Malaki 3
3
1“Mtuwa Mlungu yakana makakala goseri kalonga, mloli, nimlagaliri mlagilagi gwangu hakayitandi njira kulongolu kwangu. Mtuwa yamumsakula hakizi munumba yakuyi. Mlagilagi yamumhepera hakizi kubwera lipatanu lyaneni.”
2Kumbiti gaa yakaweza kuhepelera lishaka ali lya kwiza kwakuyi? Gaa yakaweza kugoloka pakalawira? Toziya yomberi kawera handa motu gwa kupondera feza ama handa sabuni yakaputa nguwu. 3Yomberi hakizi kutoza handa muntu yakagulula feza na zahabu na yomberi hakawatakasiyi Walawi. Shakapanu Mtuwa Mlungu hakaweri na wantu yawajega tambiku yazimfiliziya. 4Su, tambiku za wantu wa Yuda na wa Yerusalemu hazimfiliziyi Mtuwa Mlungu, handa za wantu wa makashu.
5“Mtuwa Mlungu yakana makakala goseri kalonga, hanizi kuwatoza. Na neni handaviyi ukapitawu wa kalongola kwa wahawi na wahumba, yawalirapa kwa mpayu, yawawiwira vibaluwa shibenamgonga shawu, yawawawonera wakenja na washiwa na yawawima wahenga shawafiruwa, kumbiti wantu awa wantira ndiri neni.
Malaviwu ga lirongu
6Neni Mtuwa Mlungu ng'alambuka ndiri. Toziya ya shilii shantakuliti ndo mana mwega wiwuka wa Yakobu hamweniagamiziwi. 7Kwanjira shaka sha wambuyi wenu mgalambukira kutali na lagalira zaneni na mzikola ndiri. Su mmbuyili neni na neni haniwawuyili mwenga, kalonga Mtuwa Mlungu Yakana Makakala Goseri. Kumbiti mwenga mkosiya, tukuyili kwa ntambu gaa? 8Hashi, muntu kaweza kumwiwira Mlungu? Kumbiti mwankuniwira neni. Su mwenga mkosiya, twankukwiwira kwa ntambu gaa? Mwankuniwira malavuwu ga lirongu na tambiku. 9Mwenga na isi yoseri mwankupangirwa, toziya ya kuniwira neni. 10Mjegi malaviwu ga lirongu mluhanja, su shiweri shiboga munumba yangu. Munjeri mu ali, Kalonga Mtuwa Mlungu Yakana Makakala Goseri na mwenga mloli handa haniwavuguliri ndiri madilisha ga kumpindi na kuwawitilira tekelela zivuwa mpaka pawerindiri pahala pakutulira. 11Neni kwajili ya mwenga hanimkalipili yomberi yakaliya na kuhalibisiya viboga vya litapaka lyenu na mzabibu gwenu hapeni gupulutisiyi mabwajubwaju gakuyi pamberi pa shaka shakuyi, kalonga Mtuwa Mlungu Yakana Makakala Goseri. 12Maisi goseri hawawashemi mwenga wantu yamtekeleritwi mana isi yenu hayiweri ya kuherepa nentu. Neni Mtuwa Mlungu, Mlungu Mkulu ntakula.”
Lipatanu lya Mlungu lyakulekeziya vidoda
13Mtuwa Mlungu kalonga hangu, mtakula visoweru vikamala kwa neni. “Kumbiti mkosiya, tulonga shishi kwa gwenga? 14Mwenga mlonga, kumtendera Mlungu kwahera mota. Kwana mota gaa kugajimira malagaliru ga Mtuwa Mlungu yakana makakala goseri, ama kujera kumlanguziya kuwera tutenda vidoda kulongolu kwakuyi kwa kudaya? 15Kumbiti vinu wana mtiti watekelerwa. Nakaka yawatenda madoda wanampatiru, ata walii yawasingana na Mlungu ndo yawaponeka
16Wantu walii yawamguwiliti Mtuwa Mlungu wayoweriti weni gweka na Mtuwa Mlungu kapikanira kuyowera kwawu. Shitabu sha maholu shilembwa kulongolu kwakuyi kwajili ya walii yawamguwiliti Mtuwa Mlungu na kulipanana ligoya litawu lyakuyi. 17Na womberi hawaweri wantu waneni. Kalonga Mtuwa Mlungu Yakana Makakala Goseri, mlishaka lilii haniwatendi wantu awa kuwera luhanja lwangu. Haniwawoneri lusunga, handa muntu yakamwonera lusungu mwana gwakuyi. 18Shakapanu wantu wa neni hawawoni ntambu ya gweka pakati pa wantu yawamfiriziya Mlungu na wakontola, pakati pa walii yawamtendera Mlungu na walii yawamtendera ndiri.”
The Bible version in the Pogoro Language. @The Word for The World International and Pogoro Language translation. All rights reserved.