Mesali 8
8
Luhala lwankukwiswa
1Hashi! Luhala lulirandiri?
Umani kabotanga liziwu lyakuyi?
2Pampindi pashidunda pakwegera na njira,
mumapandanjira ndo kagoloka.
3Pakwegera na magomi ga kwingilira kumjini,
pahala pawingilira wantu kashema kwa kubota pakalonga.
4Mwenga mwawantu woseri, Niwaluwa mwenga!
Liziwu lyangu ndo lyakuwashemera.
5Mwenga yamumanandiri, mulifundi kuwera na luhala, mwenga wazigizigi mulifundi kuwera na umani.
6Mpikaniri toziya shafira kutakula ndo sha mana,
miromu yaneni hayilavi mirandu ya nakaka.
7Mlomu gwangu hagutakuli nakaka hera,
ukontola ndo ngalaliru mmulomu mwangu.
8Visoweru vyoseri vyantakula ndo vya nakaka,
kwahera sha uzanga muvisoweru avi.
9Kwa muntu yakamana umani lupalahera,
kwa yakana mahala ndo teratera.
10Gusaguli mafunda gangu badala ya madini ga feza,
umani badala ya zahabu iherepa.
11Neni luhala nanamana kuliku mabuwi ga beyi nkulu,
shoseri shagushifira shiwezandiri kulifani na neni.
12Neni luhala nana umani,
nana umani na mahala.
13Kumguwira Mtuwa Mlungu ndo kukalalira ukontola.
Nkalalira mtiti na njira za ukontola na visoweru vya upaya.
14Nana uwezu wa kumgambiziya muntu na kulipanana luhala.
Neni nana umani na nana uwezu.
15Niwatanga wafalumi wakolamlima
na walonguziya kulaviya lagiru ziherepa.
16Niwatanga walonguziya wakolamlima vilavilii wakulu
na watoza wakolamlima weri.
17Niwafira walii yawanfira,
yawansakula kwa gangamala hampati.
18Ulunda na ligoya vya kwaneni,
kuwera na vintu vitangala kulikala na mpatiru,
19Mabwajubwaju ganeni ndo gaherepa kuliku zahabu iherepa,
mota yaneni ikanka madini ga feza ilii iherepa.
20Ng'endang'enda munjira iherepa
na nfata njira yazifiriziya.
21Neni niwapanana ulunda yawanfira,
nizimemiziya nduu hanja munumba zawu yawanfira.
22Mtuwa Mlungu kanyawiti pakanjiti lihengu lyakuyi,
makashu pamberi kenetendi lihengu lyoseri.
23Nyawitwi pamwanjiru,
pamberi pa pasipanu kuwera.
24Niwukiti pamberi pa matiwa ga bahari,
pamberi pa mbwiru zyazibwitula mashi.
25Pamberi pa migongu hayeninyawiwi,
navidunda kugolusiwa pahala pakuyi neni weritikala,
26Pamberi Mlungu keninyawi pasipanu na malambu gakuyi,
pota lidikudiku lya pasipanu.
27Weriti shaka pakatuliti mpindi,
shaka pakatuliti mpaka panani pa bahari,
28shaka pakagangamaziyiti mawundi kumpindi
na pakazigamaziyiti mbwiru za pasi nentu,
29shaka pakayituliriti bahari mpaka zakuyi,
su mashi gakuyi kuloka mpaka zakuyi
na shaka pakayituliti miyanjiru ya pasipanu.
30Weriti pamuhera nayomberi handa fundi kaherepa,
weriti nemeleru yakuyi kila lishaka, panemelera kulongolu kwakuyi mashaka goseri,
31panemelelera toziya ya pasipanu poseri,
nakufiriziwa na wantu wakuyi.
32Vinu su wanawangu,
mumpikaniri,
mbaka walii yawafata njira zaneni.
33Mpikaniri mafunda mpati luhala,
pota namgalema.
34Mbaka muntu yakampikanira,
yakawera kila lishaka paligomi lyangu,
yakalikala masu pa kwingilira kwaneni.
35Mana yakampata neni kapata ukomu,
kapata upendelewu kwa Mtuwa Mlungu.
36Kumbiti yakampatandiri neni kalitenda mweni,
woseri yawankalalira wafira kuhowa.
Currently Selected:
Mesali 8: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.