Yoshuwa 6
6
Waisraeli wankugutola kwa makakala mji gwa Yeriku
1Migomi mikulu ya kwingira mji gwa Yeriku iweriti itatuwa kuwalewelera Waisraeli nawingira mumji. Kwahera muntu yakaweziti kwingira ama kulawa kunja kwa mji agu. 2Mtuwa Mlungu kamgambiriti Yoshuwa, “Guloli, hanikutendi guwutoli kwa makakala mji gwa Yeriku pamuhera na mfalumi gwakuwi na wanjagira wakuwi yawawera wagangamala. 3Gwenga pamuhera na wanjagira waku hamuzyengeti mji agu mala yimu kila lishaka kwa mashaka sita. 4Watambika saba, kila yumu katoli lipenga lyakuyi lya ligoli lya kondolu gwa shipalu, hawalongoleri kulongolu kwa lisanduku lya lipatanu. Mulishaka lya saba, gwenga pamuhera na wanjagira waku hamluzyengeti mala saba mji agu, uganu watambika pawagomba mapenga. 5Shakapanu womberi hawagombi mapenga kwa liziwu likulu. Palaa palii pampikanira liziwu ali, wantu woseri hawabotangi na vibambaza vya mji haviguwi pasi. Su wanjagila woseri hawingiri mumji.”
6Su Yoshuwa kawashemiti watambika na kuwagambira, “Mlitoli lisanduku lya lipatanu, na wantu saba pakati penu walilongoleri pawakola mapenga aga ga ligoli lya kondolu.” 7Yoshuwa kawagambira wantu, “Mgendi kulongolu, mguzyengeti mji, na wantu wana vintu vya kulikomangira wagendi kulongolu kwa lisandiku lya lipatanu lya Mtuwa Mlungu.”
8Yoshuwa pakawalagaliriti kala wantu, watambika saba yawawera na mapenga wanjiti kugendagenda kulongolu kwa Mtuwa Mlungu, pawagomba mapenga na kumbeli kwawu pawafatuwa na lisanduku lya lipatanu. 9Wanjagira walii yawawera na vintu vya kulikomangira wawalongoleriti watambika yawaweriti wankugomba mapenga, na wanjagira wamonga pawagendagenda kumbeli kulisanduku ali. Shaka shoseri ashi mapenga gaweriti gankugombuwa. 10Kumbiti Yoshuwa kawalagaliriti wantu, “Nawabotanga, viraa nawatakula shisoweru mpaka panuwagambira mbotangi, shaka ashi ndo hambotangi.” 11Su Yoshuwa kawatenditi wantu yawatoliti lisanduku lya lipatanu lya Mtuwa waguzyengeti mji mala yimu pawalipapa lisanduku. Shakapanu womberi wawuyiti mugonjeru kugonja pashiru.
12Mandawira yakuwi Yoshuwa kimukiti ligonugonu, na watambika walipapa lisandiku lya lipatanu lya Mtuwa Mlungu. 13Watambika saba yawawera na mapenga saba wagenditi kulongolu kulisanduku lya lipatanu lya Mtuwa Mlungu pawagomba mapenga magenda. Wantu yawana vintu vya kulikomangira wawalongoleri watambika na walolera wamonga waweriti kumbeli kulisanduku lya lipatanu. 14Lishaka lya pili yakuwi waguzyengetiti mji agu mala yimu na kuwuya kayi mumalingu gawu. Watenditi hangu kwa mashaka sita. 15Lishaka lya saba, womberi wimukiti mandawira pee, waguzyengetiti mji agu mala saba ntambu iraa irii. Iweriti lishaka ali hera pawaguzyengetiti mji agu mala saba. 16Paisokiti mala ya saba, watambika pawagombiti kala mapenga, Yoshuwa kawagambira wantu, “Mbotangi toziya Mtuwa Mlungu kawapananiti kala mji agu! 17Mji agu pamuhera na kila shintu shashiwera amu hashyagamiziwi, toziya mji gulaviruwa tambiku kwa Mtuwa Mlungu. Muhumba Rahabu hakasigaluwi pamuhera na woseri yawaweriti mnumba mwakuwi, toziya kawafifiti walolalola wetu. 18Kumbiti namtola shintu shoseri shilii shashituluwa toziya ya Mtuwa Mlungu su shagamiziwi, handa pamtenda hampati malombu mumalingu ga Israeli kuwera shintu sha kwagamiziwa, hangu kuyijegera madoda. 19Shintu shoseri shashinyawitwi kwa madini ga feza ama zahabu ama vyombu vya madini ga shaba, ama madini ga shuma toziya ndo vinanagala kwa Mtuwa Mlungu su vituluwi muluhanja lwa Mtuwa Mlungu.”
20Su watambika wagombiti lipenga. Palaa wantu pawapikaniriti, womberi wabotiti kwa liziwu likulu na vibambaza vya mji vibomukiti. Shakapanu wanjagira woseri wingiliti mumji na kugutola kwa makakala. 21Wamlagiti kila muntu yakaweriti mumji, wapalu na wadala na wantemba na wazewi. Vilaa womberi wawalagiti wang'ombi na wakondolu na punda.
22Yoshuwa kawagambiriti walolalola wawili walii, “Mgendi mnumba ya muhumba ulii, mwakamjegi mdala ulii pamuhera na walongu wakuwi woseri ntambu yamumlapiriti.” 23Su womberi wagenda kumjega Rahabu, na tati gwakuwi na mawu gwakuwi, na walongu wakuwi woseri, su wawatuliti kunja kumalingu ga Waisraeli. 24Shakapanu walulunguziyiti kwa motu lushi lwa Yeriku na kila shintu shashiweriti amu irahera vintu vyavinyawitwi kwa madini ga feza na zahabu na vyombu vya shaba na vintu vya shuma, avi vitulitwi muluhanja lwa numba ya Mtuwa Mlungu. 25Kumbiti Yoshuwa kagalopoziyiti makaliru ga muhumba Rahabu pamuhera na walongu wakuwi, toziya yomberi kawafifiti walolalola wawili walii yawalagalirituwiti kugenda Yeriku. Shiyiwuku sha Rahabu shankulikala mu Israeli mpaka leru.
26Shaka ashi Yoshuwa kalirapiriti kulongolu kwa wantu pakalonga,
“Yakagunyawa kayi mji gwa Yeriku,
kapangiluwi na Mlungu,
Muntu yoseri yakatula lyanjiru lwa mji agu,
shipanta njira gwakuwi kahowi.
Yoseri yakanyawa ligomi likulu lya mji agu,
shamperu gwakuwi kahowi.”
27Su Mtuwa Mlungu kaweriti pamuhera na Yoshuwa na zyumi za Yoshuwa zyeniyiti muisi yoseri.
Currently Selected:
Yoshuwa 6: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.