Zakaliya 4
4
Malola ga shintambi sha koloboyi
1Shakapanu ntumintumi gwa kumpindi ulii yakayoweriti na neni kaniziriti kayi, kanimusiya handa kumwimusiya muntu mumpota. 2Malaika kankosiya, “Guwona shishi?” Neni nimwankula,
“Mona shintambi sha koloboyi sha zahabu.” “Pampindi pakuyi kwana bakuli ya lipaki na koloboyi saba na kila yimu yana pahala pa kulekelera tambi saba. 3Pakwegera na shintambi ashi kwana mitera miwili ya mizeyituni, gumu uwega wa kumliwu na gumonga uwega wa kumshigi.” 4Nimkosiyiti ntumintumi gwa kumpindi yakayowiriti na neni, “Avi ndo vintu gaa, Mtuwa gwangu?”
5Yomberi kankosiya, “Guvimana ndiri?”
Nimwankula, “Nivimana ndiri mtuwa.”
Shakatakuliti Mlungu kwa Zerubabeli
6Mtuwa Mlungu kamgambiriti Zerubaberi hangu, “Haguweri na mpatiru kumbiti kwa makakala gakundiri ila kwa Rohu gwangu. 7Kayi kongera kulonga, lugongu alu ndo shidiwiru? Ndala! Gwenga Zerubabeli hagulupalasiyi. Gwenga hagunyawi kayi Numba ya Mlungu na hagulituri libuwi lya upeleru, wantu hawanemeleri pawalonga, iherepa! Nakaka iherepa!”
8Mtuwa Mlungu kayoweliti na neni hangu. 9Zerubabeli kalitula liyanjiru lya Numba ya Mlungu na yomberi viraa hakayimalili. Shakapanu pagalawira aga wantu waneni hawavimani kuwera neni Mtuwa Mlungu gwa mashonta ndo yanikulagalaliti kwawomberi.
10Gaa yakabeziya lishaka lya mirandu mididini? Wantu hawafyapiliri pawawona tamazi mmawoku mwa Zerubabeli. Saba azi ndo masu ga Mtuwa Mlungu geni gazyengeta pasipanu poseri.
11Shakapanu nimkosiyiti ntumintumi gwa kumpindi ulii, “Mizeyituni miwili ayi yayiwera uwega wa kumliwu na kumshigi mwa shintambi sha koloboyi ndo shishi? 12Ntambi mbili pampeku pa milija miwili ya zahabu mweni lipaki lya mizeyituni inyiririka yana mana gaa?”
13Malaika kankosiyiti hangu, “Guvimana ndiri avi ndo shishi?”
Neni nimwakula, “Nivimana ndiri mtuwa gwangu!”
14Shakapanu kang'ambira, “Ntambi azi ndo wantu wawili walii yawalumikitwi kwa lipaki wamtenderi Mtuwa Mlungu gwa pasi panu poseri.”
The Bible version in the Pogoro Language. @The Word for The World International and Pogoro Language translation. All rights reserved.