Walawi 24
24
Koloboyi za pahala pananagala
Kulawa 27:20-21
1Mtuwa Mlungu kamgambiriti Musa, 2Guwagambiri wantu wa Israeli wakujegeri lipaki liherepa lya mizyetuni kwajili ya koloboyi su koloboyi ayi yendereyi kuyaka mashaka goseri. 3Aruni hakayakiziyi koloboyi ayi mngati mwa liringu lya kuliwona, kunja kulipaziya lya lisandiku lya kwamulira su ipati kuyaka kulongolu kwa neni kwanjira pashiru mpaka mandawira. Ali ndo lagalira lya kufata mashaka goseri muviyiwuku vyenu. 4Hakazituli koloboyi azi mushintambi sha koloboyi za zahabu iherepa guzituli mashaka goseri ga Mtuwa Mlungu.
Libumunda lyalilaviwa Muliringu Linanagala
5Gutoli ubumu unama, kilu kumi na mbili na kubanika mabumunda kumi na mbili. 6Mabumunda aga hagapangwi misitali miwili pambindi pa meza ya zahabu iherepa kulongolu kwa Mtuwa Mlungu, kila msitali mabumunda sita. 7Kila msitali hagulekeri ubani uherepa su igendi pamuhera na mabumunda aga na kuwera seemu ya tambiku ya kulungiziwa ya kuliholera kwa Mtuwa Mlungu. 8Kila lishaka lya Koyera Aruni hakaipangi teratera mumisitali mabumunda ga syayi kulongolu kwa neni Mtuwa Mlungu kwajili ya wantu wa Israeli handa lagalira lya mashaka goseri. 9Aruni na wiwuka wakuyi gweka yakuyi ndo yawajimirwa kuliya mabumunda aga tembera ndo mananagala nakamu toziya ndo seemu ya tambika yawandavilira neni Mtuwa Mlungu kwa moto. Ayi ndo yawafiruwa kupata mashaka goseri.
Azabu toziya ya kumuhigilanga Mlungu
10Lishaka limu galawira mashowanganu kukambi aku pakati pa Mwisraeli yumu na mndemba yumu gwa mawu Mwisraeli yawamshema Shelomiti kumbiti tati Mmisiri. 11Lishaka limu mndemba ulii mweni mawu gwakuyi wamshemiti Shelomiti mhinga Dibiri gwa likabila lya Dani, kaligilanga na kulipangilira litawu lya Mlungu. Su wantu wamjegiti kwa Musa, 12wamtatira mnumba mpaka palii hayigubutuliwi nfiru ya Mlungu.
13Su, Mtuwa Mlungu kamgambiriti Musa, 14mmulaviyi mndemba yakigiriti kunja kukambi na walii woseri yawapikiniriti pakigiranga watuli mawoku gawu pampindi pamtuwi gwakuyi na shipinga shoseri shiamuwi kwa kuguma mabuwi. 15Na gwenga guwagambiri Waisraeli handa muntu yoseri hayakampangiliri Mlungu gwakuyi ndo mpaka katenduwi kwa vidoda vyakuyi. 16Muntu yoseri pakawera mweni kaya ama mhenga yakamwigira Mtuwa Mlungu, wantu woseri hawamlagi kwa kumgumanga kwa mabuwi.
17Muntu yoseri yakalaga muntu yumonga ndo mpaka na yomberi wamlagi. 18Muntu yoseri yakalaga shigongolu ndo mpaka kalaviyi fidiya. Ukomu kwa ukomu.
19Muntu yoseri yakamtenda gwapakwegera, ndo mpaka na yomberi katenduwi kulinganira na shiyasi shakamtenditi gwapakwegera gwakuyi. 20Kammega shifupa na yomberi hakamegwi shifupa, lisu kwa lisu, linu kwa linu. Kila muntu yakamtenda myaguwi ndo mpaka na yomberi katenduwi kulinganira na vitendu vyakuyi. 21Yakamlaga kanyama ndo mpaka kamlipiri gwingi, kumbiti muntu yoseri pakamlaga muntu yumonga ndo mpaka yomberi kalaguwi. 22Lagiru ali limhusu mhenga na mwenikaya ndo mpaka na yomberi kalaguwi. Neni ndo Mtuwa Mlungu, Mlungu gwenu.
23Su Musa kawagambira Waisraeli woseri aga. Wamjegi muntu ayu yakampangiliriti Mtuwa Mlungu kunja kukambi, wamlaga kwa kumguma mabuwi. Ndo Waisraeli ntambu yawatenditi handa Mtuwa Mlungu tambu yakamgambiriti Musa.
Currently Selected:
Walawi 24: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.