Mawalanga 1
1
Kuwalangwa kwa wapalu woseri wa Israeli
1Mulishaka lya kwanja lya mwezi gwa pili shinja sha pili, pa wana wa Israeli kulawa Misri, Mtuwa Mlungu kayoweriti na Musa Muliringu Linanagala kushiwala Sinayi, kamgambiriti hangu, 2gwenga pamuhera na Aruni mushiwalangi shipinga shoseri sha wana wa Israeli, kaya yimu yimu kulawirana na kaya zawu na lukolu zawu. Gugalembi matawu ga wapalu woseri 3mushipinga sha wantu wa Israeli, walii yawaweza kugenda kulikomanga ngondu, wapalu walii yawawera na vinja malongu mawili na kwendeleya, hamuwatuli muvipinga vipinga. 4Numsyagula mpalu yumu kulawa mukila likabila kuwatanga mwenga. Kila yumu hakaweri mkulu gwa lukolu lwakuyi. 5Aga ndo matawu ga wakulu yawagenda kukutanga,
Kulawa likabila lya Rubeni, kaweriti Elisuri mwana gwa Sheduri, 6Kulawa likabila lya Simiyoni, kaweriti Shelumieli mwana gwa Surishadai.
7Kulawa likabila lya Yuda, kaweriti Nashoni mwana gwa Amunadabu.
8Kulawa likabila lya Isakari, kaweriti Nataneli mwana gwa Suari,
9Kulawa likabila lya Zebuluni, kaweriti Eliabu mwana gwa Heloni.
10Kulawa likabila lya Efraimu, kaweriti Elishama mwana gwa Amihudi,
Kulawa likabila lya Manase, kaweriti Gamalieli mwana gwa Pedasuri.
11Kulawa likabila lya Benjamini, kaweriti Abidani mwana gwa Gidioni.
12Kulawa likabila lya Dani, kaweriti Ahiezeli mwana gwa Amishadai.
13Kulawa likabila lya Asheri, kaweriti Pagieli mwana gwa Okurani.
14Kulawa likabila lya Gadi, kaweriti Eliasafu mwana gwa Deuweli.
15Kulawa likabila lya Nafutali, kaweriti Ahira mwana gwa Enani.
16Awa ndo wakulu yawasyagulitwi kulawa mushipinga shoseri sha wana wa Israeli kuwera wakulu wa makabila gawu. Womberi wawera wakulu mukolu za wana wa Israeli. 17Su Musa na Aruni wawatoliti wantu woseri matawu gagakantituwi, 18su womberi wawajojonikiti wantu woseri na mulishaka lilaa lii lya kwanja lya mwezi gwa pili wajojonira pamuhera wantu woseri mulishaka lilii lya kwanja mumwezi gwa pili. Womberi wagalembiti matawu ga wapalu woseri yawaweriti na umuli gwa vinja malongu mawili na kwendeleya, matawu gawu wagalembiti kulawirana na kaya zawu na lukolu lwakuyi, 19gambira Mtuwa Mlungu ntambu yakamlagaliriti Musa. Su Musa kawawalangiti womberi kushiwala sha Sinayi. 20Wantu yawalawiti mulikabila lya Rubeni, ulii yakaweriti shipanta njira gwa Yakubu ulii yakashemwa Israeli, wapalu woseri yawaweriti na vinja malongu mawili na kwendeleya yakafaa, womberi wingiriti mushonta. Walii yawalembituwi matawu gawu, yumu yumu. Kulawirana na kulembuwa kulawa mukolu zawu na kaya zawu, 21waweriti wantu elufu malongu msheshi na sita na miya muhanu. 22Kulawa mulikabila lya Simiyoni, wapalu woseri yawaweriti na vinja malongu mawili na kwendeleya yawafaa, womberi wingiriti mushonta. Walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu, 23waweriti wantu elufu malongu muhanu na tisa na miya tatu. 24Kulawa mulikabila lya Gadi, wapalu woseri yawaweriti na vinja malongu mawili na kwendeleya yawafaa, womberi wingiriti mushonta. Walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu, 25waweriti elufu malongu msheshi na miya sita na malongu muhanu. 26Kulawa mukabila lya Yuda, wapalu woseri yawaweriti na vinja malongu mawili na kwendeleya yawafaa, womberi wingiriti mushonta. Walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu. 27Wapalu yawalawiti mulikabila lya Yuda waweriti elufu malongu saba na msheshi na miya sita. 28Kulawa mukabila lya Isakari, wapalu woseri yawaweriti na vinja malongu mawili na kwendeleya, womberi wingiriti mushonta, walii yawalembituwi matawu gawu, yumu yumu kulawirana na kulembwa kulawa munkolu nzyawu na kaya zawu. 29Wapalu yawalawiti mulikabila lya Isakari waweriti elufu malongu muhanu na msheshi na miya msheshi. 30Kulawa mulikabira lya Zebuluni, wapalu woseri yawaweriti na vinja malongu mawili na kwendeleya, womberi wingiriti mushonta, walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu. 31Wapalu yawalawiti mulikabila lya Zebuluni waweriti elufu malongu muhanu na saba na miya msheshi. 32Kulawa mulikabila lya Efraimu mwana gwa Yusufu, wapalu woseri yawaweriti na vinja malongu mawili na kwendeleya, womberi wingiriti mushonta, walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu. 33Wapalu yawalawiti mulikabila lya Efraimu waweriti elufu malongu msheshi na miya muhanu. 34Kulawa mulikabila lya Manase mwana gwa Yusufu, wapalu woseri yawaweriti na vinja malongu mawili na kwendeleya, womberi wingiriti mushonta, walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu. 35Wapalu yawalawiti mulikabila lya Manase waweriti elufu malongu matatu na mmbili na miya mbili. 36Kulawa mulikabila lya Benjamini, wapalu woseri yawaweriti na vinja malongu mawili na kwendeleya, womberi wingiriti mushonta, walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu. 37Wapalu yawalawiti mulikabila lya Benjamini waweriti elufu malongu matatu na muhanu na miya msheshi. 38Kulawa mukabila lya Dani, wapalu woseri yawaweriti na vinja malongu mawili na kwendeleya, womberi wingiriti mushonta, walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu. 39Wapalu yawalawiiti muikabila lya Dani waweriti elufu malongu sita na mbili na miya saba. 40Kulawa mulikabila lya Asheri, wapalu woseri yawaweriti na vinja malongu mawili na kwendeleya, womberi wingiriti mushonta, walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu. 41Wapalu yawalawiti mulikabila lya Asheri waweriti elufu malongu msheshi na yimu na miya muhanu. 42Kulawa mulikabira lya Nafutali, wapalu woseri yawaweriti na vinja malongu mawili na kwendeleya, womberi wingiriti mushonta, walii yawalembituwi matawu gawu, yumu yumu kulawirana na kulembuwa kulawa mukolu nzyawu na kaya zawu. 43Wapalu yawalawiti mulikabila lya Nafitali waweriti elufu muhanu na ntatu na miya msheshi. 44Awa ndo wapalu yawalangatiwu na Musa pamuhera na Aruni pawatangituwi na wakulu wa wana wa Israeli, kila yumu pakaliwakilisha likabila lyakuyi. 45Su wapalu woseri wa Israeli yawawera na vinja malongu mawili na kwendeleya, walii yawaweza kwingira mushonta lya Israeli 46woseri waweriti wantu laki sita na ntatu na miya muhanu na malongu muhanu.
47Kumbiti wantu wa Lawi walangatuwa ndiri pamuhera na makabila gamonga, 48toziya Mtuwa Mlungu kamgambiriti Musa, 49naguliwalanga likabila lya Lawi, kayi naguwawalanga pamuhera na wana wa Israeli, 50kumbiti guwasyaguli waweri walolera wa Liringu Linanagala na vyombu vyakuyi vyoseri na kila shintu shashiwera mla, womberi hawalipapi Liringu ali pamuhera na vyombu vyakuyi vyoseri. Hawatendi lihengu Muliringu Linanagala na kunyawa malingu gawu kuzyengeta Liringu Linanagala. 51Kayi shaka sha Liringu Linanagala kuwuka kugenda pahala pingi, wantu wa Lawi hawalitupuli na shaka sha kuligolosiya, wantu wa Lawi ndo hawalibawili, kila yakalisegelera hakalagwi. 52Wantu wamonga wa Israeli hawanyawi malingu gawu mupahala pawu na womberi hawatuli bendera kulanguziya shipinga shakuwi. 53Kumbiti wapalu mulikabila lya Lawi hawanyawi malingu gawu kuzyengeta Liringu Linanagala, pawalilolera su muntu yoseri nakiza kuliharabisiya na kujega maya gangu gaweri kwa shipinga sha wana wa Israeli. Su wantu wa Lawi hawaliloleri weri Liringu Linanagala. 54Su wantu wa Israeli watenditi kila shintu gambira Mtuwa Mlungu ntambu yakamlagaliriti Musa.
Currently Selected:
Mawalanga 1: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.