Kulawa 3

Mlungu kankumlawira Musa

1Lishaka limu, Musa kaweriti kankulolera wakondolu wa mganafu gwakuyi Yetiru, mtambika gwa wantu wa Midiyani. Yomberi kashilongoziti shipinga sha wakondolu kushiwala na kwingira Horebu, lugongu lulii shakapanu lushemituwi Sinayi, lugongu lwa Mlungu. 2Kulii, Mtuwa Mlungu kamlawiriti yomberi pakalifana gambira ntumintumi gwa kumpindi. Ntumintumi gwa kumpindi kalawiriti gambira limbamba lya motu mushiputira shashiyaka motu. Musa kashiloliti, kumbiti yomberi kalikangashiti kuwera shiputira shirunguliti ndiri. 3Musa kalongiti, “Hansegeleri pakwegera moni likangashu ali! Hashi, shiputira ashi shankuyaka kumbiti shilungulira ndiri?”

4Mtuwa Mlungu pakawoniti kuwera yomberi kankusegelera, su kamshema Musa kulawa pakati pa shiputira shilii, kalongiti, “Musa! Musa!” Musa kawankula “Naam, napanu!” 5Mtuwa Mlungu kalongiti, “Nagwiza pakwegera! Toziya neni ndo Mlungu, isi yaguigoloka yananagala. Su guvuli vilwatu vyaku kulanguziya ligoya kwaneni.” 6Kalongiti, “Neni Mlungu, ulii wambuyi waku Abrahamu na Isaka na Yakubu wanguwiriti.” Su Musa kagubika sheni shakuwi, toziya katiriti kumlola Mlungu.

7Shakapanu Mtuwa Mlungu kalongiti, “Mona ntambu yawawatenderuwa vidoda wantu wangu muisi ya Misri. Nuwapikanira pawalira kuluwa utanga toziya ya wagolokera wawu ntambu yawawatabisiya mukutenda lihengu. Nivimana wantu wangu ntambu yawatabika. 8Su neni nsuluka kulawa kumpindi kuwalopoziya womberi kulawa kwa wantu wa Misri. Niza kuwalaviya womberi muisi ayi su wagendi muisi ya Kanaani. Hanuwajegi muisi nkulu na iherepa yaiwera na fasi nkulu. Hayiweri iherepa kulolerwa mifugu na kulima. Isi yeni wiwuka wa Kanaani na Hiti na Amori na Perizi na Hivi na Yebusi wankulikala. 9Nakaka vinu nuwapikanira wantu wangu wa Israeli pawalira. Mona wantu wa Misri ntambu yawawatabisiya. 10Su guwuyi muisi ya Misri. Nukulagalira gugendi kwa Falawu, yomberi kaweza kukuleka gwenga guwatoli wantu wangu, wantu wa Israeli kulawa muisi ya Misri.”

11Kumbiti Musa kamwankula Mlungu, “Neni weza ndiri! Hapeni wezi kugenda kwa Falawu, kumluwa kandekeziyi kuwatola wantu wa Israeli kulawa muisi ya Misri!” 12Mlungu kamgambira, “Neni haweri pamuhera nagwenga. Paguwalaviya wantu wangu kulawa muisi ya Misri, mwawoseri mwenga hamunguwiri mulugongu alu. Ayilanguziyi kuwera neni ndo ulii yakakutumiti gwenga kwa womberi.”

13Musa kamgambiriti Mlungu, “Pang'enda kwa wantu wa Israeli na kuwagambira, Mlungu, ulii wambuyi wenu wamguwiriti, kantuma nizi kwa mwenga, womberi hawankosiyi, litawu lyakuyi gaa? Hanuwagambiri shishi?”

14Mlungu kamwankula Musa, “NENI NDO YAWERA. Guwagambiri hangu wantu wa Israeli, ulii yawamshema. NENI NDO YAWERA. Kantuma kwa mwenga.

15Mlungu viraa kamgambiriti Musa, guwambiri wantu wa Israeli, Mtuwa Mlungu yawamguwiriti wambuyi wenu, Abrahamu na Isaka na Yakubu, yomberi kantuma kwa mwenga. Litawu ali Mtuwa Mlungu, haliweri litawu lyangu mashaka goseri. Litawu ali shiyiwuku shoseri shashizaku, hawalitenderi pawayowera kuusu neni. 16Gugendi muisi ya Misri, guwajojoniri pamuhera wakulu wa wantu wa Israeli na guwagambiri,Mtuwa Mlungu kandawiriti, Mlungu ulii yakaguwirituwi na wambuyi wenu Abrahamu na Isaka na Yakubu. Yomberi kang'ambiriti, mona wantu wa Misri ntambu yawatenditi kwa mwenga. 17Neni ntakula lagiru kuwera hanuwalopoziyi mwenga kulawa mumagaziwu muisi ya Misri, na hanuwajegi kugenda muisi ya kwawalikaliti wantu wa Kanaani na Hiti na Amori na Perizi na Hivi na Yebusi. Isi iherepa kufugila mifugu na kulima.”

18“Wantu wangu hawatendi shagutakula, su gwenga pamuhera na wakulu wa wantu wa Israeli hamgendi kwa Falawu, hamumgambiri yomberi, Mtuwa Mlungu, ulii Mlungu gwa Waeburaniya yawamguwira, yomberi kaligubutula mweni kwa twenga. Su vinu tukuluwa, gutulekeziyi tugendi mwanja gwa mashaka matatu kushiwala, su kulii hatuwezi kulaviya malaviwu kwa Mtuwa Mlungu, Mlungu gwetu. 19Kumbiti nivimana kuwera Falawu hakawalekeziyi mwenga kuwuka handa pakavimana kuwera nana makakala makulu kuliku galii gakawera naga. 20Su hantenderi makakala gangu kuwasyatanga wantu wa Misri kwa kutenda mawuzawuza gavuwa ga kutiliziya kulii. Shakapanu yomberi hakawalekeziyi mwenga kuwuka.”

21“Aga pagalawira, hanuwatendi wantu wa Misri wawapanani ligoya. Malawiranu gakuyi hagaweri kuwera pamuwuka muisi ya Misri, womberi hawawapanani mwenga vintu vivuwa muwuki navi. 22Mushaka ashi, kila mdala muwantu wa Israeli hakamluwi gwapakwegera gwakuyi kwa wantu wa Misri na kila mdala gwa Shimisri yakalikala mnumba yakuwi kampanani madini ga feza na vintu vya zahabu na nguwu ziherepa. Yomberi hakawapanani womberi na haguwavalisiyi wananguta waku wapalu na wadala kuwuka navi.”

Currently Selected:

Kulawa 3: PBV

Highlight

Copy

Compare