Mawalanga 5
5
Wantu wahumba
1Mtuwa Mlungu kamgambiriti Musa, 2guwagambiri wana wa Israeli wamlaviyi kunja kukambi kila muntu yakawera na ungumbula na kila muntu yakalawa ufira na kila yakawera kahakata kulongolu kwa Mlungu kwa kushinkura mtugulu. 3Hamuwalaviyi kunja kukambi wantu woseri awa, wapalu na wadala su nawiza kutula uhakata mukambi zawu pahala panulikala pakati pawu. 4Wana wa Israeli watenditi ntambu ayi, wawawingiti kunja kukambi. Womberi watenditi gambira Mtuwa Mlungu ntambu yakamlagaliriti Musa.
Kuwuzilira kwa shilii shidoda shagutenditi
5Shakapanu Mtuwa Mlungu kamgambiriti Musa, 6Guwagambiri wana wa Israeli kuwera muntu yoseri, mpalu ama mdala pakamtendera vidoda kwa muntu yoseri ulii, pakahera uwaminika kulongolu kwa Mtuwa Mlungu, muntu ayu hakaweri na likosa. 7Muntu ayu mpaka katakuli vidoda vyakuyi vyakatenditi. Yomberi mpaka kalaviyi mawuziliru na hakawongeri yimu ya muhanu na hakampanani muntu ulii yakamtendiriti vidoda. 8Kumbiti paiwera muntu ulii yakatendiritwi vidoda kahowa na kahera mlongu kwa kuwanka fidiya ilii, su fidiya ilii hailaviwi kulongolu kwa Mtuwa Mlungu kwajili ya watambika, fidiya ayi pamuhera na nkanyama kondolu gwa shipalu kwajili ya tambiku ya kupunguwa toziya ya vidoda vyakuyi muntu ulii. 9Malaviwu goseri wana wa Israeli gawajegiti kwa mtambika, su malaviwu galii hagaweri ga mtambika. 10Su kila mafupu pagalaviwa kulongolu kwa Mtuwa Mlungu kwa kumjegera mtambika, su mafupu galii hagaweri ga mtambika.
Sitaka lya mdala yakawera ndiri mwaminika mundowa kwa mpalu gwakuyi
11Mtuwa Mlungu kamgambiriti Musa, 12Guwagambiri aga wana wa Israeli. Handa mdala yoseri ulii pakahera uwaminika kwa mpalu gwakuyi 13pakagonja na mpalu gwingi pota na mpalu gwakuyi ama muntu gwingi kumana, mdala ulii hakaweri kahakata kulongolu kwa Mlungu, kumbiti kwahera muntu yakawoniti pakatenditi shitwatira shakuwi shilii toziya wambatiti ndiri ugoni. 14Su mpalu gwakuyi pakahola na pakawera na weya kwa mdala gwakuyi yakalituliti uhakata, ama pakawera na weya na mdala gwakuyi tembera mdala gwakuyi kalituliti ndiri uhakata, 15shakapanu mpalu ulii hakamjegi mdala gwakuyi kwa mtambika. Yomberi hakalaviyi malaviwu shibaba shimu sha ubumu wa shayili, kumbiti ubumu ulii nawawulekera lipaki ama ubani toziya ilii iwera malaviwu ga viboga vya mpalu yakamuhola mdala gwakuyi katenda uhumba, malaviwu gagalaviwa kulanguziya handa nakaka mdala gwakuyi kawera na likosa ama kawera ndiri na likosa.
16Mtambika hakamjegi mdala ulii pakwegera na shitalawanda sha kutambikira na kumgolosiya kulongolu kwa Mtuwa Mlungu. 17Su hakamiminiri mashi mananagala mushiwiga shididini, hakatoli lidika lya pasi pa Liringu Linanagala na kuliyitira mumashi galii su kugatenda gakalipi. 18Mtambika pakamtula kala mdala ulii kulongolu kwa Mtuwa Mlungu, mtambika hakazigubutuli mvili za mdala ulii na kumpanana malaviwu galii ga viboga yagalaviituwi toziya mpalu gwakuyi kamuholiti kuwera kagonja na mpalu gwingi. Mtambika hakashikoleli shombu shilii shashiwera na mashi makaripa yagajega mpangiru. 19“Shakapanu mtambika hakamlapiziyi mdala ulii pakalonga. Payiwera gugonjiti ndiri na mpalu gwingi na gulitula ndiri uhakata paguwera pasi pa mpalu gwaku, su hapeni gupati mpangiru yaijeguwa na mashi aga makaripa.” 20“Kumbiti handa gutenda vidoda uganu gwapasi pa mpalu gwaku, gulitula uhumba kwa kugonja na mpalu gwingi, mpalu yakawera ndiri mpalu gaku,” 21“Mtambika kamlapiziyi mdala ulii shirapu sha mpangiru na kumgambira mdala uii, Mtuwa Mlungu kakukomangi guweri na mpangiru pakati pa wantu waku, guweri mpendi na mtima gwaku guvimbi.” 22“Mashi aga yagajega mpangiru gingiri mumtima mwaku na gakutendi guweri mpendi na mtima gwaku guvimbi.
Na mdala ulii hakajimiri, yina haa.”
23Su mtambika hakagalembi mpangiru azi mushintola na kuzigulula mumashi makaripa, 24shakapanu hakamlandasiyi mdala ulii mashi makaripa galii yagajega mpangiru, mashi galii hagamwingiri munshimba mwakuyi na kumtenda kaweri na utama ukaripa nentu handa katenda aga. 25Su mtambika hakayanji hakatoli malaviwu ga viboga virii vya weya mumawoku mwa mdala ulii na kuinyasula kulongolu kwa Mtuwa Mlungu na kuijega pashitalawanda sha kutambikira. 26Shakapanu mtambika hakatoli liwoku limu lya malaviwu ga viboga kuwera maholuziwu na kugalunguziya pashitalawanda sha kutambikira. Upeleru mtambika hakamlandisiyi mdala ulii mashi galii. 27Pakalanda kala, handa kalituliti uhakata na kaweriti ndiri maminika kwa mpalu gwakuyi, mashi galii gagajega mpangiru hagamtendi kaweri na utama mkaripa nentu munshimba na nshimba yakuyi hayivimbi na mtima gwakuyi gwa kulera mwana hagwaribiki. Mdala ulii hakaweri na mpangiru pakati pa wantu wakuyi. 28Handa mdala ulii pakajimilika kulongolu kwa Mlungu na kawera ndiri na likosa, su hapeni kambuki na hakawezi kupata wana.
29Su aga ndo malagaliru ga weya payiwera mdala kagonja na mpalu yakawera ndiri gwakuyi na kajimilika ndiri kulongolu kwa Mlungu, uganu kayugitwi kala, su yomberi hakalituli mweni uhakata kulongolu kwa Mlungu, 30ama shaka mpalu pakawera na weya na kumuhola mdala gwakuyi kuwera na kagonja na mpalu gwingi. Yomberi hakamgolosiyi mdala ulii kulongolu kwa Mtuwa Mlungu, mtambika hakagatendi malagaliru goseri galii. 31Mpalu gwakuyi hapeni kaweri na shidoda shoseri, kumbiti mdala hakatozwi kulawirana na shidoda shilii shakatenditi.
Currently Selected:
Mawalanga 5: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.