Kulawa 5

Musa na Aruni wapalongolu pa Falawu

1Shakapanu Musa na Aruni wamgendiriti Falawu, na yumu gwawu kamgambiriti, “Mtuwa Mlungu, Mlungu gwa Israeli kankulonga hangu, guwaleki wantu wangu wagendi kushiwala, wantenderi msambu.” 2Kumbiti Falawu kawakosiya, hashi, “Mtuwa Mlungu ndo gaa?” Mpaka neni numpikaniri na kuwaleka Waisraeli wagendi? “Neni numumana ndiri Mtuwa Mlungu! Na hapeni nuwalekeri Waisraeli wagendi.” 3Musa na Aruni wamwankuliti, “Mlungu gwa Waeburaniya yawamguwira kaligubutuliti kwa twenga na kutugambira twizi tukugambiri gwenga. Su tukuluwa shondi shondi gutuleki tugendi kushiwala mwanja gwa mashaka matatu. Tufiruwa twakamlaviliri tambiku Mtuwa Mlungu, Mlungu gwetu kulii. Handa patutenda ndiri hangu, Mlungu hakatutendi twenga tuhowi kwa malweli ama kuvamiwa na wangondu wetu.”

4Kumbiti mfalumi gwa Misri kawankula, “Mwenga Musa na Aruni, iwera hashi mwankuwalewela wantu nawatenda mahengu? Muwagambiri wamanda walii wawuyi mumahengu!” 5Falawu kalonga kayi, “Mumpikaniri! Mwenga wantu yamulikala panu mwawavuwa kuliku twenga wantu wa Misri. Su vinu mwenga mfira kuwatenda womberi waleki kutenda mahengu na kwoyera?”

Wankufyatura matafali pota na mahamba

6Lishaka liraa lilii Falawu kalagaliriti wagolokera wa Misri pamuhera na wantu wa Israeli yawawagolokera wayawu, kalonga, 7“Kwanjira leru namuwapanana wantu awa wa Israeli mahamba ga kufyatulira matafali ntambu yaiwera. Wawu weni hawagendi mumalambu kulisakulira mahamba. 8Kumbiti walanga ya matafali gawafyaturiwuwa kila lishaka iweri ntambu iraa gambira kwanja, nampungura ata limu. Womberi wahera mahengu gavuwa ga kutenda. Ndo mana womberi wanduwa nuwalekiziyi wagendi kushiwala kumlavilira tambiku mlungu gwawu. 9Muwawongeri wantu awa lihengu likamala, su womberi hapeni waweri na shaka sha kupikanira upayira wa wakulu wawu!”

10Su wakulu wa wamanda na wagolokela wa wamanda wagenditi kwawaweriti wantu wa Israeli na kuwagambira, “Mfalumi gwa Misri kalonga kuwera hapeni mpananuwi kayi mahamba. 11Mgendi maweni mwakasakuli mahamba poseri pamuweza kugapata. Kumbiti mfiruwa kufyatura matafali galaa galii gamfyaturiti kwanja.” 12Su wantu woseri wa Israeli wagenditi muisi yoseri ya Misri kusakula mahamba ga kufyatulira matafali. 13Wakulu wa wamanda wawagambiriti womberi pawasintikira, “Mumalili lihengu lyenu lyanfiruwa kumalila kila lishaka, mfyaturi walanga ilaa ilii ya matafali gamfyaturiti pamberi pampananituwi mahamba!” 14Wantu wa Israeli pawasinditi kumalila mahengu galii, wakulu wa wamanda wawasyantangiti ntomondu wantu wa Israeli yawawagolokera wayawu na wawakosiyiti, “Iwera hashi wantu woseri yamuwagolokera, wafyatura ndiri matafali leru gambira kwanja ntambu yamtenditi?”

15Shakapanu wantu wa Israeli yawawagolokera wayawu, wagenditi kwa Falawu na kuhinginika pawalonga, “Iwera hashi gwankututendera hangu twenga wantumintumi waku? 16Vinu womberi watupanana ndiri mahamba ga kufyatura matafali, kumbiti watulazimisha kufyatula matafali. Na vinu mushaka shamonga watusyatanga ntomondu. Kumbiti likosa ali lya wakulu waku wa wamanda, yawatutenditi tusindi kufyatula matafali gambira kwanja.” 17Kumbiti Falawu kalongiti, “Mwenga mwawalegilegi na mfira ndiri kutenda lihengu! Ndo mana mwenga mlonga, Tuleki tugendi kushiwala twakamlaviliri tambiku Mtuwa Mlungu. 18Su mgendi mwakatendi lihengu, toziya twenga hapeni tuwapanani mahamba kumbiti hamfyaturi walanga ya matafali galaa galii gamfyaturiti pamberi.” 19Su wantu walii yawawagolokera wantu wa Israeli wayawu, vinu wayambuliti kuwera wawera muntabika, toziya womberi wagambirituwi, hapeni tupunguli walanga ya matafali yamfiruwa kugafyatura kila lishaka.

20Womberi pawawukiti mnumba nkulu ya mfalumi, waliwoniti na Aruni pamuhera na Musa yawaweriti wankuwahepera. 21Su womberi wawagambiriti Aruni pamuhera na Musa, “Mtuwa Mlungu kashiwoni shitwatira ashi na kuwatoza mwenga wawili ntambu yamtenditi! Mlungu hakawazibu mwenga toziya mwenga mumtenda Falawu pamuhera na wakulu wakuyi watukalaliri twenga! Mwenga muwapanana toziya ya kutulaga twenga!”

Musa kankumlilira Mlungu kawatangi

22Shakapanu Musa kawalekiti womberi na kugenda kumluwa Mtuwa Mlungu kayi pakalonga, “Gwee Mtuwa Mlungu, iwera hashi gulekiziya ukondora woseri awu ulawili kwa wantu waku? Iwera hashi guntumiti neni nizi panu? 23Kwanjira pang'enditi kwa Falawu kumgambira shilii shagung'ambiriti ntakuli, yomberi kankuwatendera ukatili wantu waku na gwenga gutenda ndiri shintu shoseri kuwatanga wantu waku!”

Currently Selected:

Kulawa 5: PBV

Highlight

Copy

Compare