Kulawa 29
29
Malagaliru ga kuwatyeka Aruni na wana wakuyi kuwera watambika
Walawi 8:1-36
1Havi ndo vitwatira vyagugenda kuwatendera Aruni pamuhera na wana wakuyi su kuwatyeka watendi lihengu kulongolu kwangu gambira watambika. Hagutoli mwana gwa ng'ombi gwa shipalu pamuhera na wakondolu wa shipalu wawili yawahera shidoda shoseri. 2Hagutoli viraa mabumunda yagalekeruwa ndiri simika, maandazi yagalekeruwa ndiri simika, kumbiti galii yagatemelekuwa lipaki. Vyoseri vinyawiwi kwa ubumu unama gwa nganu. 3Shakapanu gugatuli mabumunda aga mulijamanda limu na gundavilili shaka shimu pamuhera na mwana gwa ng'ombi gwa shipalu ulii na wakondolu wa shipalu wawili.
4Shakapanu guwajegi Aruni pamuhera na wana wakuyi paligomi lwa Liringu Linanagala na kuwapunga. 5Su hagutoli nguwu zilii za utambika na gumvalisiyi Aruni, lihabiti na kanzu na shipandi sha nguwu sha kugubika shifuwa na shifuku sha pashifuwa na gumtawi mkanda gulii yagusonuwa weri. 6Kayi hagumvalisiyi shilemba shilii mumtuwi na kutula pashilemba shibati shilii sha zahabu shashilembitwi mnanagala kwa Mtuwa Mlungu. 7Hagutoli lipaki, gumumiminiri Aruni pamtuwi pakuwi, kumtyeka katendi lihengu lyangu. 8Haguwajegi wana wa Aruni na kuwavalisiya vipandi vya nguwu vya shati ndali nsheli igubika shifuwa. 9Guwatawi lufunga mushunu mwawu na kuwavalisiya kofia zawu. Ntambu ayi haguwatyeki Aruni pamuhera na wana wakuyi kuwera watambika. Womberi hawaweri watambika shaka shoseri.
10Shakapanu hagumjegi mwana gwa ng'ombi ulii kulongolu kwa Liringu Linanagala. Aruni pamuhera na wana wakuyi hawatuli mawoku gawu pamtuwi gwa nkanyama ulii 11na kumlikitula kulongolu kwa Mtuwa Mlungu, paligomi lya Liringu Linanagala. 12Hagutoli shyasi sha mwazi na kuityemeleka mupembi za shitalawanda sha kutambikira kwa shyala shaku, na mwazi yagusigala haguguwitiri pasi pa shitalawanda sha kutambikira. 13Shakapanu hagutoli lipaki lyoseri lyaligubikira utumbu, semu iherepa matoga pamuhera na figu mbili na lipaki lyakuyi, guvilunguziyi vyoseri pashitalawanda sha kutambikira. 14Kumbiti shinofu sha mwana gwa ng'ombi ayu pamuhera na lukuli lyakuyi na mavi gakuyi, haguvitoli na kuvulunguziya kunja kwa kambi ya mwenga. Ayi hayiweri tambiku ya kuwusiya vidoda vyenu.
15Shakapanu hagumtoli yumu gwa wakondolu walii wa shipalu na kumgambira Aruni pamuhera na wana wakuyi watuli mawoku gawu pamtuwi gwa nkanyama ulii. 16Su gwenga hagumlikituli na mwazi gwakuyi hagugumishiri mushitalawanda sha kutambikira wega zakuwi zoseri. 17Hagumlikituli nanyama ulii vipandi vipandi, hagugululi utumbu wakuyi na magulu gakuyi, guvituli vyoseri pamuhera na mtuwi na vipandi vyamonga. 18Shakapanu hagumlunguziyi kondolu ulii pashitalawanda sha kutambikira su kundavilira tambiku ya kulunguziya, ununkira wa tambiku yailaviwa kwa motu hainherepeziyi neni Mtuwa Mlungu.
19Hagumtoli kondolu ulii yumonga, Aruni pamuhera na wana wakuyi hawatuli mawoku gawu pamtuwi gwa nkanyama ulii. 20Su gwenga hagumlikituli na kutola shyasi sha mwazi na kumswaga Aruni mukingu ga makutu gawu ga kumliwu na muvyala vikulu vya mawoku gawu ga kumliwu na muvyala vikulu vya magulu gawu ga kumliwu. Mwazi yagusigala haguumishiri pashitalawanda sha kutambikira muwega zakuwi zoseri. 21Shakapanu hagutoli shyasi sha mwazi yaiweri pashitalawanda sha kutambikira pamuhera na lipaki lilii gumumishiri Aruni na nguwu zakuwi, guwamishiri viraa wana wakuyi na nguwu zawu. Aruni pamuhera na wana wakuyi hawaweri watyekuwa pamuhera na nguwu zawu zoseri.
22Viraa hagutoli lipaki lya kondolu ulii gwa shipalu na mshira gwakuyi na lipaki lyaligubika utumbu na semu iherepa ya matoga na figu zakuwi mbili pamuhera na lipaki lyakuyi na liwondu lya kumliwu. 23Yagalekeruwa ndiri simika kulongolu nkwa neni Mtuwa Mlungu, hagutoli libumunda limu na liandazi limu lyalilekeruwa lipaki na libumunda linama limu. 24Vyoseri avi hagumpanani Aruni pamuhera na wana wakuyi na womberi hawavinyasuli kumpindi kuwera lilangaliru lya kundavilira tambiku neni Mtuwa Mlungu. 25Shakapanu haguvitoli kayi kulawa mumawoku mwawu na kuvilunguziya pashitalawanda sha kutambikira pamuhera na tambiku ilii ya kulunguziya, su viweri ununkira uherepa yaugenda kunherepeziya neni Mtuwa Mlungu. Ayi iwera tambiku yailaviluwa kwa motu.
26Shakapanu hagutoli shidali sha kondolu ulii wa kumtula kwajili ya kumtula Aruni kwajili ya lihengu lyaneni, na kutenda lilangaliru lya kundavilira neni Mtuwa Mlungu. Ashi hashiweri semu yawu. 27Mtambika pawamtyeka kwajili ya lihengu lya neni, shidari na lihondu lya kondolu gwa shipalu gwa kutekuwa, havijeguwi na kutuluwa kwajili ya lihengu lyaneni kuloongolu kwaneni kwa kutenda lilangaliru lya kundavilira, vyeni haviweri vya Aruni pamuhera na wana wakuyi. 28Su wantu wa Israeli mashaka goseri hawatoli semu hazi kulawa mutambiku zawu za ponga zawandavilira neni Mtuwa Mlungu na nkumpanana Aruni pamuhera na wana wakuyi. Ayi hayiweri tambiku yawu kwa Mtuwa Mlungu.
29Pa kuhowa Aruni, nguwu zyakuwi nanagala hawapananuwi wayuwuka wakuyi, su womberi hawazivali lishaka lawu lya kutekuwa na kutuliluwa mawoku. 30Mwana gwa Aruni yakawera mtambika pahala pa tati gwakuyi, hakavali nguwu azi lishaka lya saba kutenda lihengu Muliringu Linanagala.
31Hagutoli shinofu sha kondolu ulii gwa kutekuwa na kuiteleka mupahala papawera Pananagala. 32Shakapanu haguwapanani Aruni pamuhera na wana wakuyi, na womberi hawaliyi paligomi lya Liringu Linanagala, pamuhera na mabumunda gagasigaliti mulijamanda. 33Womberi hawaviliyi vintu vyavitendirituwi kutekuwa kwajili ya tambiku ya kuwusiya vidoda, kumbiti muntu gwingi nakalekeziwa kuviliya toziya viwera vinanagala. 34Handa vinofu vyoseri ama mabumunda aga pagasigala mpaka mandawira, su hagugalunguziyi kwa motu, nawaviliya toziya viwera vinanagala.
35Ntambu ayi haguwatenderi Aruni pamuhera na wana wakuyi kulawirana na galii ganukulagaliriti, haguwatyeki kwa mashaka saba, 36Kila lishaka hagulaviyi ng'ombi gwa shipalu kaweri tambiku ya kuwusiya vidoda su kutenda ukolaniziwu, kwa kutenda hangu hagushipungi shitalawanda sha kutambikira, shakapanu hagumishiri lipaki kushityeka. 37Kwa mashaka saba hagushitenderi shitalawanda na kushityeka. Pa aga shitalawanda hashiweri shinanagala nentu na shoseri shashishinkula hashiweri shinanagala.
Tambiku za kila lishaka
38Kila lishaka shaka shoseri shashiza, hagulaviliri tambiku pashitalawanda, hagulaviyi wana wa kondolu wawili yawawera na umuri gwa vinja gumu. 39Mwana gwa kondolu yumu hagumlaviyi tambiku mandawira na yumonga hagumlaviyi pamihi. 40Pamuhera na mwana gwa kondolu gwa kwanja, viraa hagulaviyi kilu yimu ya ubumu unama na lita yimu ya lipaki liherepa na lita yimu ya divayi handa tambiku ya shirandu. 41Ntambu iraa ayi na mwana gwa kondolu ulii yumonga gwa pamihi hagumlaviyi tambiku pamuhera na tambiku ya viboga na shirandu handa ntambu yagutenditi mandawira, ununkira ya tambiku hayi yailaviwa kwa motu haiherepeziyi neni Mtuwa Mlungu. 42Tambiku ayi ya kulunguziwa hailaviwi mashaka goseri, shileri na shileri, kulongolu kwaneni Mtuwa Mlungu, kulongolu kwa ligomi lya Liringu Linanagala kweni aku hanuliwoni na mwenga na kuyowera na gwenga. 43Panu ndo haniliwoni na wantu wa Israeli na ukwisa waneni haupatendi paweri pananagala. 44Liringu Linanagala pamuhera na shitalawanda sha kutambikira hanuvitendi viweri vinanagala, viraa virii Aruni pamuhera na wana wakuyi hanuwatyeki su wantenderi gambira watambika. 45Hanulikali pakati pa wantu wa Israeli, neni haweri Mlungu gwawu. 46Palaa womberi hawavimani kuwera neni ndo Mtuwa Mlungu, Mlungu gwawu, yanuwajega kulawa Misri, su nilikali pakati pawu. Neni ndo Mtuwa Mlungu, Mlungu gwawu.
Currently Selected:
Kulawa 29: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.
