Yoshuwa 22
22
Makabila ga kwagulawa mshenji gakuwuya ukaya
1Su, Yoshuwa kawashema wantu wa likabila lya Rubeni na lya Gadi na nusu ya wantu ya likabila lya Manasi 2kawagambira, “Mwenga mfata goseri galii Musa, ntumintumi gwa Mtuwa Mlungu, gakawalagiriti na mjimira malagalira ganiwagambiriti. 3Pota kuwaleka walongu wenu shipindi shoseri ashi shitali mpaka leru, ila mfata weri lagiru lya Mtuwa Mlungu Gwenu. 4Vinu Mtuwa Mlungu gwenu kawapanana walongu wenu ponga, ntambu yakalagaliriti, su, muwuyi muisi yenu yamupananitwi na musa ntumintumi gwa Mtuwa Mlungu, iweri yenu kumwambu kulushemba Yoridani. 5Mulikali weri kujimira amuri na lagira zilii Musa, ntumintumi gwa Mtuwa Mlungu, kahimiziya. Kumfira Mtuwa Mlungu gwenu, mfati shakafira na kukola amuri zakuwi, mlikala pamuhera na yomberi na kumtendera kwa moyu goseri na rohu yoseri.” 6Su Yoshuwa kawatekelera na kuwajimira wagendi zawu na kawagambira, 7Musa kaweriti kazipanana nusu ya likabila la manasi semu zawu aku Bashani. Na Yoshuwa kayipanana nusu ya pili ya likabila ali semu zyakuwi aku kwaguzyeta mshenji mwa lushemba Yoridani ntambu yakagapananiti makabila gamonga galii. 8“Muwuyi ukaya kwenu na ulunda uvuwa, ng'ombi wenu woseri, mpiya na zahabu na shaba na shuma na nguwu zivuwa. Mbagulani na walongu wenu lopola zoseri zyamtoliti kwa makakala kulawa kwa wankondu wenu.”
Shitalawanda shakutambikira pakwegera na Yoridani
9Su wantu wa likabila lya Rubeni na Gadi na nusu ya likabila lya Manase walekana na wantu wa makabila gamonga ga Israeli aku Shilu, muisi kanani, wawuya kwawu muisi ya Gileadi, Isi yawapananitwi iweri yawu kwa malagaliru ga Mtuwa Mlungu ntambu yakamlagaliriti Musa.
10Womberi pawasokiti Geliloti pagwegera na lushemba Yoridani muisi ya Wakanaani, Rubeni na Waagadi pamuhera na nusu ya likabila lya Manasi wanyawiti shitalawanda shikulu sha kutambikira pakwegera na lushemba lulii. 11“Su visoweru visoka kwa wantu wa makabila gamonga ga Israeli handa makabila ga Rubeni na Gadi na nusu ya likabila lya Manasi gaweriti ganyawa shitalawanda shikulu sha kutambikira pakwegera na lushemba Yoridani muisi ya Kanaani.” 12Pawapikiniti avi, Waisraeli wajojonikiti woseri aku Shilo kugenda kulikomanga nkondu na makabila aga uwega kwagulawa mshenji.
13Su wantu wa Israeli wamlagaliriti Finehasi, mwana gwakuwi mtambika Eliyazali kagendi aku Gileyadi kwa makabila ga Rubeni na Gadi na nusu ya likabila lya Manasi. 14Finehasi kawuka pamuhera na wakulu lilongu, kila yumu pakawera mkulu gwa likabila lwakuyi. 15Na womberi wawagendera wantu wa makabila ga Rubeni, Gadi na nusu ya likabila lya Manasi aku Gileadi wawagambira, 16wantu woseri wa Mtuwa Mlungu wakosiya hangu. “Ndo upayira gaa awu mumtendera Mlungu gwa Israeli, iwera hashi mumlema Mtuwa Mlungu kwa kunyawa aku shitalawanda sha kutambikira? 17Hashi vidoda vyatutenditi aku Peori vitosha ndiri? Mwona ndiri handa hatwenilipungi na handa ntabiku yakuwi yankali yankuwagaziya wantu wa Mtuwa Mlungu? 18Hashi, su muleka kumfata Mtuwa Mlungu? Pamumlema Mtuwa Mlungu leru, shirawu hakawakalaliri nentu shipinga shoseri sha Waisraeli. 19Aya, payiwera isi yenu inanagala ndiri, mwizi muisi ya Mtuwa Mlungu kuliringu lyakuyi linanagala kwaliwera na kulitolera semu aku pamuhera na twenga, kumbiti hera namumlema Mtuwa Mlungu na kututenda twenga twawoseri kwa kulinyawira maweni mwenga shitalawanda sha kutambikira pawera ndiri pa Mtuwa Mlungu gwetu. 20Hashi, Akani mwana gwa Zera pakaweriti ndiri mwaminika muvintu viberuwitwi, maya iwaguwira ndiri shipinga shoseri sha israeli? Kayi Akani kahowiti ndiri gweka yakuwi toziya ya ukondola wakuwi.”
21Panu wantu wa makabila ga Rubeni na Gadi na nusu ya likabila lya Manasi wawankula walongoziya wa makabila ga Israeli, 22“Mlungu gwa wamlungu ndo Mtuwa Mlungu! Yomberi kavimana ntambu gaa tutenda hangu. Na Waisraeli woseri hawavimani viraa! Handa awu ndo ukondola ama ndo kwahera waminika kwa Mtuwa Mlungu, su yomberi kaleki kutulopola leru. 23Handa tumleka Mtuwa Mlungu tunyawa shitalawanda sha kutambikira su tulaviyi tambiku za kulunguziwa za viboga ama za ponga, su Mtuwa Mlungu na katuwuziliri. 24Kumbiti iwera ndiri hangu. Tunyawiti kwa kutira kuwera pamonga mumashaka gagizaku wana wenu hawawagambiri wana wetu, mwenga mwa ntambu gaa pamuhera na Mtuwa Mlungu gwa Israeli? 25Mwona ndiri handa Mtuwa Mlungu katula lushemba lwa Yoridani kuwera mbaka pakati penu na twenga? Pakati petu twenga na makabila ga Rubeni na likabila lya Gadi mwahera lifungu lyoseri lyenu kwa Mtuwa Mlungu.’ Hangu wana wenu mewawezi shakapanu kuwatenda wana wetu waleki kumguwira Mtuwa Mlungu. 26Ndo mana tulagaliriti kunyawa panu shitalawanda sha kutambikira, kumbiti kwajili ndiri ya kulaviya pampindi pakuwi malaviwu ama tambiku, 27su tufiriti shitalawanda sha kutambikira ashi shiweri ukapitawu pakati penu mwenga pamuhera na viyiwuku vyenu vyavizaku kuwera twenga tuweza kumtendera Mtuwa Mlungu kwa malaviwu ga kulunguziwa pamuhera na tambiku zyetu za ponga, su wana wenu nawiza kuwagambira wana wetu kuwera wahera lifungu lyawu kwa Mtuwa Mlungu. 28Kayi tuliholiti handa payiwera shitwatira handa ashi hashitakulwi kuusu twenga ama kuusu wiwuka wetu mumashaka gagiza, hatulongi, mloli mfanu gwa shitalawanda sha kutambikira sha Mtuwa Mlungu ulii wazewi wetu washinyawiti, ndala kwajili ya kulavilira pampindi pakuwi malaviwu ama tambiku kumbiti kuwera utakula pakati petu na mwenga.’ 29Twenga tuweriti ndiri na nfiru ya kumlema vinu Mtuwa Mlungu ata shididini na kumleka kwa kunyawa pakutambikira pa kulaviya tambiku za kulunguziya nakamu ama tambiku za ubumu ama za tambiku. Tufira ndiri kulavilira tambiku za kulunguziya ama tambiku pahala pamonga kumbiti hera pampindi pashitalawanda sha kutambikira sha Mtuwa Mlungu gwetu yakawera kulongolu kwa liringu lyakuyi linanagala.”
30Mtambika Finehasi pamuhera na walongoziya wa shipinga shoseri na wakulu wa kaya za Israeli yawaweriti pamuhera na yomberi pawapikaniriti visoweru avi vya wantu wa makabila ga Rubeni na Gadi na nusu ya likabila lya Manasi, walizika. 31Na yomberi Finehasi mwana gwa mtambika Eliyazari, kagagambira makabila ga Rubeni na Gadi na Nusu ya likabila lya Manasi, “Leru tuvimana handa Mtuwa Mlungu kapamuhera na twenga toziya mumutendera ndiri Mlungu unkondu. Vinu muwalopola Waisraeli nawazibiwa na Mtuwa Mlungu.”
32Su Finehasi mwana gwa mtambika Eleyazari pamuhera na walongoziya wayaguwi wawagambira kwaheri wantu wa makabila ga Rubeni na Gadi wawuka muisi Gileyadi, wawuya Kanaani kwa Waisraeli na kuwapanana visoweru virii. 33Visoweru avi vinemeziya Waisraeli, walonga mayagashi Mtuwa Mlungu na kuleka makomangu gawu ga nkondu na lengu lya kuhalibisiya nakamu isi yaiweriti ya makabila ga Rubeni na Gadi.
34Wantu wa makabila ga Rubeni na Gadi wapashema palii pashitalawanda sha kutambikira ndo, “Ukapitawa wa twenga twawoseri kulongolu kwa Mtuwa Mlungu.”
Currently Selected:
Yoshuwa 22: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.