Mattuw 22
22
Atɛ́káàká yishina Bā
1Yesu kà zɛ̀zyí wa tɛ́káàká yí panku la, 2<<Àchɔ̀ wàyii dɔ lá, yi sáyìna aku zū wàlò wú dùdù sábwā wàsèbā ngo'a lá. 3U chō áwányà'a chɔ̀ mazyi wáya bá wándó waa u bá'wāndɛ̀ dùdù lá ndɛ̀, dedee áwándó waa u bá'wāndɛ̀ dùdù lá gba bē yɔ̀.
4<<Yimamala u kà chō áwányà'a wándó wànàtī chɔ̀ ya bé áwándó waa u bá'wāndɛ̀ dùdù lá la, <Tàma m lò wúzyī dùdù'm mbyā ló, m gé nɛ̄'m wàkwàkwà lá ma lò fā, m lò wúsásá mbyā ló. Ni bē dùdù wàsèbā!>
5Dedee áwándó waa u bá'wāndɛ̀ dùdù lá nghà'wa zyí'a, ma hwoi sá kolo'wa, ápazu ya'a dā, ápazu ya'a bé wúchɛ́'a yii tí. 6Wándó wànàti lò áwányà pà ma dá'wa bwà ma lò'wa bwā. 7Aku lò sáàpá, yimamala u sù soja'a ya lò wándó wàlò áwányà'a bwā lá, bwā ma lò'wa gá sōpyù. 8Yiibeli u lò áwányà'a bándɛ̀ ma zɛ̀ yí'wa la, <M lò wú dùdù'm wàsèbā mbyābwā, dedee wándó waa m bá'wa ndɛ lá, gba vyā wa'u yɔ̀. 9Tàma ni ya nyashɔ mazyi sásá wándó waa ni ma wya ní, ni bá'wa ndɛ̀.> 10Yimamala, áwányà zumyɛ ya kpandala ma hwo panku sásá waa zú'wa wya lá, bándɛ̀ gbàyi, kwā wándó wàbā nwú wàsàsà wa wándó wàbā nwú wàbɛbɛ gbógbó be wàsèbāli lò mwɛ̀ wa panku.
11Dedee dédēwaa ku kàfu mazyi ú wya ápanku lá, u wya pàzu gba wè wúchɛ́ dùdù wàsèbā yɔ̀. 12Aku mbye'u shé la, <Abugɛ o sáni ma kàfu yii maa wa wúchɛ́ dùdù wàsèbā yɔ̀ ní?> Dedee ápalá zɛ̀zyí yɔ̀.
13<<Yiibeli, akù zɛ̀ yí áwányà la, ni lò'u vo wa bá dɛ̀, mazyi ni lò'u tá hwā myɛ̄ yii be wàsèfē. Yii beli u yi shèki ma yi pā nyí'a. 14Yesu lò zyí kē la, <<Àndɛ̀ bá panku buu, dedee ápanku tímá waa wa shē'wa ní.
Àgbā Wàhwā yí Kesa
15<<Áwáfaris ya bwābɔ̄ wàchá Yesu chɔ̀ wa shéwàmbwēèmbwē. 16Yiibeli wa chō áwátu'a wa panku Hiridus dùdù. Wa zɛ̀ la, <<Andótàwú,>> i yìnɔ̀ la, o yi zɛ̀zyí byɛ̀, o yi tà wú byɛ̀ waa Shidɔ fú ápanku ú sá lá, ma yi wèbēbè ishina wú waa wándó wànàti hwoi gàhwɛ̀ lá yɔ̀, dizyi o yi fá zyí pàzu ishina áhwɛ̀'a yɔ̀. 17Zɛ̀ yí'i, o wya mamánī ní? U yi wú wàbɛbɛ yiibe Dɔ̀'i wàhwā gbā yí ku Roma kwɛɛ u bɛbɛ yɔ̀ ní?>>
18Dedee, Yesu lò áwú wàbɛbɛ waa wa nwā yiifu nwú'wa lá yìkyà, ma zɛ̀ la, <<Awuni áwágyɛ́! Áyɛ̄ sá waa ni hwoi ngāngɛ̄ wàchá'mchɔ̀ ní? 19Ni tà'm banji wàhwā gba wa'u.>> Wa lò banji tɛ̄ zumyɛ yí'u, 20u mbyē'washé la, <<Ázú wa zyì nɔ̄ hwoi lá?>> 21Wa zɛ̀ yí'u la, <<Àwu Kesa.>>
Yiibeli Yesu zɛ̀ yi'wa la, <<Ni hwā Kesa tɔ̄ áwú wàyiwu Kesa, mazyi ni hwā Shidɔ tɔ̄ áwú wàyiwu Shidɔ.>>
22Waa wa fá mamá lá, gbàshú lò'wa pà. Yiibeli wa me'u ní ma ya'wa.
Ashé Wàmbyēèmbyē ishina Ádàdɔ Ándówàhūùhū
23Kà yiifu nyunu lá zukponu, Áwásadus wànàti be dò Yesu ma zɛ̀ la, ápanku ma lò hu wa hwoi dàdɔ yiibe ki yɔ̀. 24Wa zɛ̀ lā, <<Andótàwú, Musa zɛ̀ la, áwánù wàma bā ngo yɔ̀ ma lò hu ní, ángoyī'a ú lò wàki bà kɛ́nkɛ́n mazyi wámbà zyē yí ándó wàlò hu lá. 25Tàma i bā ázyēyī wánù isumpyɛ hwoi maa. Ándó wàyi wáshuwɔ̀ lá gbe wà ma lò hu bā zyē yɔ̀, yimamala u me àwàki'a ní yí ngoyī'a. 26Áwú lá zukponu kà kwò yiishina ándówàhwāpyɛ̀, ma kwò yiishina ándówàhwāsa, gbógbó ya ishina ándó wàhwāísumpyɛ. 27Áwú wàkɛ̄ɛ̀kɛ̄, àwà lá lò hu. 28Tàma, yiifu nyunu waa pànku wàhūùhū hwoi dàdɔ lá, àwà lá lò yi kà wu nɔ̄ ní? Dizyi sásá'wa sèbā wa'u.>>
29Yesu zɛ̀ yí'wa la, ni ngyāzú! ishina ni yì zyí Shidɔ wa ágba Shidɔ yɔ̀ lá. 30Dizyi nyunu waa panku wàhūùhū hwoi dàdɔ lá, áwánù hwoi sèbā yɔ̀, áwáwà hwoi sèbā yɔ̀, wa hwoi kà sáyìna ázyēchɔ̀ wàhwoi dɔ lá. 31Tàma, sáyìna àwu dàdɔ áwándó wàhūùhū lá, ni zɛ̀ wú waa Shidɔ zɛ̀ yí'ni yiifu āfā lá yɔ̀? U zɛ̀ la, 32<M ngyi Shidɔ àwu Ibrahim, Shidɔ àwu Ishaku, Shidɔ àwu Yakubu.> U yi Shidɔ àwu wándó wàhwoi zyoo lá, u gbā yi Shidɔ àwu wándó wàhūùhū yɔ̀.>>
33Dédēwaa àbè panku fá mamá lá, àgbashu lò'wa pà.
Àdɔ̀ Wàshūwɔ̀ Kā
34Dedee waa Áwáfaris fá la, Yesu yí Áwásadus lò bàndɛ̀ lá, wa lò diwa bándɛ̀ gbàyi, 35Apazu wàyì Dɔ̀ Musa yiifu’wa lá, chá Yesu chɔ̀ wa shéwàmbyēèmbyē la, 36<<Andótàwú, àdɔ̀ wàni shuwɔ̀kā yiifu Dɔ̀ ní?>>
37Yesu zɛ̀'undɛ̀ ní la, << <Ni shó Adando Shidɔ'ni wa nyùnwú'ni sásá, wa nwúdì'ni sásá, wa ázyíhwɛ̀wàgàgà'ni sásá. 38Wàyila gbaa yi dɔ̀ wàkɛ́pyɛ̀ ma kà yi dɔ̀ wàshūwɔ̀kā lá ní.” 39Wàhwāpyɛ̀ kà yi sáyìna wàkɛ́pyɛ̀ lá, <Shó áwánɔ̀beshí'u sáyìna yiiyi waa o shó diu lá.> 40Àdɔ̀ ipyɛ hwoila waa Àdɔ̀ Musa wa áwútàtà áwándówyapyɛ̀ hwoi be wàni ní.>>
Yesu Yi Ngo Nɔ̄ ní
41Dédē waa Áwáfaris bē gbàyi yii bē zukponu lá, Yesu mbye'washé lā, 42<<Ni gàzyíhwɛ̀ ishina Kristi mamáni ní? Ni bá'u la ngo nɔ̄?>>
Wa zɛ̀ yí'u la, << U yi ngode kpendu àwu Dawuda,
43Yesu zɛ̀ yí'wa la, <<Áyɛ̄ hwā waa Nídì yí Dawuda bá'u la, <Adando ní>? Dizyi Dawuda zɛ̀ la,
44<< <Adando zɛ̀ yí Adando'm la,
<< Shí vonzyī'm
gbógbó ḿ lò
wàzé'o dó zyoku pátābá'o.>
45Nyunu waa Dawuda ma bá'u la, Adando>, Mamánī waa Kristi pi lò yi kà ngo Dawuda ní?>>
46Apazukponu yiifu'wa zɛ̀zyí zū kà yɔ̀, kà dà zū nyunu li yapyɛ̀ ápazukponu ngōnwú ma mbyē'ushé gɛ̀ yɔ̀.
Currently Selected:
Mattuw 22: WBTP
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Nigeria
