Luka 24

Kuzyuka kwa Yesu

Matayu 28:1-10; Mariku 16:1-8; Yohani 20:1-10

1Jumapili mandawira pee, wadala walii wagenditi kulipumba pawatola na utuli ulii yawaunyawiti. 2Wawoniti libuwi lilii libilingisiwa pampenku pa lipumba. 3Pawingiriti mngati, wawoniti ndiri nshimba ya Mtuwa Yesu. 4Wagolokiti palii na waweriti wankulishera kwajili shisoweru shilii, kamukamu hera wantu wawili wazivaliti nguwu zing'ereng'eta neru mbuu wagolokiti pakwegera na womberi. 5Wadala walii wingiritwi na lyoga, wasuntama. Su wantu walii wawagambira, “Iwera ashi mwankumsakula mkomu pakati pa wahowiti? 6Ka panu ndiri, kazyuka kala! Mliholi galii gakawagambirani pakaweriti kulii Galilaya, 7‘Mwana gwa Muntu mpaka wamlaviyi kwa wantu wanavidoda, nayomberi hawamkong'onderi misumali mulupingika na lishaka lya tatu hakazyuki kwanjira pakahowiti’ ”

8Wadala walii waliholiti vyakatakuliti Yesu, 9walawiti mulipumba, na watakuliti vintu avi vyoseri kwa wantumintumi walii lilongu na yumu na wamonga wawaweriti paliya. 10Hashina Mariya Magidalena na Yoana na Maliya mawu gwa Yakobu, pamuhera na wadala wamonga wawagenditi nawomberi ndo watakuliti vintu vilii kwa wantumintumi. 11Kumbiti wantumintumi pawapikaniriti ntambu yawatakuliti wadala walii wahera mana, su wawajimilira ndiri. 12Su Peteru kalawiti na kagenda pakatuga mpaka kulipumba, kasuntama na kawoniti sanda hera. Kawuyiti ukaya pakawera kankulihola kwajili ya galii yagalawiriti.

Mwanja kugenda Emau

Mariku 16:12-13

13Lishaka lilalirii, wantu wawili mngati mwa wantu yawamfata Yesu waweriti wankugenda mushijiji shawashishemiti Emawu, utali wa kilumita lilongu na yimu kulawa Yerusalemu, 14na waweriti wankuyowera kwajili ya goseri galii yagalawiriti. 15Pawaweriti wankuyowera na kuligambiziyana, Yesu mweni kalawira na kugenda pamuhera nawomberi. 16Wamwoniti kwa masu, kumbiti wamumana ndiri. 17Yesu kawakosiya, “Mwankuyowera shishi pamgendagenda?”

Womberi wagoloka jii, sheni zyawu zihinginikiti. 18Muntu yumu pakati pawu, yawamshema Kileopa, kamkosiya, “Hashi gwenga gwa muhenga gweka yaku Kuyerusalemu yaguvimana ndiri vitwatira yavirawiriti kulii mashaka aga?”

19Yesu kawakosiya, “Vitwatila gaa?”

Womberi wamwankula, “Vitwatira vyavimpatiti Yesu gwa Nazareti. Muntu ayu kaweriti mbuyi gwa Mlungu kana uwezu kulongolu kwa Mlungu na kulongolu kwa wantu, mukila shintu shakatakuliti na kutenda. 20Watambika wakulu na wakolamlima wetu wamlaviya wamtozi kuhowa, na wampingikiti palupinjika. 21Na twenga tulitumbira handa mweni ndo kaweri yumu yakagenda kuikombola Israeli! Gamonga ga aga goseri, leru ndo lishaka lya tatu kwanjira vitwatira avi pavirawiriti. 22Wadala wamu mushipinga shetu watusintuziya, pawagenditi kulipumba mandawira pee, 23su wayiwoniti ndiri nshimba yakuwi. Wawuyiti pawalonga handa walawiritwi na wantumintumi wa kumpindi, pawawagambiriti handa kaweriti mkomu. 24Wamonga mushipinga mwetu wagenditi kulipumba, wawona galii gawatakuliti wadala walii, su mweni wamwona ndiri.”

25Shakapanu Yesu kawagambira, “Iwera hashi mwa wazigizigi shiyasi ashi na myoyu yenu ikamala nentu kugajimira goseri galii gatakulitwi na wambuyi wa Mlungu! 26Hashi, ifiruwa ndiri Kristu kukong'onderwa misumali mulupingika, shakapanu kingiri muukwisa wakuwi?” 27Na Yesu Kawagambira vitwatira vyoseri vya vimuwusu mweni Mumalembu Mananagala mushintola sha Musa na shawalembiti wambuyi woseri wa Mlungu.

28Pawaweriti pakwegera na shijiji shawashigenderiti, Yesu katenda gambira kankwendereya na mwanja, 29kumbiti womberi wamluwiti pawalonga, “Gwikali pamuhera na twenga, mana kwinala, na pashiru pankwingira.” Su kingira na kulikala pamuhera nawomberi. 30Pakalivagiti kuliya shiboga pamuhera na womberi, katola libumunda na kulitekelera, shakapanu kalimega na kuwapanana. 31Masu gawu gavugukiti na wammana, kumbiti kawukiti pamasu pawu. 32Su waligambirana weni, “Hashi myoyu yetu iweriti iyaka ndiri shaka pakaweriti kankututakulira Malembu Mananagala munjira kulii?”

33Wawuka shaka shilaa shilii na wawuyiti Yerusalemu, wawoniti wantumintumi walii lilongu na yumu na walii wamonga waweriti pamuhera pawalijojinira 34na walonga, “Nakaka Mtuwa kazyuka! Kamlawira Simoni!”

35Su wantumini wawili wawagambira ntambu yagawapatiti munjira, na ntambu yawammaniti pakamega libumunda.

Yesu kankuwalawira wantumini wakuwi

Matayu 28:16-20; Mariku 16:14-18; Yohani 20:19-23; Matayu 1:6-8

36Wantu awili pawaweriti wankuwagambira aga, palaa paliya Yesu mweni kagoloka pakati pawu na kawagambira, “Ponga iweri na mwenga.”

37Walilimuka na waweriti na lyoga pawavimana wawona shihoka. 38Su Yesu kawagambira, “Iwera ashi mwana lyoga? Iwera ashi myoyu yenu itira? 39Mloli mawoku gangu na magulu gangu na mloli neni ndo mweni. Mumbati mundoli na hamvimani, mana shihoka shahera nshimba na mafupa ntambu yamndola.”

40Katakuliti aga na kawalanguziyiti mawoku na magulu gakuwi. 41Waweriti wankali pawagajimira ndiri, toziya ya manemu gawu na wankali wankulishera, Yesu kawakosiyiti, “Mwanashu shiboga shoseri panu shakuliya?” 42Wamupa shipandi sha somba wa kubanika, 43kashitoliti na kushiiliya, woseri pawamlola.

44Shakapanu kawagambira, “Ayi ndo mana ga visoweru vyanuwagambiriti pamweriti pamuhera na mwenga, kila shintu shawalembiti kwajili ya neni Mulilagaliru lya Musa, na mumalembu gawalembiti wambuyi wa Mlungu, na mushintola sha Zaburi gawera nakaka.”

45Shakapanu kagavugula mahala gawu kugamana Malembu Mananagala, 46na kawagambira, “Ashi ndo shawalembiti, Kristu mpaka katabiki na mpaka kazyuki kulawa kwa wahowiti lishaka lya tatu kwanjira pakahowiti, 47nalitawu lyakuwi muujumbi kwajili ya kuleka vidoda vyawatenda mpaka wawubweri kwa isi zoseri, kwanjira Yerusalemu. 48Mwenga mwa wakapitawu wa vitwatira avi. 49Na neni mweni hanuwajegerani ulii mweni Tati yakalagiliti kumjega, su muheperi muisi uganu mpaka pawakupananiti makakala kulawa kumpindi kwakuwi.”

Yesu kankunyasulwa kugenda kumpindi kwa Mlungu

Matayu 28:16-20; Mariku 16:14-18; Yohani 20:19-23; Matayu 1:6-8

50Su Kawalonguziyiti kunja kuisi mpaka Betaniya, kanyasula mawoku gakuwi kumpindi, na kawatekelera. 51Pakaweriti kankuwatekelera, kawaleka, kanyasulitwi kugenda kumpindi kwa Mlungu. 52Womberi wamguwira, na wawuyiti kugenda Yerusalemu, pawawera na nemeli nkulu, 53na walikaliti shaka shoseri Mnumba nkulu ya Mlungu pawamkwisa Mlungu.

Currently Selected:

Luka 24: PBV

Highlight

Copy