Hoseya 14
14
Hoseya kankuyiluwira Israeli
1Mwenga wantu wa Israeli Mumuwuyili Mtuwa Mlungu, Mlungu gwenu. Toziya makontola genu gawatenda mguwi. 2Mumuyiri Mtuwa Mlungu gwenu pamlonga, “Gutulekeziyi vidoda vyoseri na gwanki mafupu getu na twenga hatukuzyumi ntambu yatutakuliti. 3Ashuru hapeni katulopoli ama farasi gwa nkondu hapeni katuloleri. Pota vinyagu avi kuvishema kayi wamlungu wetu. Gwee Mtuwa Mlungu kwagwenga washiwa wapata lusungu.”
Mtuwa Mlungu kawapanana Waisraeli makaliru ga syayi
4Mtuwa Mlungu kalonga,
haniwawuziyi wantu wangu kwaneni,
haniwafili kwa moyu gwangu goseri,
hapeni niwakalaliri kayi.
5Haniwatekeleri wantu wa Israeli gambira kutowa kwa mvula kushiwala,
Nawomberi hawabumi gambira uluwa yawushemwa yungiyungi,
hawaweri na lushigira,
gambira mtera gwa mwerezi gwa Lebanoni.
6Ndomolu zawu hazilipalasiyi,
uherepa wawu hawuweri gambira mitera ya mizeyituni,
hawanunkiri gambira uluwa wa Lebanoni.
7Hawawuyi na kulikala pasi pa ulolera wangu,
hawaherepi gambira shiwunga shiherepa.
Hawabumi handa mzabibu,
hawaweri wamanika handa divai ya Lebanoni.
8Mwenga wantu wa Israeli namviguwira kayi vinyagu.
Neni hanigapikanili maluwa genu na kuwalolera.
Handa mbeloshi ntambu yagulaviya lisisi kwawu,
mana tekeleru yoseri ilawa kwaneni.
Upeleru
9Muntu yakawera na luhala kayimana mirandu ayi na yakana mahala kagamani. Mana njira ya Mtuwa Mlungu yanakaka, wantu waminika wazigendera, kumbiti wakontola walikwala na kuguwa amu.
The Bible version in the Pogoro Language. @The Word for The World International and Pogoro Language translation. All rights reserved.