Lyanjiru 9

Mlungu kankutula lipatanu na Nuhu

1Mlungu kamtekeleriti Nuhu pamuhera na wana wakuyi, pakawagambira, “Mleri mwongelereki, mwakapamemiziyi pasipanu. 2Wankanyama woseri na wampongu woseri wa kulyera, viwumbi vyoseri vyavilikwawa kwawa palitapaka na wasomba wa mubahari, woseri hawaweri na lyoga na kuwatila mwenga. Woseri watuluwa muukolamlima mwenu. 3Wankanyama woseri yawalikala hawaweri shiboga kwa mwenga, su niwapanani vyoseri ntambu yaniwapananiti mihamba ya mumalambu kuwera shiboga sha mwenga. 4Kumbiti namuliya nkanyama yakawera kankali na mwazi gwagulikala mngati mwakuyi toziya ukomu wa mumwazi. 5Mwazi gwa ukomu wenu haniwashongi, hanshongi kulawa kwa kila nkanyama. Vilaa virii kwa kila muntu, yoseri yakamlaga muyaguwi, hanimshongi ukomu wakuyi.

6Yakita mwazi gwa muntu

mwazi gwakuyi hagwitwi na muntu,

toziya kwa mfanu gwa Mlungu, muntu kawumbitwi.”

7Mwenga mwiwuri, mwakongereki muweri na wana wavuwa, mwongereki pasipanu.

Upindi wa nvula

8Shakapanu Mlungu kamgambiriti Nuhu pamuhera na wana wakuyi, 9vinu nankutula lipatanu na gwenga pamuhera na shiyiwuku shaku 10na kila shiwumbi shashiwera pamuhera na gwenga, wampongu na wankanyama wa kulolerwa na wankanyama wa kuntundu na woseri yawalawiti muuwatu pamuhera na gwenga. 11Nankutula lipatanu pamuhera na mwenga, kuwera viwumbi vyavilikala hapeni vyagamiziwi kayi na mashi gavuwa makulu, hapeni galawili kayi malawa gakwagamiziya pasipanu. 12“Mlungu kalonga kayi, Ashi ndo shilangaliru sha lipatanu lwanulutenda pakati pa neni na mwenga na kila shiwumbi shashilikala na gwenga kwa viyiwuku vyoseri vyaviza,” 13nankutula katanga ya nvula mumahundi na hashiweri shilangaliru sha lipatanu lyaneni na pasipanu. 14Kila pantenda mahundi pasipanu na katanga ayi ya nvula payiwoneka mumahundi, 15haniliholi lipatanu pakati pa neni na mwenga pamuhera na viwumbi vyoseri vyavilikala. Na mashi hapeni gagamiziyi kayi viwumbi vyoseri vyavilikala. 16Katanga ya nvula payilawila mumahundi, haniwuwoni na kulihola lipatanu ali lya mashaka goseri pakati pa neni na viwumbi vyoseri vyavilikala pasipanu. 17“Mlungu kamgambiriti Nuhu, katanga ayi ndo lilangaliru lya lipatanu lyanilitenditi na viwumbi vyoseri vyavilikala pasipanu.”

Nuhu na wana wakuyi

18Wana wa Nuhu yawalawiti muuwatu mkulu waweriti; Shemu na Hamu na Yafeti. Hamu kaweriti tati gwakuyi Kanani. 19Awa ndo wana watatu wa Nuhu, su kulawirana na wana watatu awa, wantu weneya pasipanu poseri.

20Nuhu kaweriti mlimi gwa kwanja, kalimiti lirambu lya mizabibu. 21Pakalanditi nentu divayi kalowera, shakapanu kagonja shivula hera mulilingu lyakuyi. 22Hamu tati gwa Kanani, kashiwoniti shivula sha tati gwakuyi, kalawiti kunja na kuwagambira walongu wakuyi wawili. 23Kumbiti Shemu na Yafeti watoliti nguwu, wayiwagala mumakombi mwawu, wagenda shimberi mberi na kushigubika shivula sha tati gwawu. Womberi waloliti kumbwega, washiwoniti ndiri shivula sha tati gwawu. 24Kulowera pakumperiti Nuhu, kamaniti ntambu yakatendiritwi na mwana gwakuyi mdidini, 25su kalonga,

“Kapangiluwi Kanani!

Hakaweri mumanda nentu kwa walongu wakuyi.

26Kayi kalonga,

Shemu katekelerwi na Mtuwa Mlungu gwangu!

Kanani kaweri mumanda gwa Shemu.

27Mlungu kongeri mipaka ya Yafeti,

kalikali mumalingu ga Shemu,

Kanani su kaweri mumanda gwa Yafeti.” 28Pagapititi mashi gavuwa makulu, Nuhu kalikaliti mivinja miya tatu na malongu muhanu. 29Su kahowiti pakawera na mivinja miya tisa na malongu muhanu.

Currently Selected:

Lyanjiru 9: PBV

Highlight

Copy

Compare