Yohani 8
8
Mdala muhumba
1Yesu kagenditi kulugongu lwa Mizeituni. 2Shirawu yakuwi mandawira putiputi kagenditi kayi Kunumba nkulu ya Mlungu. Wantu woseri wamgendera, nayomberi kalivaga kanja kufunda. 3Wafunda wa malagaliru na Mafalisayu wamjegera mdala yumu yawambatiti ugoni pakahumba. Wamgolusiya pakati pawu. 4Wamkosia, “Mfunda! Mdala ayu yawambatiti uhumba kaweriti kankuhumba. 5Malagaliru ga Musa katulagalira mdala handa ayu wamgumi mabuhi. Su, gwenga gutakula hashi?” 6Watakuliti hangu kwa kumjera Yesu, wapati shanzu sha kumsitaki. Yesu kasuntama, kalemba mlitapaka kwa shyala.
7Pawawongiriti kumkosiya, Yesu kagolokiti, kawagambira “Muntu yakahera vidoda pakati penu kaweri gwa kwanja kumguma libuwi.” 8Shakapanu kasuntamala kayi, kaweriti kankulemba mulitapaka. 9Pawapikaniriti avi, wanja kuwuka yumuyumu, pawalongolera wazewi. Yesu kasigala gweka yakuwi na mdala ulii kagoloka palaa palii. 10Yesu kaligolosiya kamkosiyiti mdala ayu, “Wakoshi wantu walii? Hashi kwahera hata yumu yakakutoziti?”
11“Kwahera hata yumu!” Mdala, kamwankula.
Yesu kamgambira, “Iherepa, wala neni hapeni nukutozi. Gugendi zyaku na kwanjira vinu nagutenda vidoda kayi.”
Yesu ulangala wa pasipanu
12Yesu pakayowiriti kayi na Mafalisayu, kawagambira, “Neni ndo ulangala wa pasipanu, yakanizira neni hapeni kagendigendi muntiti nakamu, su hakaweri na Uweru wa ukomu.”
13Su, Mafalisayu wamgambira, “Gwenga gulilanguziya gumweni, su upitawu waku ufaa ndiri.”
14Yesu kawankula, “Hangu ndiri, ata handa nulilanguziya namweni, upitawu wa neni ndo wa nakaka toziya neni nuvimana kwandawiti na kwang'enda. Kumbiti mwenga muvimana ndiri kwandawiti wala kwang'enda. 15Mwenga muntoza kwa maholu ga wantu, kumbiti neni ntoza ndiri muntu. 16Ata pantoza, kutoza kwaneni ndo kwa nakaka toziya neni nagweka yangu ndiri Tati yakantumiti neni ndo kapamuhera na neni. 17Ilembitwi Mumalagaliru genu kwa upitawu wa wantu wawili, shintu shoseri shatutakuliti ndo nakaka. 18Neni nankulilanguziya namweni na Tati yakantumiti, kankunanguziya neni viraa.”
19Wamkosiya, “Tati gwaku ka koshi?”
Yesu kawankula, “Mwenga mumana ndiri neni wala mummana ndiri Tati. Handa memumaniti neni, memumaniti Tati gwangu viraa.”
20Yesu katakuliti visoweru vyoseri avi kaweriti kankufunda Mnumba nkulu ya Mlungu pakwegera na lisanduku lya luhanja palitulitwi, Kwahera muntu yakambatiti, toziya saa yakuwi iweriti hayenisoki.
Hapeni mwizi kwang'enda neni
21Yesu kawagambira kayi, “Hang'endi zyangu, mwenga hamunsakuli, kumbiti hamuhowi muvidoda vyenu. Kwang'enda neni, mwenga hapeni mwezi kusoka.”
22Su, wakulu wa Shiyawudi watakula, “Hashi, iwera na mana hakalilagi mweni? Iwera hashi kalonga, kwang'enda neni mwenga hapeni msoki?”
23Yesu kawagambira, “Mwenga mlawa palaa pasipanu, neni ndawa kumpindi, mwenga ndo mwa wa pasipanu, neni hapeni weri gwa pasipanu. 24Ayi ndo mana nuwagambireni hamhowi muvidoda vyenu. Na hamhowi muvidoda vyenu handa pamjimira ndiri ‘Neni ndo mweni’.”
25Nawomberi wamkosiya, “Gwenga gwa gaa?” Yesu kawankula, “Neni ndo handa vilii nuwagambireni kwanjira kwanja! 26Nana gavuwa ga kutakula kwa mwenga na vya kuwatoza. Kumbiti uliya yakantumiti ndo nakaka, naneni nuwagambira wantu wa pasipanu shitwatira shampikiniriti kulawa kwakuwi.”
27Wavimana ndiri handa Yesu kaweriti pakatakula nawomberi kumuwusu Tati. 28Su, Yesu kawagambira, “pammalira kala kumubikula Mwana gwa Muntu, panu ndo pamfira kumana handa ‘Neni Ndo mweni’, na handa ntenda ndiri shoseri namweni neni, ira ntakula hera galii Tati gakafunditi. 29Yakantumiti kapamuhera naneni, yomberi kandeka ndiri gweka yangu, toziya mashaka goseri ntenditi galii yagamfiriziya.”
30Wantu wavuwa wampikiniriti Yesu vyakatakuliti wamjimiriti.
Unakaka awu hawuwalekeziyi
31Yesu kawagambira Wayawudi walii yawamjimiriti, “Handa pamgajimila mafundu gangu hamuweri wafundwa wangu nakaka, 32hamuumani unakaka na unakaka hawuwapanani ulekeziwu.”
33Nawomberi wamwankula, “Twenga ndo washiyuwuku sha Aburahamu, na hatwenipati ng'o kuwera wamanda wa muntu yoseri. Gwana mana gaa kutakula, ‘Hamuweri walekiziwa?’ ”
34Yesu kawankula, “Nakaka nuwagambireni, kila muntu yakatenda vidoda ndo mmanda gwa vidoda. 35Mmanda hapeni kalikali ukaya kwa mtuwa gwakuwi pamashaka goseri, kumbiti mwana kalikala ukaya mashaka goseri. 36Mwana pakawapanana ulekeziwu, hamuweri walekiziwa nakaka. 37Nuvimana handa mwenga ndo washiyuwuku sha Aburahamu. Ata hangu, mfira kundaga kwa toziya hamjimili ndiri mafundu gangu. 38Neni ntakula galii yakananguziyiti Tati, kumbiti mwenga mtenda galii yakawagambireni Tati gwenu.”
39Womberi wamwankula, “Twenga ndo twawana wa Aburahamu!”
Yesu kawagambira, “Handa mwenga mwawana wa Aburahamu, memulitendi lihengu lyakatenditi Aburahamu, 40vyoseri avi vyantenditi nuwagambireni unakaka mpikaniriti kulawa kwa Mlungu, ata hangu, mwenga mfira kundaga. Aburahamu katenda hangu ndiri! 41Mwenga mtenda shitwatira shiraa shilii shakatenditi Tati gwenu.” Womberi wamgambira,
“Mlungu mweni ndo Tati gwetu, twenga twawana ndiri wa kunja.”
42Yesu kawagambira, handa Mlungu mekaweriti Tati gwenu, menfiri neni, toziya neni ndawiti kwa Mlungu na vinu napanu. Niza ndiri kwa uwezu wangu namweni, ira yomberi kantumiti. 43Hashi mwerewa ndiri gantakula aga? Ayi ndo toziya mweza ndiri kuwupikanira ujumbi waneni. 44Mwenga ndo mwawana wa tati gwenu, Shetani na mfira hera kutenda lumatamata lwa tati gwenu. Yomberi kaweriti mlaga kwanjira kwanja, kahera msimamu gwa nakaka, tembera nakaka kwahera mngati mwakuwi. Kila mpayu, zitakulwa kulawirirana na ntambu yakuwi ya munshimba, yomberi ndo mpayu na tati gwa mpayu. 45Kumbiti neni nukugambirani nakaka, toziya ayi munjimira ndiri neni. 46Gani pakati penu yakaweza kulanguziya weri neni nana vidoda? Handa panuwagambira nakaka, iwera hashi munjimira ndiri? 47Yakalawa kwa Mlungu kapikaniraga visoweru vya Mlungu. Mwenga, mlawa ndiri kwa Mlungu, na ayi ndo toziya mwenga mpikanira ndiri.
Yesu na Aburahamu
48Wayawudi wamkosiya Yesu, “Hashi, hapeni tutakuli nakaka handa gwenga ndo Msamariya na kayi gwana shamshera?”
49Yesu kawankula, “Neni nahera shamshera, neni numpanana ligoya Tati gwangu, kumbiti mwenga mumpanana ndiri. 50Neni nsakula ndiri ligoya lyangu namweni, kumbiti kwana yumu mweni kankusakula ligoya ali, nayomberi ndo mtoza. 51Nakaka nuwagambireni, yakagakola mafundu gangu hapeni kahowi mashaka goseri!”
52Su, Wayawudi wamgambira, “Vinu tuvimana nakaka handa gwenga gwana washamshera! Aburahamu kahowiti na wambuyi wa Mlungu viraa wahowiti, nagwenga gutakula eti, ‘Yakajimira ujumbi waku hakalikali mashaka goseri!’ 53Tati gwetu Aburahamu kahowa, hashi gulitenda gwamkulu kuliku tati gwetu Aburahamu, ndo gwenga? Ata wambuyi wa Mlungu wahowiti. Hashi gwenga gulitenda gwa gaa?”
54Yesu kawankula, “Panilikwisa namweni, ulangara wangu shintu ndiri. Yumu yakankwisa ndo Tati gwangu, kila muntu katakula Mlungu gwetu. 55Mwenga hapeni mpati kumumana, kumbiti neni numumana. Na, pantankula numumana ndiri, haweri mpayu gambira mwenga. Kumbiti neni nummana na njimira shisoweru shakuwi. 56Tati gwetu Aburahamu, kanemeleriti pakaliwoni lishaka lyangu na yomberi kaliwoniti, kanemelera.”
57Su, Wayawudi wamgambira, “Gwenga gwankali kusoka vinja lilongu muhanu, nagwenga gumwona Aburahamu?”
58Yesu kawagambira, “Nakaka nuwagambirani, pamberi Aburahamu hakeniyuwuki, neni wera.”
59Panu wasola mabuwi wamgumangi yomberi, kumbiti Yesu kalififa, kalawa Mnumba nkulu ya Mlungu.
Currently Selected:
Yohani 8: PBV
Highlight
Share
Copy
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.
