Lyanjiru 14

Abramu kankumlopola Lutu

1Wafalumi washeshi, Amrafeli gwa Shinali, mfalumi Arioku gwa Eramu na mfalumi Tidali gwa Goiimu, 2kwa pamuhera wagenditi kulikomanga ngondu na Bela mfalumi gwa Gomeri na Shinabi mfalumi gwa Adima na Shemeberi mfalumi gwa Seboyimu na muyaguwi mfalumi gwa Bela, vinu ishemuwa Soali. 3Wafalumi wamuhanu awa, wanjishiti wanjagira wau kulawa mulilaranda lya Sidimu, vinu ishemuwa bahari ya munu. 4Kwa shaka sha mivinja malongu na mbili yaipititi, waweriti pawamjimira mfalumi Kedorilaomeri, kumbiti mushinja sha malongu na ntatu, womberi wamgalambukiti. 5Mushinja sha lilongu na msheshi, mfalumi Kedorilaomeri pamuhera na wafalumi walii wayaguwi wiziti na kuwakanga wantu wa Refaimu aku Ashitaroti karinaimu na Wazuzi aku Hamu na Waemi aku Shawe kiriataimu, 6na Waholi aku kwa muisi ya lugongu lwa Seiri wawawingiti mpaka Eliparani, mumbaka za shiwala. 7Shakapanu wawuyiti kumbeli mpaka Enimishipati, vinu washema Kadeshi, waikomiti isi yoseri ya Waamaleki na wawakanga Waamori yawalikaliti Hasasoni Tamali.

8Su mfalumi gwa Sodoma na mfalumi gwa Adima na mfalumi gwa Seboimu na mfalumi gwa Bela wingiriti kulikoma ngondu mulilaranda lwa Sidimu 9kulikoma na Kedorilaomeri mfalumi gwa Eramu na Tidali mfalumi gwa Goiimu na Amrafeli mfalumi gwa Sinari na Arioku mfalumi gwa Elasali, wafalumi wamsheshi walikomangiti na wafalumi wamuhanu. 10Su luranda lwa Sidimu liweriti limema malindi ga lami, wafalumi wa Sodoma na Gomora pawaweriti wankutuga ngondu wapatukira mumalindi, kumbiti wamonga washapiliti kulugongu. 11Su wafalumi wamsheshi walii watoliti ulunda woseri wa Sodoma na Gomora pamuhera na viboga vyawu vyoseri, su wagenditi zawu. 12Vilaa wambatiti Lutu mwana gwa mlongu gwakuyi Abramu, ulii yakalikaliti Sodoma pamuhera na ulunda wakuyi.

13Muntu yumu yakalopoliti, kiziti kumgambira visoweru Abramu Mweburaniya yakalikaliti pakwegera na mitera mikulu ya mialoni ya Mwamoli Mamle. Mamle kaweriti mlongu gwakuyi Eshikoli na Aneri, woseri waweriti wajimilirana pamuhera na Abramu. 14Abramu pakapatiti visoweru avi kuwera mwipa gwakuyi wamtola lopola, yomberi kawashema wantu miya ntatu na malongu matatu na lilongu na nani, walii wa kaya yakuwi yawafunditwi weri kulikomanga ngondu na wawafatiti wangondu mpaka Dani. 15Aku kawabagula wanjagira wakuyi vipinga vipinga. Pashiru wawakomanga wangondu wakuyi, yomberi kawakanka na kuwawinga mpaka Hoba, kushana mwa Damasko. 16Su Abramu kaulopola ulunda woseri yawautoliti kwa wangondu na kumlopoziya Lutu mwipa gwakuyi na ulunda wakuyi pamuhera na wantu wamonga.

Melikizedeki kankumpetera mashi Abramu

17Abramu pakawuyiti kulawa mungondu pakamkankiki mfalumi Kedorilaomeri pamuhera na wayaguwi, mfalumi gwa Sodoma kawukiti kugenda kumwanka mlushi lwa Shawe, vinu lushemuwa lularanda lwa mfalumi. 18Shakapanu Melikizedeki mfalumi gwa lushi lwa Salemu, yakiweriti mtambika gwa Mlungu mkulu, kajegiti libunda pamuhera na divayi, 19kampetera mashi Abramu pakatakula, “Abramu katekelerwi na Mlungu mkulu, yakaumbiti kumpindi na pasipanu! 20Na kakwisuwi Mlungu mkulu, yakakutangiti kuwakanka wangondu waku!” Su Abramu kampananiti Melikizedeki semu ya lilongu kwa vyoseri vyakaweriti navi.

21Mfalumi gwa Sodoma kamgambiriti Abramu, “Gumpanani neni wantu awa, kumbiti ulunda woseri gutoli gamweni.” 22Kumbiti Abramu kamgambira mfalumi gwa Sodoma, “Nyasula liwoku lyaneni kwa Mtuwa, Mlungu yakawera Kumpindi nentu, yakaumbiti kumpindi na pasipanu, nilurapira 23kuwera hapeni ntoli shintu shoseri shashiwera shaku, ata paguwera ugunda ama lugoyi lwa shilyatu, nakamu nagutakula, nimtenda Abramu kaweri mlunda. 24Su hapeni wanki shoseri, kumbiti virii wantemba wangu vyawaliyiti pamuhera na semu ya walii yawaweriti pamuhera na neni, walii ashina Aneri na Esikori na Mamire. Womberi vulaa wawapanani semu yawu.”

Currently Selected:

Lyanjiru 14: PBV

Highlight

Copy

Compare