Mawalanga 4
4
Mahengu gawapananituwi wantu wa Kohatihi
1Mtuwa Mlungu kawagambiriti Musa na Aruni, 2guwawalangi wantu wa lukolu lwa Kohati, ulii lwaluwera mushiyiwuku sha Lawi kugenderana na lukolu na kaya zawu. 3Guwawalangi wapalu woseri yawawera na vinja malongu matatu mpaka vinja malongu muhanu, wizi watendi mahengu Kuliringu Linanagala.
4Ali liwera lihengu lya wantu wa Kohati Kuliringu Linanagala, womberi hawavilori weri vintu vinanagala nentu. 5Shaka sha mwenga kuwuka kugenda pahala pamonga, Aruni pamuhera na wana wakuyi hawingiri Kuliringu na kuliwusiya lipaziya lyalilekaniziya Pahala Pananagala Nentu na Pahala Pananagala. Womberi hawaligubiki Lisanduku lya Lipatanu kwa lipaziya ali. 6Shakapanu womberi hawagubiki lukuli linama lya mbuzi, viraa hawagubiki kwa nguwu ya buluu iherepa na hawatuli mibiki ya kupapira lisanduku ali.
7Pambindi pa shitalawanda shashiwera kulongolu kwa Mtuwa Mlungu sha kulavilira mabumunda, hawayaliki nguwu ya buluu na panguwu ayi hawatuli sahani na visahani vya kutulila ubani, mabakuli na vikombi kwajili ya kulavilira tambiku ya virandu, libumunda halyendereyi kuwera pashitalawanda ashi. 8Shakapanu hawavigibikili vyombu avi vyoseri kwa nguwu nsheri, na panguwu ayi hawagubiki kwa lukuli linama lya mbuzi na hawatuli mibiki ya kupapira mupeti ya shitalawanda ashi.
9Womberi hawatoli nguwu ya buluu na kushigubikira shintambi sha shikoluboyi pamuhera na vikoluboyi vyakuyi na mikasi yakuyi na masiniya gakuyi pamuhera na vyombu vyakuyi vyavilekeruwa lipaki lya mizyetuni. 10Hawavituli pamuhera na vyombu vyoseri vyavigubikiruwa kwa lukuli linama lya mbuzi na kuvitawa pamibiki ya kupapira.
11Shakapanu hawayaliki nguwu ya buluu pashitalawanda sha zahabu ya kutumiziya ubani na kugubikira kwa lukuli linama lya mbuzi na hawatuli mupeti zilii mibiki ya kupapira.
12Havitoli vyombu vyoseri vyavitenderuwa Pahala Pananagala, hawavitawi kwa nguwu ya buluu na kuvigubika kwa lukuli linama lya mbuzi, shakapanu hawavituli pamibiki yakuyi ya kupapira.
13Womberi hawawusiyi livu kulawa mushitalawanda sha shaba sha tambiku ya kulunguziya na pashitawalanda hawayaliki nguwu ya zambalawu. 14Panguwu ayi hawatuli vyombu vyoseri vyawavitendera pashitalawanda sha kutambikira, hawatuli sepetu na uma wa kubanira vinofu na mbundi na mabakuli ga kutulila mwazi gwa kuwamishira wantu. Pavintu avi hawayaliki lukuli linama lya mbuzi na kutula mibiki ya kupapira.
15Pa Aruni na wana wakuyi pawamalila kupagubika Pahala Pananagala pamuhera na vyombu vyakuyi vyoseri, pawawera kala kugenda mwanja, wantu wa lukolu lwa Kohatihi hawizi na kuvipapa. Kumbiti hapeni wavishinkuli vintu vinanagala, pawavishinkula hawahowi. Wantu wa Kohatihi hawavipapi vintu virii vyaviwera Muliringu Linanagala.
16Eleazari mwana gwa mtambika Aruni hakaliloli weri lipaki lya mzyetuni na ubani wa ununkira na tambiku za viboga za kila lishaka na lipaki lya kutyekuwa. Eleazari hakagolokeri lihengu lyalitenduwa Kuliringu Linanagala pamuhera na kuwagolokera walii yawalola weri kila shintu shashiwera Kuliringu ali.
17Shakapanu Mtuwa Mlungu kamgambiriti Musa na Aruni, 18namuleka lukolu lwa Kohatihi lyagamili kulawa kwa wantu wa Lawi. 19Su kuwatenda womberi nawahowa kwa kuvisegelera vyombu avi vinanagala nentu gwenga hagutendi hangu, Aruni pamuhera na wana wakuyi hawaingiri na kumpanana kila muntu shintu shakutenda ama lihengu lyakuyi. 20Kumbiti wantu wa Kohatihi hapeni wingiri kuvilola vintu avi vinanagala nentu, pawavilola womberi hawahowi.
Lihengu lya wantu wa Lawi wa lukolu lya Gerishoni
21Mtuwa Mlungu kamgambiriti Musa, 22Guwawalangi viraa wantu wa Gerishoni kulawirana na lukolu na kaya zawu. 23Guwawalangi wapalu woseri yawawera na vinja malongu matatu mpaka vinja malongu muhanu walii yawiza kutenda lihengu Kuliringu Linanagala.
24Lihengu lyawu haliweri ali, 25womberi hawagajegi mapaziya ga Liringu Linanagala na Liringu Linanagala lyeni, mfiniku gwakuyi, mfiniku gwa lukuli linama lwa mbuzi lyaliwera panani pakuwi na lipaziya lya lugomi lwa Liringu Linanagala. 26Viraa hawalitoli lipaziya lya mdamu lyalizyengeta Liringu Linanagala na pashitalawanda sha kutambikira na lipaziya lya lugomi lya Liringu Linanagala na ngoyi pamuhera na vyombu vyakuyi vyoseri vya Mulirirngu. Wantu wa Gerishoni hawatendi mahengu aga goseri gagatendiruwa muvintu avi. 27Aruni pamuhera na wana wakuyi watambika hawagolokeri mahengu goseri gawatenda shiyiwuku sha Gerishoni. Haguwapanani vintu vyoseri virii vyawagenda kupapa. 28Ali ndo lihengu lya shiyiwuku sha Gerishoni Kuliringu Linanagala. Mahengu gawu hagagololekeruwi na Itihamari mwana gwa mtambika Aruni.
Mahengu ga Walawi wa lukolu lwa Merari
29Viraa haguwawalangi wana wa Merari kugenderana na lukolu lwawu na kaya zawu. 30Haguwawalangi wapalu woseri yawawera kwanjira vinja malongu matatu mpaka vinja malongu muhanu yawiza kutenda mahengu Kuliringu Linanagala. 31Ali haliweri lihengu lyawu lyawagenda kutenda Kuliringu Linanagala. Womberi hawatoli fulemu za Liringu ali, viraa hawatoli mpanda zakuyi na migomba yakuyi na vikalilu vyakuyi. 32Viraa virii womberi hawatoli mpanda pamuhera na vikalilu vyakuyi zyazizengetira mdamu na mambu na ngoyi zakuyi pamuhera na vintu vyamonga vya kunyawira. Su gwenga haguwalagaliri womberi kulawirana na matawu gawu muvintu vyawagenda kupapa. 33Ali haliweri lihengu lya wantu wa shiyiwuku sha Merari lyawagenda kutenda Kuliringu Linanagala muugolokera wa Itihamari mwana gwa mtambika Aruni.
Kuwalangwa kwa Walawi
34Su Musa na Aruni na wakulu wa shipinga shoseri wawalangawiti shipinga shoseri sha wantu wa shiyiwuku sha Kohatihi kulawirana na kaya zawu. 35Wapalu woseri yawawera na vinja kwanjira malongu matatu mpaka malongu muhanu, walii yawiziti kutenda mahengu Kuliringu Linanagala, 36wapalu woseri yawalangaliwituwi waweriti elufu mbili na miya saba na malongu muhanu. 37Ayi walanga ya wantu woseri mushiyiwuku sha Kohatihi, walii yawatenditi mahengu Kuliringu Linanagala. Musa na Aruni wawawalangiti gambira Mtuwa Mlungu ntambu yakalagaliriti kupitira Musa.
38Wantu woseri wa shiyiwuku sha Gerishoni kugenderana na kaya zawu, 39walii yawaweriti na vinja kwanjira malongu matatu mpaka vinja malongu muhanu yawiziti kutenda mahengu Kuliringu Linanagalana, 40waweriti wantu elufu mbili miya sita na malongu matatu. 41Ayi ndo iweriti walanga ya wantu walii yawaweriti mushiyiwuku sha Gerishoni yawatenditi mahengu Kuliringu Linanagala. Musa na Aruni wawawalangiti gambira Mtuwa Mlungu ntambu yakalagaliriti. 42Walanga ya wantu wa shiyiwuku sha Merari kulawirana na kolu na kaya zawu, 43wapalu walii yawaweriti na vinja kwanjira malongu matatu mpaka vinja malongu muhanu, yawatenditi mahengu Kuliringu Linanagala, 44waweriti wantu elufu tatu na miya mbili. 45Su ayi iweriti walanga ya wantu wa shiyiwuku sha Merari, wantu walii Musa na Aruni wawalangiti gambira Mtuwa Mlungu ntambu yakamlagaliriti Musa.
46Su Musa na Aruni pamuhera na wakulu wa wantu wa Israeli wawawalangiti wantu woseri wa Lawi kulawirana na kolu zawu na kaya zawu. 47Wapalu woseri yawaweriti na vinja kwanjira malongu matatu mpaka vinja malongu muhanu, walii yawiziti kutenda mahengu na kulipapa Liringu Linanagala 48woseri waweriti elufu nani na miya muhanu na malongu nani. 49Kila yumu kapananituwi lihengu lyakuyi lya kupapa Liringu Linanagala gambira Mtuwa Mlungu ntambu yakamlagaliriti Musa.
Currently Selected:
Mawalanga 4: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.