Hoseya 8
8
Mlungu kankuyikomanga Israeli kwa kukuguwira vinyagu
1Mgombi lipenka! Mana mkondu kankwiza gambira kapungu kuyikankala numba ya Mtuwa Mlungu, toziya kalimega lipatanu lyaneni na kiyigalambuka lagiru yangu. 2Waisraeli walira pawalonga. Tukumana gwenga kuwera gwa Mlungu gwetu, 3kumbiti Israeli wabeziya mirandu miheri, su, vinu wankondu hawamfati.
4Wasyagula wafalumi pota kunkosiya neni, Walisyagulira wakulu weni niwamanandiri. Walinyawira wamlungu wawu kwa mabuwi ga feza na zahabu kwakutenda hangu, mlandu agu haguwagamiziyi. 5Nishikalalira nentu shinyagu shenu sha mwana gwa ng'ombi shamshinyawiti. Niwakalalira nentu wantu wa Samalia. Hamwendereyi mpaka ndii kuwera na likosa? 6Mwenga Israeli ntambu iraayi! Shinyagu shenu shamshinyawiti ndo Mlungu ndiri, vinyagu vya wana wa ng'ombi gwa Samalia havimegekimegeki! 7Hawayali lipuga, hawabeni shivyulavyula! Vimeru vyawu na viboga yaviwera mumalambu hapeni vilaviwi viboga vyoseri. Na pavilera, viboga vyakuyi wahenga hawaliyi. 8Wantu wa Israeli wakomwa na wankondu wawu, vinu wawera pakati pa maisi gamonga handa shintu shashiwerandiri na mana, 9Toziya wagenda kuluwa utanga Ashuru gambira punda gwa kunduntu yakayerayera gweka yakuyi, Israeli kagapanana mpiya maisi gamonga su kapati ulolera. 10Tembera wajimiliti kulaviya mpiya kwa maisi gamonga su watangwi, kumbiti neni hanjojonili womberi pamuhera na kuwakomanga. Shakapanu mfalumi gwa Siliya hakawatabisiyi.
11Wantu wa Israeli walinyawiriti vitalawanda vivuwa toziya ya kulaviya tambiku ya kulaviya vidoda, kumbiti vitalawanda avi viwera pahala pakutendera vidoda. 12Ata meniwalemberi lagiru zyangu mala zivuwa, womberi mewaziwoni kuwera shintu sha shihenga hera. 13Wafira kulaviya tambiku na kuliya vinofu vyakuyi, kumbiti neni Mtuwa Mlungu nizifirandiri. Neni nigahola makosa gawu, haniwakomangi kwa vidoda vyawu, haniwawuziyi kuwumanda aku Misri.
14Wantu wa Israeli wandwaluwa neni, walinyawira numba nkulu ziherepa, wantu wa Yuda waliyongelera miji ya liboma, kumbiti neni haniyijegili motu miji ayi na kugalunguziya maboma gawu.
The Bible version in the Pogoro Language. @The Word for The World International and Pogoro Language translation. All rights reserved.