Mesali 4
4
Kumota kwa Luhala
1Wanawangu, mpikaniri mafunda gwa tati gwenu, myambili likutu muweri na umani. 2Mana nankuwapanana malagalira maheri, gugaholi mafunda ganeni. 3Shaka paweriti mwana gwa tati, weriti mwana gwa gweka kwa mawu gwangu. 4Tati gwangu kafunditi: “Guvikoli kwa moyu visoweru vyangu, gukoli lagalira zyangu na hagulikali. 5Gupati luhala, gupati umani, nagulyaluwa pota kubeziya visoweru vyangu. 6Nagumleka luhala nayomberi hakakutuliweri, gumfiri nayomberi halukuloleri. 7Mlandu gwa mana nentu ndo kulipanana luhala; gulaviyi vyoseri vyaguweriti navi gupati umani. 8Gumsheri nentu luhala nayomberi hakakukwisi, pagumkolera hakakupanani ligoya. 9Hakakuvaliziyi shilemba shiherepa pamtuyi paku, hakakupanani lijenjeri lyaliherepeziyitwi.”
10Mwanagwangu, gupikanili na kwanka visoweru vyangu, su guweri na vinja vivuwa vya kulikala. 11Nikulanguziya njira ya luhala, nikulonguziya munjira yayimherepiziya Mlungu. 12Pagugendagenda kwahera shakukulowelera, na pagutuga hapenigulikwali. 13Gukoleri mafunda ga luhala nagumleka kakupoti, gugaloleri weri toziya ndo ukomu waku. 14Nagulingiziya munjira ya wakontola, pota nagufata vyawatenda wantu wadoda. 15Gulitulikutali na njira ayi pota naguyisegelera, gulekani nayi, gugendi zaku. 16Wakontola nakamu wagonjandiri pawatendandiri ukontola, wapatandiri mpota pawamtendandiri muntu. 17Waliya shiboga shashilawirana na ukondola, na kulanda divayi yayilawirana na ungesela.
18Kumbiti njira ya wantu waheri ndo handa gulangala gwa mandawira, gweni gulangala nentu na nentu ata paliwala poseri. 19Njira ya wantu wakontola ndo handa luwindu dunyu, washimanandiri shashiwatenda walikwali.
20Mwanagwangu gupikanili weri visoweru vyangu, guyambiri likutu galii gantakula. 21Nagugaleka gawuki, gugatuli mu moyu mwaku. 22Toziya aga ndo ukomu kwa muntu yakagapata, ndo mgota kwa nshimba yoseri. 23Guloleri weri moyu gwaku, toziya amu ndo kwazilawa mbwiru za ukomu. 24Nagutakula visoweru vyavipotiziya na milomu yaku nayitakula visoweru vya mpayu. 25Masu gaku galoli kulongolu kwa ugangamala, guloli kulongolu magenda. 26Guyitandi njira zyagupitira na maleka gaku hagaweri magangamala. 27Nagugalambuka kumliwu pota kumshigi, gukali kutali na ukontola.
Currently Selected:
Mesali 4: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.