Lyanjiru 6

Mashi gavuwa makulu

1Wantu pawendereiti kwongereka pasipanu na kwiyura wahinga, 2wana wapalu wa Mlungu wawoniti wahinga wana wa wantu kuwera waherepa, wawayugiti womberi yawawafiriti su waweri wadala wawu. 3Shakapanu Mtuwa katakuliti, “Rohu ya neni hapeni ilikali mngati mwa wantu mashaka goseri, toziya womberi muntu gwa kuhowa hera. Su wantu hapeni walikali nentu ya mivinja miya yimu na ishilini.” 4Mumashaka galii na ata shakapanu, mikambaku yawashemitwi Wanefili waweriti pasipanu, yawaweriti walerwa wa wana wapalu wa Mlungu yawayugiti wahinga wana wa wantu. Womberi waweriti mikambaku na wamanikiti nentu mumashaka galii.

5Mtuwa Mlungu pakawoniti ukondola wa wantu uvuwa pasipanu na kuwera kila lakaliholiti muntu mumoyu mwakuyi, liweriti likondola kila shaka, 6Mtuwa kahinginikiti nentu kwa kumuwumba muntu pasipanu. Moyu gwakuyi gumtamiti kwa hinginika, 7su katakuliti, “Hanimwagamiziyi nakamu wantu woseri yaniwawumbiti pasipanu, haniwagamiziyi nakamu vulaa wankanyama wa kuntundu, viumbi vyavikwawakwawa mulitapaka na wampongu wa kulyera. Nankuhinginika toziya niwawumbiti pasipanu.” 8Kumbiti Nuhu kapatiti upendeleu kulawa kwa Mtuwa Mlungu.

Nuhu

9Avi ndo visoweru vyavimuusu Nuhu. Nuhu kaweriti muheri na kaweriti kahera vidoda pakati pa wantu mumashaka gakuyi, yomberi kamjimiriti Mlungu. 10Nuhu kaweriti na wana watatu; Shemu na Hamu na Yafati. 11Mlungu kawoniti pasipanu pawera padoda na kumema wantu yawahera lusungu. 12Mlungu kawoniti pasipanu pawera padoda nakamu, toziya wantu woseri walikaliti makaliru ga ukondola.

13Mlungu kamgambira Nuhu, “Neni nankugenda kuwagamiziya nakamu wantu woseri, toziya pasipanu pamemiziwa matendu ga ukondora. Nakaka nankugenda kuwagamiziya wantu pamuhera na pasipanu. 14Su gulinyawili uwatu mkulu nentu gwa mbawu za mtera gwa mpingu, gutuli viwogu mngati mwakuyi na gutyelemeki lami mngati na kunja. 15Haguinyawi hangu; utali wakuyi uweri magulu miya na malongu matatu na tisa na kupanuka kwakuyi kuweri magulu malongu mawili na muhanu na utali kugenda kumpindi uweri mawoku lilongu na muhanu. 16Uwatu mkulu awu uweri gwa matala mantatu na guweri na ligomi pambwega. Guwunyawi shitwiku, shakapanu guleki lupenyu nusu liwoku pakati pa shitwiku na litala. 17Nankugenda kujega mashi gavuwa makulu pasipanu kwagamiziya viwumbi vyoseri vyaviwera vikomu pasipanu. Kila shiwumbi shashilikala pasipanu hashihowi, 18kumbiti hantendi lipatanu na gwenga na gwenga hagwingili muuwatu mkulu pamuhera na mdala gwaku na wana waku wapalu pamuhera na wadala wawu. 19Na gwenga hagwingiziyi muuwatu mkulu kila ntambu ya shiwumbi shakipalu na shakidala, su kuwatula walikali pamuhera na gwenga. 20Hagwingiziyi kila ntambu ya wapongu wa kulyera, kila ntambu ya nkanyama na kila ntambu ya shiwumbi shashikwawakwawa mulitapaka, viwumbi viwili viwiili su kuwatura walikali. 21Vilaa gutoli ntambu zoseri za viboga vyamuweza kuliya, guvituli weri viweri viboga vyenu pamuhera na viwumbi awa.” 22Nuhu katenditi kila shintu Mlungu ntambu yakamlagaliriti.

Currently Selected:

Lyanjiru 6: PBV

Highlight

Copy

Compare