Hagayi 2
2
Uherepa wa Numba ya Syayi ya Mlungu
1Mlishaka lya ishilini na moja, mwezi gwa saba shinja shiraashi, Mtuwa Mlungu kayoweriti na Hagayi. 2Mtuwa Mlungu kamgambira Hagayi kayoweri na mkulu gwa Yuda, Zerubaberi mwana gwa Shealitieli, mtambika mkulu Yoshuwa mwana gwa Yehosadaki na wantu woseri yawawuyiti kulawa muwuhamisiya kawagambiri hangu. 3Kwana muntu yoseri pakati penu yakaliholandiri Numba ya Mlungu ayi ntambu yayiweriti nkulu? Vinu myiwona hashi? Vinu su myiwona handa shintundiri! 4Hangu, nagutwezuka, gwee Zerubaberi. “Gulipanani moyu, mtambika mkulu Yoshuwa mwana gwa Yehosadaki. Mlipanani moyu mwenga wantu woseri wa isi ayi. Mtendi lihengu, toziya neni Mtuwa Mlungu gwa mashonta na pamuhera na mwenga. Pamuwukiti Misri niwagambiriti handa shaka shoseri haweri pamuhera na mwenga, nankali pamuhera na mwenga, su namtira shintu.” 5Pamlawiti Misri niwagambiriti handa mashaka goseri haweri pamuhera na mwenga, su, namtira shintu.
6“Neni Mtuwa Mlungu gwa mashonta ntakula, sambira hanizitikisiyi mpindi na pasipanu, bahari na isi iyuma. 7Haniwatendi wantu wa maisi goseri na hanja zoseri hazijegwi amu, neni haniyitendi numba ayi kuwera nkulu. Ntakula neni Mlungu. 8Feza zoseri na zahabu yoseri pasipanu ndo lunda ya neni. 9Numba yaneni ya syayi hayiweri ya ukulu nentu kuliku ilii ya kwanja na pahala panu ndo haniwapanani wantu waneni mpatiru.” Kalonga Mtuwa Mlungu gwa mashonta.
Wantu woseri ndo humba
10Mulishaka lya ishilini na msheshi lya mwezi gwa tisa, mushinja sha pili sha ukolamlima wa Dariu, shisoweru sha Mtuwa Mlungu gwa mashonta shimwizili mbuyi gwa Mlungu Hagayi, 11pashilonga, “Guwagambiri watambika walaviyi utakulu kwa mlandu agu. 12Shakapanu muntu katola vinofu vinanagala muluwiniku lwa nguwu yakuyi, pakashinkula luwiniku lwa nguwu ayi libumunda ama shiboga yashiterekitwi ama divayi ama lipaki ama shiboga sha ntambu yoseri ilii, shiboga ashi hashiweri shinanagala?” Watambika wamwankula, “Ndala,”
13Shakapanu Hagayi kawakosiya kayi, “Muntu kawera mndiyandiya kwa kushingula mawuti na kushingula vimu vya vishiboga avi, su shiboga ashi hashiweri shinanagala?” Watambika wankula pawalonga. “Nakaka hashiweri shihumba.” 14Panu Hagayi kawagambira, “Wantu wa isi ayi na kila shintu shawatenda shiwera ntambu iraa na kila tambiku ya yilaviwa mushitalawanda.”
Mtuwa Mlungu kalagalira tekelera
15Su vinu mloli mirandu hayilawiri. Pamberi pa kwanja kunyawa kayi Numba yaneni, 16Mumashaka goseri wantu walitumbira viloba ishilini mumalambu gawu. Kumbiti kuweriti na viloba lilongu hera. Mligendereti lipipa lya divayi pamgendera kumemiziya vyombu hamsini, kumbiti mpatiti ishilini hera. 17“Niwalagaliriti lipuga na lifukafuka na mvula ya mabuwi, ihalibisiyiti kila shamyaliti, kumbiti mmbuyirandiri. Ntakula neni Mtuwa Mlungu.” 18Guliholi kuwera leru ndo lishaka lya ishilini na nne lya mwezi gwa tisa, lishaka lyeni lya lyanjiru lya Numba ya Mlungu imalilika. Su, mheperi mwoni galii yagafira kulawawira kwanjira leru. 19Tembera vinu kwahera viboga mhanja na mizabibu ama mitini ama mikomamanga ama mizeyituni hayenileri shintu, kumbiti kwanjira leru, haniwatekeleli,
Shakatakuliti Mlungu kwa Zerubabeli
20Lishaka liraali lya ishilini na nne, mwezi gwa tisa, shisoweru sha Mtuwa Mlungu shimwizira Hagayi mala ya pili. 21“Guyoweri na Zerubaberi mkulu gwa Yuda, gumgambiri hangu. Na sambira kuzitikisiya mpindi na pasipanu, 22Kugusiya falumi na kumalira makakala gawu. Hanizigusiyi mbutuka zawu za farasi na wakwena farasi wakuyi, na weni hawaguwi pasi na kulilaga weni gweka. 23Gwenga ntumintumi gwangu Zerubaberi mwana gwa Shealitieli mulishaka alii hanikusyaguli na kukutola su gukolimlima kwa litawu lyangu. Toziya gwenga ndo yanikusyaguliti.” Mtuwa Mlungu yakana makakala goseri kalonga.
The Bible version in the Pogoro Language. @The Word for The World International and Pogoro Language translation. All rights reserved.