Zakaliya 12
12
Yerusalemu hayikombolwi
1Mtuwa Mlungu kayoweriti hangu kwa Israeli, Mlungu yakawumba mpindi na kutura miyanjiru ya pasipanu shakapanu kampananiti muntu ukomu na kalonga hangu, 2“Haniwakomi wantu wa miji yapakwegera na Yerusalemu. Wantu wa mji gwa Yerusalemu hawakomangwi pamuhera na wantu wa miji yoseri ya Yuda. 3Lishaka ali hanigutendi mji gwa Yerusalemu kuwera gambira litalabuhi. Yoseri yakajera kulinyasula hakalitendi mweni. Wantu wa maisi goseri pasipanu hawagukomangi mji agu. 4Neni Mtuwa Mlungu ntakula, lishaka ali hantuli lyoga kwa kila farasi na mkwena farasi gwakuyi hanimtendi kaweri na lukwali. Hanililoleri likabila lya Yuda kwa kuwatenda farasi wa wankondu wawu kuwera lwisi. 5Shakapanu wakulu wa Yuda hawaligambiziyi, wenikaya wa Yerusalemu wapata makakala gawu kwa Mtuwa Mlungu yakana makakala goseri, Mlungu gwawu.
6Lishaka ali haniwatendi wakulu wa Yuda gambira shijonju sha motu mulidowi ama limbamba yaliyaka pakati pa lirambu. Gulunguziya wega zoseri za maisi yagaguzyengeta, kumbiti wantu wa Yerusalemu hawasigali poneka pahala pakuyi.
7Neni Mtuwa Mlungu hanigalopoli malingu ga Yuda, su ligoya lya wiwuka wa Dawudi na wantu wa Yerusalemu naliwera nentu kuliku lya wantu wa Yuda. 8Lishaka ali, Neni Mtuwa Mlungu haniwaloleri walii yawalikala mji gwa Yerusalemu, su yawahera makakala muwamu mwawu hawaweri na makakala gambira mfalumi Dawudi. Wiwuka wa Dawudi hawawalonguziyi wantu wa Yuda gambira malaika wa neni Mtuwa Mlungu, gambira neni Mlungu namweni. 9Lishaka ali handawi kugaagamiziya maisi goseri yagajera kugukomanga mji gwa Yerusalemu.
10Wiwuka wa Dawudi na wenikaya wa mji gwa Yerusalemu haniwamemiziyi Rohu ya lusungu na maluwa na womberi hawamloli yawamtoboliti na kumdayilira gambira muntu yakamdayilira shipandanjira gwakuyi. 11Lishaka ali hakuweri na kudaya nentu kumjini Yerusalemu gambira kumdayilira Hadadi Rimoni mululalanda lwa Megido. 12Isi hayidayi, na kila lukolu haludayi gweka yakuyi, wapalu gweka yawu na wadala gweka yawu, lukolu lwa Dawudi gweka yawu na lukolu lwa Natani gweka yakuyi, 13lukolu lwa Lawi gweka yakuyi na lukolu lwa Shimeyi gweka yakuyi, 14nkolu zoseri yazisigaliti gweka yawu na wadala wawu gweka yawu.
The Bible version in the Pogoro Language. @The Word for The World International and Pogoro Language translation. All rights reserved.