Kulawa 9

Komangu lya kuwalaga wankanyama

1Shakapanu Mtuwa Mlungu kamgambiriti Musa, “Gugendi kwa Falawu na gumgambiri, Mtuwa Mlungu, Mlungu ulii yawamguwira Waeburaniya, kankulonga hangu, guwaleki wantu waneni wagendi kunguwira. 2Handa pagwendereya kulema kuwalekeziya wawuki, 3nukubereziya kuwera hanukwazibu kwa makakala gangu kwa kujega malweli ga kutiliziya kwa wankanyama waku na kwa farasi waku na wankanyama punda waku na wankanyama ngamiya waku na kwa wang'ombi waku na kwa vipinga vya wambuzi waku na wakondolu waku. 4Kumbiti neni Mtuwa Mlungu, hantuli gweka ntambu yantenda kwa wankanyama wa wantu wa Israeli na kwa wankanyama wa wantu waku. Malawiranu gakuyi hagaweri kwahera ata nkanyama yumu gwa wantu wa Israeli yakagenda kufuwa. 5Gumgambiri kuwera neni amuwa lishaka lya shirawu hanishitendi shitwatila ashi muisi ayi.”

6Shilawu yakuwi Mlungu katenditi shilii shakatakuriti. Ulweli wa kutiliziya nentu guwapatiti wankanyama wa wantu wa Misri, wankanyama wavuwa wafuwiti. Kumbiti kwahera nkanyama yoseri gwa wantu wa Israeli yakafuwiti. 7Falawu kawatumiti wantu wakaloliloli, womberi walikangashiti kuweriti kwahera nkanyama yoseri gwa wantu wa Israeli yakahowiti. Kumbiti pawamgambiriti kala aga Falawu, Falawu kendereyiti kuwera na mtiti, viraa kawalekeziyiti ndiri wantu wa Israeli kuwuka.

Komangu la maputi

8Shakapanu Mtuwa Mlungu kamgambiriti Musa na Aruni, “Mtoli livu lya tanuru mumawoku mwenu, shakapanu Musa kiti kunani, kulongolu kwa Falawu. 9Livu ali alipalanganyikiti muisi yoseri ya Misri gambira madika madidini. Kila pahala livu halitendi maputi gawatenduwi wantu wa Misri pamuhera na wankanyama wawu muisi yawu yoseri.” 10Su watola livu na wagenditi naga kugoloka kulongolu kwa Falawu. Musa kagikiti kumpindi. Livu lyeneyiti koseri, su gatenditi maputi gawatenduwi wantu wa Misri pamuhera na wankanyama wawu. Maputi gawatenditi womberi waweri na vironda. 11Ata wantu walii yawatenditi uhawi, viraa waweriti na maputi. Malawiranu gakuyi womberi wasinditi kwiza kwa Musa kusingana nayu, toziya wantu yawatenditi uhawi waweriti na maputi gambira wantu wamonga wa Misri. 12Kumbiti Mtuwa Mlungu kamtenditi Falawu kendereyiti kuwera na mtiti. Kawasheriti ndiri ashina Musa na Aruni shawalongiti gambira Mtuwa Mlungu ntambu yakamgambiriti Musa megalawiri.

Komangu lya nvula ya mabuwi

13Shakapanu Mtuwa Mlungu kamgambiriti Musa, “Shirawu gwimuki mandawira putiputi gumgenderi Falawu. Gugendi na gugoloki kulongolu kwa Falawu na gumgambiri kuwera Mtuwa Mlungu, Mlungu yawamguwira Waeburaniya, kalonga hangu, guwaleki wantu wangu wawuki, wagendi kunguwira kushiwala. 14Na pagulema kuwalekeziya wawuki, shaka ashi hanuwazibu kwa makomangu makulu, hanuwazibu ndiri gweka yawu wakulu wayagu pamuhera na wantu waku, kumbiti hanukwazibu pamuhera na gwenga, su haguvimani kuwera kwahera mlungu gwingi kuliku neni pasipanu poseri. 15Handa mentenderi makakala gangu goseri kukusyatanga gwenga pamuhera na wantu waku kwa malweli ga kutiliziya nentu, megawamalili mwawoseri pasipanu. 16Toziya ya kukuleka gulikali, su nukulanguziyi makakala gangu na malawiranu gakuyi wantu woseri pasipanu hawavimani ukulu yanuwera nawu. 17Gwenga gwankali na mtiti kulema kuwalekeziya wantu waneni wawuki. 18Su gushipikaniri ashi, shilawu mushaka gambira ashi, hantendi nvula ya mabuwi iwatoweli wantu wa Misri. Kwanjira Misri iweri isi, nvula ayi hayenitowi ntambu yaigenda kutowa. 19Su gutumi ujumbi kwa kila muntu kuwatula weri wankanyama wakuyi na kila shintu shashiwera kunja mumalambu. Nvula ya mabuwi haimtoweleri kila muntu na kila nkanyama yakawera kunja kumalambu na yakawera ndiri mushisasa, woseri hawahowi.” Su Musa katenditi shilii shakatakuliti Mtuwa Mlungu.

20Wakulu wamu wayaguwi na Falawu, pawapikaniriti shilii shakatakuliti Mtuwa Mlungu, womberi watiriti nentu. Su wawatoliti wankanyama wawu pamuhera na wamanda wawu na kuwatula muvisasa. 21Kumbiti woseri walii yawalisheriti ndiri shilii shakatakuliti Mtuwa Mlungu, wawalekiti wamanda wawu pamuhera na wankanyama wawu mumalambu.

22Shakapanu Mtuwa Mlungu kamgambiriti Musa, “Gulitalipisiyi liwoku lyaku kulyera, su nvula ya mabuwi haitowi muisi yoseri ya Misri, haiwatoweri wantu na wankanyama wawu pamuhera na vimeru vya mumalambu.” 23Su Musa kalitalipisiya luhonga lwakuyi kulyera. Mtuwa Mlungu katenda nvula ya mabuwi itowi muisi ya Misri. Viraa kuweriti na milindimiru pamuhera na mimeta ya milindimiru. 24Nvula nkulu ya mabuwi paiweriti yankutowa, kuweriti na mlindimiru pamuhera na mimeta ya milindimiru muisi. Ntambu ayi hayeni lawiri kwanjira Misri iweri isi. 25Nvula ayi ya mabuwi yagamiziyiti kila shintu shashiweriti mumalambu muisi ya Misri, kila nkanyama na kila muntu. Nvula ya mabuwi yagamiziyiti vimeru vyoseri pamuhera na mitera mumalambu. 26Mkowa gwa Gosheni gweka yakuwi, wantu wa Israeli kwawaweriti wankulikala, kuweriti kwahera nvula ya mabuwi.

27Su Falawu kamtumiti muntu yumu kawashemi Musa na Aruni. Womberi pawiziti kwakuyi, yomberi kawagambiriti, “Shaka ashi, neni ntenda vidoda. Shilii shakatenditi Mtuwa Mlungu sha teratera, neni pamuhera na wantu wangu tutenda shintu shifaa ndiri. 28Mumluwi Mtuwa Mlungu! Twenga hapeni tuhepeleri ng'anji mulilindimiru ali na nvula ya mabuwi ayi! Hanuwaleki wantu waku wawuki, namulikala panu kayi.”

29Musa kamwankula, “Katepu hera pandawa kunja kwa lushi alu, hantalapisiyi liwoku lyangu na kumluwa Mtuwa Mlungu. Shakapanu milindimiru haipeli, nvula ya mabuwi haileki kutowa. Ayi hailawiri su guvimani kuwera pasipanu ndo pa Mtuwa Mlungu. 30Kumbiti nivimana kuwera gwenga pamuhera na wakulu wayagu mumtira ndiri Mtuwa Mlungu.”

31Nvula ya mabuwi paitowiti, nganu pamuhera na pamba, vyoseri viharabisiwituwi toziya nganu iweriti na mikunguwa na pamba iweriti na uluwa. 32Kumbiti mpunga na vimeru vyamonga vyavilifana na mpunga viharabisiwituwi ndiri toziya vikawa kukamala.

33Su Musa kawukiti ukaya kwa Falawu, kagenditi kunja kwa lushi. Shakapanu kalitalipisiyiti liwoku lyakuyi kumluwa Mtuwa Mlungu. Su malindimiru ganyamaliti na mabuwi galekiti kutuluka na nvula ilekiti kutowa muisi ya Misri. 34Kumbiti Falawu pakawoniti kuwera nvula ya mabuwi na malindimiru ganyamala, yomberi katenditi kayi vidoda. Mweni pamuhera na wakulu wayaguwi wendereyiti kuwera na mtiti. Kulindimira kuleka, kawuyiriti vidoda vyakuwi kayi, hakaweri shiburi, yomberi pamuhera na maafisa wakuyi. 35Su gambira Mtuwa Mlungu ntambu yakamgambiriti Musa, Falawu kalemiti kuwalekeziya wantu wa Israeli wawuki.

Currently Selected:

Kulawa 9: PBV

Highlight

Copy

Compare