Sefaniya 2
2
Shemera ya kwoya vidoda
1Mwenga wantu yamwanasoni mjojoniki, mjojoniki, 2mtendi kalongola pamberi hamwenitozi, ama maya ga Mtuwa Mlungu halyeniwawiziri lishaka lya nkalaliru yakuyi. 3Mwenga wantu woseri wa pasipanu mumsakuli Mtuwa Mlungu, mwenga yamzijimira lagira zakuyi. Mgasakuli mafiru ga Mlungu na lagiru kulongolu kwakuyi, pamonga hamlishapili lishaka lya maya ga Mtuwa Mlungu.
Maagamiziya kwa maisi ga pakwegera
4Shaka shilii Mtuwa Mlungu pakawakoma Wapalestina, mji gwa gaza haguhamwi, Ashikeloni haguweri mahami. Wenikaya wa Ashidodi hawawingwi paluwala, na walii wa Ekroni hawawigwi muisi. 5Mwenga wenikaya wantu wa kumpwani Hamshiwoni, wantu yamlikala aku Krete! Mtuwa Mlungu kawatakuliriti mwenga wantu wa Filisti yamlikala Kanaani. Neni haniwalagi na hapeni kasigali ata yumu gwenu! 6Su mwenga wantu wa kumpwani hamtendwi kuwera maliwuziwu, hamuweri visasa vya walolera wa kondolu. 7Shakapanu isi ayi ya kumpwani hayiweri muisi ya wantu wa numba ya Yuda yawasigaliti. Hawaliyiziyi wankanyama wawu aku, hawagonji munumba za Ashikeloni shaka sha pamihi. Toziya Mtuwa Mlungu gwawu hakawaloleri na kuwawusiya muumanda wawu. 8Mtuwa Mlungu kolonga hangu, “Niwapikanira wantu wa Mowabu na Waamoni, ntambu yawahigiranga wantu waneni na kulitumba kuyikanka isi yawu. 9Mtuwa Mlungu yakana makakala na Mlungu gwa Israeli kalonga hangu. Nakaka Mowabu hawagamiziwi gambira Sodoma na Amoni hawagamiziwi gambira Gomora. Isi hayiweri ya misontu na malindi ga munu, haziweri ushiwa mashaka goseri. Wantu waneni yawakasigali hawayikankali na kuyitolala.” 10Aga ndo gawafira kupata kwa mtiti gwawu, toziya wawatenderiti lidufiya wantu wa Mtuwa Mlungu yakana makakala goseri. 11Mtuwa Mlungu hakaweri gwa kutiliziya kwa womberi, wamlungu woseri wa pasipanu hakawaagamiziyi. Maisi goseri pasipanu hagamguwili, kila isi mupahala pakuyi. 12Mwenga wantu wa Kushi yayiwera Isopiya ya leru hamulaguwi kwa ligumba lyaneni. 13Mtuwa Mlungu hakayikomangi na kuhalibisiya isi ya Ashuru. Hakagutendi mji gwa Ninawi kuwera mahami, pahala payuma gambira shiwala. 14Shakapanu vipinga vya wankanyama hawagonji amu na kila nkanyama gwa kuntundu. Kapungu na yangeyange na kolongu na hawakali pambindi pa mpanda zakuyi, lisisigira hakalili mumadilisha gakuyi, kunguru hawalili muvizingiti, toziya numba zakuyi za miyerezi haziweri hera. 15Agu ndo mji gulii yagulitumbiti na kutakula kwahera yumonga gambira neni! Su hashi vinu guwera shivula na kuwera pahala pakulikala wankanyama wa kuntundu na kila yakapita kakuseka.
The Bible version in the Pogoro Language. @The Word for The World International and Pogoro Language translation. All rights reserved.