Walawi 27
27
Lagiru kuusu mafupu kwa Mtuwa Mlungu
1Mtuwa Mlungu kamgambiriti Musa, 2Guwagambiri Israeli hangu. Muntu pakatula nazili kulongolu kwa Mtuwa Mlungu kulirapa kumlavilira Mlungu, muntu ayu kaweza kuwusiya kulirapa kwakuyi kwa kulipa shididini sha mpiya shashiwera handa ntambu yaifuta,
3Mpalu gwa vinja malongu mawili mpaka malongu sita hakakombolwi kwa vipandi hamsini vya madini ga feza, shekeli kumi na mbili handa ndo mpalu na shekeli lilongu za mpiya handa ndo mdala.
4Handa ndo mdala, hakakombolwi kwa vipandi kumi na tatu.
5Handa muntu ayu gwa pakati pa vinja mhanu na kumi na mbili hakakombolwi kwa mpiya shekeli ishirini handa ndo mpalu na shekeli lilongu za mpiya handa ndo mhinga.
6Payiwera ndo mwana gwa umli wa pakati pa mwezi gumu na vinja mihamu hakakombolwi kwa shekeli mhanu za mpiya handa ndo mpalu na shekeli ndatu za mpiya handa ndo mhinga.
7Payiwera muntu ayu umli wakuyi ndo nentu ya vinja sitini, shiyasi shakuyi hashiweri ndo shekeli kumi na tanu za mpiya handa ndo mpalu na shekeli lilongu za mpiya handa ndo mdala. 8Kumbiti payiwera muntu ayu ndo mhushu na kaweza kulipa malipu gakuyi, su, muntu ayu hakajegwi kwa mtambika. Mtambika hakapimi shiyasi shakuyi kulinganira na uwezu wa yakatuliti nazili. 9Handa payiwera nazili yeni ihusu nkanyama gwa ntambu yeni wantu wamlavilira Mtuwa Mlungu tambiku, su kanyama ayu kawera shintu shinanagala. 10Ijimiruwa ndiri kumgalambula kanyama ayu kwa gwingi yoseri, mherepa kwa mdoda ama mdoda kwa mherepa pakamgalambula kwa kanyama gwingi, woseri wawili hawaweri wananagala. 11Handa nazili ayi ihusu kanyama humba na ntambu yayifaa ndiri kumlavilira Mtuwa Mlungu, su, muntu yakamlaviyiti, hakamjegi kwa mtambika, 12na yomberi mtambika hakaamuwi shiyashi shakuyi kulinganira na uherepa ama udoda wakuyi. Ntambu yakafira kuamuwa mtambika, ndo yaifira kuwera. 13Kumbiti payiwera mweni kafira kumkombola, su, hakongeri seemu yimu paseemu muhanu ya shiyasi sha nkanyama ayu.
14Muntu pakayilaviya numba yakuyi kuwera nanagala kwa Mtuwa Mlungu, mtambika hakaamuwi shiyashi shakuyi kulinganira na uherepa ama udoda wakuyi. Ntambu yakafira kwamuwa, ndo yaifira kuwera. 15Handa muntu ayu yakailaviyiti pakafira kuyikombola numba ayi, su, hakongeri asilimiya malongu ga shiyasi shakuyi na yeni hayiweri lunda yakuyi.
16Muntu pakatula litapaka lyakuyi, yeni ndo uhala wakuyi, kulaviya kwa Mtuwa Mlungu su, shiyasi shakuyi hashipimilwi kulinganira na mbeyu yazitumika kuliyala lirambu ali, kwa kila kilu ishirini za shayili shiyasi shakuyi hashiweri shekeri hamsini za mpiya. 17Handa pakalilaviya lirambu lyakuyi mushinja sha kwazimisha vinja malongu, shayasi shakuyi ndo mpaka shilinganili na vipimu vyenu. 18Kumbiti handa pakalaviya pa shinja ashi, su, mtambika hakaamuwi shiyasi shakuyi kulinganira na vinja vyavisigaliti kufikira shinja sha kuholera sha vinja hamsini na shiyasi shakuyi shipungulwi. 19Handa mweni pakafira kulikombola, su, ndo mpaka kongeri seemu yimu paseemu muhanu ya lirambu ali na shakapanu haliweri lunda yakuyi. 20Kumbiti handa kalema kulikombola ama kamshuwuzira muntu yumonga, su, lirambu ali nalikombolwa kayi. 21Mushinja sha kuholera sha vinja hamsini sha lirambu ali hakalekiziwi na kuwera lyakuyi Mtuwa Mlungu mashaka goseri. Mtambika ndo lyakuyi nakamu.
22Handa muntu pakampanana Mlungu lirambu lyakahemeliti, ndo lyakuyi kayi kwa kuhala, 23mtambika hakaamuwi shiyasi sha lirambu lilii kwa kulinganira na vinja vyavisigaliti kufikira shinja sha kuholera sha vinja hasini na muntu ayu hakalazimiki kulipa shiyasi shakuyi handa shintu shananagala kwa Mtuwa Mlungu. 24Kumbiti mushinja sha kuholera sha vinja hamsini, lirambu ali ndo mpaka kawuzilwi muntu ulii yakalishuwuziti. 25Kila shiyasi hashipimwi kwa shipimu sha utopa sha shekeli kulingana na shipimu sha pahala pananagala. Utopa wa gera ishilini ndo teratera na utopa wa shekeli yimu.
26Iwezekana ndiri kumtula kulongolu kwa Mlungu mwiwuka gwa kwanja gwa nkanyama, shilagiru ayu ndo gwakuyi Mtuwa Mlungu, kaweri ndo ng'ombi ama kondolu. 27Handa yakahusika ndo nkanyama humba, mweni hakamuhemeri kwa kulinganira na ntambu yammupima na hakongeri asilimiya ishilini zya shiyasi sha nkanyama ayu. Handa kakombolwa ndiri, su, hakashuwuzwi kulinganira na vipimu vyenu.
28Kumbiti shintu shoseri shashityekitwi kulongolu kwa Mtuwa Mlungu, shiweri ndo muntu ama nkanyama ama shintu shashipatikaniti kwa kuhala, hapeni shishuwuzwi pota kukombelwa. Shoseri shashitulitwi kulongolu kwa Mtuwa Mlungu ndo shinanagala nakamu. 29Muntu yoseri yakatulitwi na kujegwa kwa Mtuwa Mlungu su kalagwi, nakakombolwa, mpaka kalagwi.
30Mukila shintu shimu pakati pa vintu lilongu muviboga, iweri ndo viboga ama mabwajubwaju ga mitera, goseri ndo lunda ya Mtuwa Mlungu, ndo vinanagala kwa Mtuwa Mlungu. 31Handa muntu pakafira kuyikombola zaka yakuyi, hakalipi shiyasi shakuyi na kongera asilimiya ishilini ya shiyasi sha zaka ayi. 32Kuusu wankanyama, pawawalagwa, kila nkanyama gwa lilongu ndo kananagala kwa Mtuwa Mlungu. 33Muntu yoseri kajimilwa ndiri kukosiya handa nkanyama ayu ndo kaherepa ama kadoda pota nkanya ayu nakamu kugalambulwa kwa gwingi. Handa pakagalambulwa kwa gwingi, wakanyama woseri wawili hawaweri wananagala, hapeni wakombolwi.
34Azi ndo lagiru zeni Mtuwa Mlungu kamgambiriti Musa su kawagambiri Waisraeli, kulugongu Sinai.
Currently Selected:
Walawi 27: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.