Mawalanga 28
28
Tambiku za kila lishaka
Kulawa 29:38-46
1Mtuwa Mlungu kamgambiriti Musa, 2guwalagaliri Waisraeli ntambu ayi. Mwenga hamundaviliri kwa shaka shakuwi tambiku zyazifiruwa. Viboga vya kulunguziya nakamu kwa motu, virii vyaviwera na ununkira uherepa. 3Guwagambiri kuwera tambiku yawagenda kundavilira tambiku ya kulunguziya nakamu, su hayiweri hangu. Wana wa kondolu wawili wa shinja shimu yawahera shilema shoseri, kwajili ya tambiku ya kulunguziwa kila lishaka. 4Mwana gwa kondolu yumu hakalaviwi mandawira na yumonga pamihi 5na kila yumu hakalaviwi pamuhera na tambiku ya viboga ya kilu yimu ya ubumu uherepa yauhanganyikituwi pamuhera na lita yimu ya lipaki liherepa lya mzyetuni. 6Ayi iwera tambiku yailaviwa kila lishaka yailunguziwa nakamu mumotu, tambiku ilii yailaviwituwiti kwa mala ya kwanja kulugongu lwa Sinayi gambira tambiku ya shiboga yaiwera na ununkira uherepa wa kumuherepeziya Mtuwa Mlungu. 7Tambiku ya shirandu yailaviwa na kila mumwanagwa kondolu hayiweri lita yimu ya divai. Gwenga Haguimiminiri tambiku ayi ya shirandu sha ujimbi pahala Pananagala. 8Shaka sha pamihi hagumlaviyi mwana gwa kondolu ulii yumonga gambira tambiku ya viboga na gambira tambiku ya shirandu haguilaviyi gambira tambiku ya kulunguziwa nakamu, tambiku yaiwera na ununkira uherepa wa kumuherepeziya Mtuwa Mlungu.
Tambika ya Lishaka lya Kwoyera
9Lishaka lya Kwoyera, mwenga hamulaviyi tambiku ya wana kondolu wawili washipalu wa shinja shimu yawahera shilema, tambiku ya viboga ya kilu mbili za ubumu unama yauhanganyikituwiti na lipaki, na tambiku yakuyi ya virandu. 10Tambiku ayi ya kulunguziwa hayilaviwi kila lishaka lya Kwoyera pota kuleka tambiku ya kila Lishaka pamuhera na tambiku yakuyi ya virandu.
Tambiku za kila mwezi
11Kila pakwanjira mwezi, hamumlaviliri Mtuwa Mlungu tambiku ya kulunguziwa nakamu, ng'ombi washipalu wawili yawakamala ndiri na kondolu gwashipalu yumu na wana wa kondolu washipalu saba wa shinja shimu, walii yawahera shilema. 12Hamlaviyi tambiku ya viboga vya ubumu unama kilu tatu, yauhanganyikiwituwi na lipaki kwa kila ng'ombi yumu na hamulaviyi kilu mbili za ubumu kwa kila kondolu gwashipalu, 13na kilu yimu ya ubumu kwa kila mwana gwa kondolu. Tambiku azi zyaziwera za kulunguziwa ndo tambiku ya shiboga yana ununkira wa kumuherepeziya Mtuwa Mlungu. 14Shipimu sha tambiku ya shilandu shashifiruwa hashiweri lita mbili za divayi kwa kila ng'ombi gwashipalu, lita nyimu na nusu kwa kila kondolu gwashipalu na lita yimu kwa kila mwana gwa kondolu. Ayi ndo tambiku ya kulunguziya nakamu kila mwezi mushinja shoseri. 15Kayi hamumlaviliri Mtuwa Mlungu tambiku ya kuwusiya vidoda, hawalaviyi mbuzi gwashipalu yumu pota kuleka tambiku ya kulunguziwa ya kila lishaka na tambiku yakuyi ya virandu.
Tambiku ya Pasaka
Walawi 23:5-14
16Lishaka lya lilongu na msheshi mumwezi gwa kwanja, hayiweri Pasaka ya Mtuwa Mlungu. 17Lishaka lya lilongu na muhanu mumwezi gulaa agu hakuweri msambu gwa mabumunda yagalekeruwa ndiri simika. Kwa mashaka saba mwenga hamliyi mabumunda yagalekeluwa ndiri simika. 18Mulishaka lya kwanja mumsambu agu, mwenga hamjojoniki kunguwira neni, mwenga mfiruwa ndiri kutenda mahengu goseri galii. 19Mulishaka ali mwenga hamulaviyi tambiku ya kulunguziwa nakamu gambira tambiku ya shiboga kwa Mtuwa Mlungu. Hamlaviyi tambiku ya wang'ombi washipalu wawili yawakamala ndiri na kondolu gwashipalu yumu na wana wa kondolu washipalu saba wa shinja shimu, woseri waweri wahera shilema. 20Tambiku ya viboga yailaviwa pamuhera na tambiku zyamonga, hayiweri tambiku ya ubumu uherepa yauhanganyiwituwi na lipaki, kilu ndatu kwa kila ng'ombi gwashipalu na kilu mbili kwa kila kondolu gwashipalu, 21kilu yimu kwa kila yumu gwa wana wa kondolu walii saba. 22Hamlaviyi viraa mbuzi pongu yumu kuwera tambiku ya kuwusiya vidoda su muwuziwi kwa Mtuwa Mlungu. 23Hamlaviyi vintu avi pota kuleka tambiku ya kulunguziwa nakamu gambira tambiku zyamonga zyazilaviwa kila mandawira. 24Kwa njira ayi mtandiri shiboga kwajili ya tambiku ya kulunguziwa nakamu kila lishaka kwa mashaka saba kuwera tambiku yaiwera na ununkira uherepa wa kumuherepeziya Mtuwa Mlungu. Tambiku ayi hamuilaviyi pota kuleka tambiku ilii ya kulunguziwa nakamu kila lishaka pamuhera na tambika yakuyi ya virandu. 25Mulishaka lya saba mumsambu, mwenga hamujojoniki pamuhera kunguwira neni, mwenga mfiruwa ndiri kutenda lihengu lyoseri.
Tambiku ya msambu gwa mabenu
Walawi 23:15-22
26Mulishaka lya kwanja lya msambu gwa mabenu, mwenga pamumlavilira Mtuwa Mlungu mabenu gasyai ga viboga vyenu, mwenga hamujojoniki kunguwira neni, namtenda lihengu lyoseri. 27Hamlaviyi tambiku ya kulunguziwa nakamu, wang'ombi washipalu wawili yawakamala ndiri nentu na kondolu gwashipalu yumu na wakondolu washipalu saba wa shinja shimu, woseri waweri wahera shilema. 28Tambiku ya viboga hailaviwi pamuhera na ubumu uherepa yauhanganyikituwi lipaki kilu tatu kwa kila ng'ombi, na kilu mbili kwa kila kondolu gwashipalu, 29na kilu yimu kwa kila mwana gwa kondolu. 30Mwenga hamulaviyi viraa mbuzi gwashipalu yumu kuwera tambiku ya kuwusiya vidoda su kumbuyira neni. 31Hamulaviyi vintu avi pota kuleka tambiku ya kulunguziwa gambira tambiku zyamonga pamuhera na tambiku yakuyi ya virandu.
Currently Selected:
Mawalanga 28: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.