa hwoi zyɛ̄ vonzyī la, < Bē, áwuni wa Ada'm kwāndɛ̀ yí'ni lá; ni be zyīfí ndō chɔ̀ wuni waa wa lò mbyā ndii-ndii yiibe màmà denmyɛ lá. 35Ámbɔ̄ bwā'm ni yi'm wúzyī, nwúzyàwā zá'm ni yí'm zyàwā, M ngyi pàkyù ni kà tà'mkyù , 36M ngyi kyē myàmbyà ni hwo wúchɛ́ wè'm dì, M tòwú ni fú fyī yí'm, wa lò'm pà hwā tá ni be ma wya'm.>

37<< Yiibeli, wándó wàbā byɛ̀ hwo zɛ̀ yí'u la, < Adando, nyunu wa ni wa i wya'u yi bwā ámbɔ̄ ma yi'o wúzyī ni, kwɛɛ nwúzyàwā zá'u ma yí'o zyàwā ni, > 38Nyunu wa ni waa i wya'u yi pàkyù ma tà'ukyù ni, kwɛɛ o yi kyē myàmbyà ma hwo wúchɛ́ wè'o dì ni, 39Nyunu wàni waa o tòwú kwɛɛ yiifu táfyì waa í be wya'u ní?>

40<< Aku yi zɛ̀ yí wā la, < M ngyi zɛ̀ yi ni zyibyɛ̀, sásá wu wa ni ma sá yi zyēyī'm wa vo'wa lò zō, ni sá yi'm mánì. >

41<< Yiibeli, u yi zɛ̀ yi wándó wa hwoi zyɛ̄ vonsɔ́ lá la,< Dàdɔ yi pyɛ̀'m, Awuni waa wa hwa'ni nūli lá, ni kà fu pyù waa wa mbya yi pà wàbɛbɛ wa ázyēchɔ̀'a. 42Ámbɔ̄ bwā'm ni yí'm wúzyī yɔ̀, nwúzyàwā zá'm ni yí'm zyàwā yɔ̀, > 43M ngyi pàkyù ni tà'mkyù yɔ̀ , M ngyi kyē myàmbyà ni hwo wúkɛ̀ wè'm dì yɔ̀, M tòwú ni fú fyī yí'm yɔ̀, wā lò'm pà hwa táfyì ni bē wya'm yɔ̀.>

44Wā hwoi zɛ̀ la, < Adando, nyunu wa ni wa i wya'o yi bwā ámbɔ̄, kwɛɛ, yi zánwú zyàwā, kwɛɛ yi pàkyù, kwɛɛ myàmbyà, kwɛɛ yí tòwú, kwɛɛ wā lò'o pà hwa táfyì ma sázá'o ní yɔ̀ ní?>

45<< Aku yi zɛ̀ yí wā la, < M ngyi zɛ̀ yi ni zyibyɛ̀, sásá wu waa ni ma sá yi zyēyī'm waa vo'a lò zō la ni sá yí'm yɔ̀ mánì.> 46<< Yiibeli,wa hwoi kà fu pyù wa gbógbógbògbò, dedee, wándó wàbā byɛ̀ hwoi dò nghànwū wàgbógbó gbògbò.

Currently Selected:

Mattuw 25: WBTP

Highlight

Copy